ខេត្តបន្ទាយមានជ័យ ៖ ក្រោយការណែនាំពីសម្តេចតេជោ ហ៊ុន សែន ខេត្តបន្ទាយមានជ័យបានដាក់ពង្រាយកម្លាំង១.៥០០នាក់តាមបន្ទាត់ព្រំដែន ទប់ស្កាត់ពលករចំណាក់ស្រុក ដើម្បីបង្ការទប់ស្កាត់ជំងឺកូវីដ១៩។ លោកឧត្តមសេនីយ៍ទោ ឈុន…
ខេត្តបន្ទាយមានជ័យ ៖ ក្រោយការណែនាំពីសម្តេចតេជោ ហ៊ុន សែន ខេត្តបន្ទាយមានជ័យបានដាក់ពង្រាយកម្លាំង១.៥០០នាក់តាមបន្ទាត់ព្រំដែន ទប់ស្កាត់ពលករចំណាក់ស្រុក ដើម្បីបង្ការទប់ស្កាត់ជំងឺកូវីដ១៩។
លោកឧត្តមសេនីយ៍ទោ ឈុន ម៉ៅ មេបញ្ជាការទិសទី១ បន្ទាយមានជ័យ បានប្រាប់ថា ជាសារណែនាំពីប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន និងវិធានការពីឯកឧត្តម ហ៊ុន ម៉ាណែត មេបញ្ជាការកងទ័ពជើងគោក ហើយកងកម្លាំងទិសទី១ ខេត្តបន្ទាយមានជ័យ បានដាក់ពង្រាយកងកម្លាំងតាមបន្ទាត់ព្រំដែន និងធ្វើការត្រួតពិនិត្យរថយន្តដែលដឹកទំនិញចេញ-ចូលតាមច្រក ដូចជា ច្រកទ្វារអន្តរជាតិប៉ោយប៉ែត និងបឹងត្រកួន ស្រុកថ្មពួក ច្រកម៉ាឡៃ ស្រុកម៉ាឡៃជាដើម។
លោកបានបញ្ជាក់ថា ការដាក់ពង្រាយកម្លាំងតាមបន្ទាត់ព្រំដែន ចេញល្បាត ត្រួតពិនិត្យតាមច្រករបៀង ទប់ស្កាត់ពលករចំណាកស្រុកដែលលួចឆ្លងដែនខុសច្បាប់ ដើម្បីបង្ការទប់ស្កាត់ជំងឺកូវីដ១៩ អនុវត្តតាមការណែនាំពីក្រសួងសុខាភិបាល។
លោក អ៊ុ រាត្រី អភិបាលខេត្តបានបញ្ជាក់ថា ក្រោយពីទទួលសារណែនាំពីប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ឱ្យខេត្តជាប់ព្រំដែនថៃ ត្រូវបង្កើនការពង្រឹងការទប់ស្កាត់ពលករចំណាកស្រុកខុសច្បាប់នោះ ខេត្តបន្ទាយមានជ័យបានដាក់ពង្រាយកម្លាំងទាំង៣ស្ថាប័នចំនួន១,៥០០នាក់តាមបន្ទាត់ព្រំដែន បង្កើនការត្រួតពិនិត្យ និងទប់ស្កាត់ពលករខុសច្បាប់។
លោកបានបញ្ជាក់ថា កងកម្លាំងកំពុងបង្កើនការត្រួតពិនិត្យតាមរថយន្តដឹកទំនិញនៅច្រកទ្វារអន្តរជាតិប៉ោយប៉ែត និងតាមបន្ទាត់ព្រំដែនតាមច្រករបៀង និងតាមរថយន្តដែលដឹកចេញពីព្រំដែន និងច្រកព្រំដែនអូរបីជាន់ ស្រុកអូរជ្រៅ ដែលទទួលពលករខ្មែរ១ថ្ងៃមិនតិចជាង២០០នាក់នោះទេ ។ ហើយរហូតពេលនេះមានមណ្ឌលចំនួន១៤កន្លែង ដែលកំពុងឱ្យពលករខ្មែរធ្វើចត្តាឡីស័កសរុប១៧.៧៥១នាក់ និងកំពុងធ្វើចត្តាឡីស័កបន្តមានចំនួន៤.៥៤៩នាក់៕
ចែករំលែកព័តមាននេះ