ខេត្តត្បូងឃ្មុំ ៖ សិស្សានុសិស្សរៀននៅវិទ្យាល័យក្រូចឆ្មារ ស្ថិតក្នុងភូមិទី៤ ឃុំស្វាយឃ្លាំង ស្រុកក្រូចឆ្មារ ចំនួន៩នាក់ សុទ្ធសឹងតែជាសិស្សស្រីៗទាំងអស់ បានដួលសន្លប់ជាបន្តបន្ទាប់ក្នុងពេលដែលកំពុងរៀន បង្កការភ្ញាក់ផ្អើលកើតឡើងកាលពីវេលាម៉ោង១០ព្រឹកថ្ងៃទី៨កុម្ភៈ…
ខេត្តត្បូងឃ្មុំ ៖ សិស្សានុសិស្សរៀននៅវិទ្យាល័យក្រូចឆ្មារ ស្ថិតក្នុងភូមិទី៤ ឃុំស្វាយឃ្លាំង ស្រុកក្រូចឆ្មារ ចំនួន៩នាក់ សុទ្ធសឹងតែជាសិស្សស្រីៗទាំងអស់ បានដួលសន្លប់ជាបន្តបន្ទាប់ក្នុងពេលដែលកំពុងរៀន បង្កការភ្ញាក់ផ្អើលកើតឡើងកាលពីវេលាម៉ោង១០ព្រឹកថ្ងៃទី៨កុម្ភៈ ឆ្នាំ២០២១ បន្ទាប់មកត្រូវបានគេនាំមកសង្គ្រោះជាបន្ទាន់នៅមន្ទីរពេទ្យបង្អែកស្រុកក្រូចឆ្មារ ។ នៅពេលករណីបែបនេះកើតឡើង គេឃើញមន្ត្រីគ្រប់លំដាប់ថ្នាក់រួមទាំងជំនាញសុខាភិបាល បានចុះទៅពិនិត្យរកមូលហេតុផងដែរ។
លោកហីម គង់ នាយកវិទ្យាល័យក្រូចឆ្មារ បានឲ្យដឹងថា ចាប់តាំងពីពេលដែលបានដំណើរការចូលរៀនឡើងវិញ មិនដែលមានបញ្ហាណាមួយកើតឡើងនោះទេ ទើបតែនៅព្រឹកថ្ងៃទី ៨ កុម្ភៈ ដំបូងឡើយមានសិស្សថ្នាក់ទី៩ ចំនួន២នាក់ បានសន្លប់ បន្ទាប់មកទៀតសិស្សថ្នាក់ទី៨ ចំនួន៥នាក់ និងសិស្សថ្នាក់ទី១១ចំនួន២នាក់ បានសន្លប់ដោយពុំដឹងមូលហេតុ។ ជាមួយនោះក៏បានទាក់ទងភ្លាមៗឲ្យមន្ត្រីសុខាភិបាលស្រុកយករថយន្តសង្គ្រោះបន្ទាន់មកដឹងទៅសង្គ្រោះនៅមន្ទីរពេទ្យស្រុកក្រូចឆ្មារ។
នាយកវិទ្យាល័យក្រូចឆ្មារបន្តឲ្យដឹងទៀតថា បន្ទាប់ពីមានហេតុការណ៍បែបនេះកើតឡើងរូបលោកក៏បានប្រកាសតាមមេក្រូឱ្យសិស្សរៀននៅថ្នាក់ដទៃទៀតនាំគ្នាត្រឡប់ទៅផ្ទះវិញដើម្បីចៀសវាងធ្វើឱ្យប៉ះពាល់ដល់សត្តិអារម្មណ៍នៅពេលឃើញហេតុការណ៍បែបនេះរន្ធត់ចិត្ត និងនាំឲ្យសន្លប់តាមគ្នាជាបន្តបន្ទាប់ ដែលអាចនឹងមានចំនួនច្រើនជាងនេះ។ ដោយឡែកសិស្សដែលសន្លប់ទាំង៩នាក់ខាងលើនេះ គឺធ្លាប់សន្លប់កាលពីពេលកន្លងទៅម្ដងរួចមកហើយ មួយវិញទៀតសុខភាពរបស់ពួកគាត់រាងខ្សោយ ទើបអាចបង្កឲ្យមានការសន្លប់បែបនេះ ។ បន្ទាប់ពីក្រុមគ្រូពេទ្យបន្តោងសេរ៉ូមរហូតមកដល់រសៀលថ្ងៃដដែលសិស្សស្រីចំនួន៦នាក់ បាននាំគ្នាចាកចេញពីមន្ទីរពេទ្យទៅកាន់ផ្ទះរៀងៗខ្លួនដោយនៅសល់តែបីនាក់ប៉ុណ្ណោះ។
លោកនាយកវិទ្យាល័យក្រូចឆ្មារបានរំឭកថា កាលពីដើមឆ្នាំ២០២០ សិស្សដែលរៀននៅតាមបណ្ដាថ្នាក់មួយចំនួនក្នុងវិទ្យាល័យក្រូចឆ្មារធ្លាប់បានដួលសន្លប់បន្តបន្ទាប់រហូតដល់ជាង៥០នាក់ បង្កឲ្យមានការភ្ញាក់ផ្អើលរហូតដល់មន្ត្រីជំនាញក្រសួងបរិស្ថានបានយកឧបករណ៍មកធ្វើតេស្តកំហាត់ខ្យល់ក្នុងបន្ទប់ថ្នាក់រៀនឃើញធម្មតាមិនមានអ្វីគួរឲ្យកត់សម្គាល់នោះទេ ចំណែកបរិស្ថាននៅជុំវិញសាលាគឺធម្មតាផងដែរ ។
ដើម្បីបញ្ចៀសកុំឲ្យមានបញ្ហាបន្តទៀត ក្នុងនាមរូបលោកជានាយកវិទ្យាល័យស្នើសូមឲ្យឪពុកម្ដាយរបស់សិស្សទាំង៩នាក់ បន្តមើលថែទាំសុខភាពកូនៗរបស់ខ្លួនឱ្យបានមាំទាំមួយរយៈសិន ចាំឱ្យពួកគេត្រឡប់មករៀនជាធម្មតាវិញ។
លោកវេជ្ជបណ្ឌិតកែវ វណ្ណៈ ប្រធានមន្ទីរសុខាភិបាលខេត្តត្បូងឃ្មុំមានប្រសាសន៍ឲ្យដឹងដែរថា បន្ទាប់ពីមានហេតុការណ៍ខាងលើនេះបានកើតឡើង រូបលោកនិងមន្ត្រីជំនាញបានចុះទៅធ្វើការស្រាវជ្រាវ ដើម្បីរកមូលហេតុពិតហើយ៕
ចែករំលែកព័តមាននេះ