ការផ្សព្វផ្សាយទម្រង់គំរូ នឹងធ្វើប្រសើរឡើងទាំងគុណភាព និងប្រសិទ្ធភាពសំរាប់ពលរដ្ឋ
- ភ្នំពេញ
រាជធានីភ្នំពេញ ៖ នៅថ្ងៃទី៨ ខែកុម្ភៈ ឆ្នាំ២០២១ ក្រសួងយុត្តិធម៌ ប្រកាសបើកសិក្ខាសាលាជុំទី ៥ ស្តីអំពី “ទម្រង់គំរូ…
រាជធានីភ្នំពេញ ៖ នៅថ្ងៃទី៨ ខែកុម្ភៈ ឆ្នាំ២០២១ ក្រសួងយុត្តិធម៌ ប្រកាសបើកសិក្ខាសាលាជុំទី ៥ ស្តីអំពី “ទម្រង់គំរូ និងការដាក់បង្ហាញសាលក្រម/សាលដីកា”។
សិក្ខាសាលាជុំទី ៥ ស្តីអំពី “ទម្រង់គំរូ និងការដាក់បង្ហាញសាលក្រម/សាលដីកា” ដែលបានរៀបចំឡើងក្នុងក្របខ័ណ្ឌនៃគម្រោង “អភិវឌ្ឍវិស័យច្បាប់ និងយុត្តិធម៌” ដំណាក់កាលទី ៥ ក្នុងគោលបំណង ដើម្បីផ្សព្វផ្សាយអំពីទម្រង់គំរូ និងដាក់បង្ហាញសាលក្រម/សាលដីកា ក៏ដូចជាដើម្បីពង្រឹងសមត្ថភាពរបស់ចៅក្រម និងមន្ត្រីអនុវត្តច្បាប់លើបទប្បញ្ញត្តិនៃក្រមរដ្ឋប្បវេណី និងក្រមនីតិវិធីរដ្ឋប្បវេណី ដោយផ្តោតជាសំខាន់លើប្រធានបទពាក់ព័ន្ធនឹង ៖
ទី១-បញ្ញត្តិទាក់ទងទៅនឹងការបែងចែកទ្រព្យសម្បត្តិនៅក្នុងរឿងក្តីលែងលះ
ទី២-ចំណុចសំខាន់ៗនៃបទប្បញ្ញត្តិនៃក្រមនីតិវិធីរដ្ឋប្បវេណី និង
ទី៣-ទម្រង់គំរូនៃរឿងក្តីលែងលះ។
ការផ្សព្វផ្សាយទម្រង់គំរូ និងការដាក់បង្ហាញសាលក្រម/សាលដីកានេះផងដែរ គឺជាជំហានវិវត្តថ្មីមួយក្នុងការធ្វើឱ្យប្រសើរឡើងនូវគុណភាព និងប្រសិទ្ធភាពនៃការផ្តល់សេវាយុត្តិធម៌ជូនប្រជាពលរដ្ឋ និងក្នុងគោលបំណងសំខាន់ៗចំនួន ៤ គឺ៖
ទី១-ធានានូវឯកភាព និងសង្គតិភាពនៃឯកសារនានាដែលត្រូវប្រើប្រាស់ជាស្តង់ដារួមលើទម្រង់នៃសេចក្តីសម្រេច។
ទី២-បង្កើនការយកចិត្តទុកដាក់របស់ចៅក្រមក្នុងការរៀបចំតាក់តែងសេចក្តីសម្រេចឱ្យបានត្រឹមត្រូវ និងប្រកបដោយគុណភាព។
ទី៣-ជាមូលដ្ឋាននៃការសិក្សាស្រាវជ្រាវ សម្រាប់ជាប្រយោជន៍ដល់ចៅក្រម មន្ត្រីអនុវត្តច្បាប់ អ្នកសិក្សាច្បាប់ និងប្រជាពលរដ្ឋទូទៅ និង
ទី៤-ផ្តល់ភាពងាយស្រួលដល់ប្រជាពលរដ្ឋទូទៅសម្រាប់ប្រើប្រាស់ឱ្យបានត្រឹមត្រូវតាមច្បាប់ ដូចជាទម្រង់គំរូនៃពាក្យបណ្តឹង។
គួរបញ្ជាក់ផងដែរថា ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ បានអញ្ជើញជាអធិបតីក្នុងពិធីប្រកាសបើកសិក្ខាសាលាជុំទី ៥។ សាលាជុំទី ៥ ស្តីពី “ទម្រង់គំរូ និងការដាក់បង្ហាញសាលក្រម/សាលដីកា” ក្រោមកិច្ចសហការរវាង ទីភ្នាក់ងារសហប្រតិបត្តិការអន្តរជាតិប្រទេសជប៉ុន (JICA) និងក្រសួងយុត្តិធម៌។
សិក្ខាសាលានេះ នឹងប្រព្រឹត្តទៅរយៈពេល ៥ ថ្ងៃពេញ ចាប់ពីថ្ងៃទី៨ ខែកុម្ភៈ ឆ្នាំ២០២១ រហូតដល់ថ្ងៃទី១២ ខែកុម្ភៈ ឆ្នាំ២០២១ នៅរាជបណ្ឌិតសភាវិជ្ជាជីវៈតុលាការ ដោយមានការចូលរួមពីជំនាញការ JICA ប្រចាំក្រសួងយុត្តិធម៌ និងមានសិក្ខាកាមជាចៅក្រមនៃតុលាការកំពូល សាលាឧទ្ធរណ៍ និងសាលាដំបូងរាជធានី-ខេត្ត និងមន្ត្រីអនុវត្តច្បាប់មួយចំនួនផ្សេងទៀត៕ ដោយ ស្រី គំនិត
ចែករំលែកព័តមាននេះ