ដង្កូវស៊ីធ្មេញ ឬជំងឺធ្មេញពុក អាចបណ្តាលឲ្យអ្នកជំងឺស្លា.ប់បាន បើសិនជាគាត់មិនបានព្យាបាលឲ្យបានទាន់ពេលវេលា នេះបើតាមការឲ្យដឹងរបស់លោកសាស្ត្រាចារ្យទន្តបណ្ឌិត គាម ប៊ន
ដង្កូវស៊ីធ្មេញ ឬជំងឺធ្មេញពុក អាចបណ្តាលឲ្យអ្នកជំងឺស្លាប់បាន បើសិនជាគាត់មិនបានព្យាបាលឲ្យបានទាន់ពេលវេលា នេះបើតាមការឲ្យដឹងរបស់លោកសាស្ត្រាចារ្យទន្តបណ្ឌិត គាម ប៊ន ឯកទេសផ្នែកទន្តសាស្ត្រ នៃមន្ទីរពេទ្យមិត្តភាពខ្មែរ-សូវៀតដែលបានប្រាប់កោះសន្តិភាពឲ្យដឹង កាលពីពេលថ្មីៗកន្លងមកនេះ ។
លោកសាស្ត្រាចារ្យទន្តបណ្ឌិតបានប្រាប់ទៀតថា ទោះជាជំងឺពុកធ្មេញ មិនអាចបង្កទៅជាជំងឺមហារីកក៏ដោយ ប៉ុន្តែវាក៏អាចបណ្តាលឲ្យមានការឈឺចាប់ខ្លាំងពិបាកទ្រាំ ហើយបើសិនជាប្រើប្រាស់ថ្នាំបំបាត់ការឈឺចាប់ អាចបាត់បានតែមួយរយៈពេលប៉ុណ្ណោះ ។ ជាងនេះទៅទៀត បើសិនជានៅតែពន្យារពេល មិនព្រមមកព្យាបាលទេអាចបណ្តាលឲ្យកើតមានរបូសនៅកន្លែងធ្មេញដែលមានបញ្ហា និងបង្កឲ្យកើតទៅជាអាប់សែ ហើយអាចបណ្តាលឲ្យអ្នកជំងឺស្លាប់បានដោយសារតែមេរោគចូលតាមសរសៃឈាមទៅដល់ស្រោមខួរ ដែលធ្វើឲ្យកើតមានជំងឺរលាកស្រោមខួរក្បាលអាចបណ្តាលឲ្យស្លាប់បង់ជីវិតបានគ្រប់ពេលវេលា ។
ដូចដែលលោកអ្នកបានដឹងខ្លះហើយថា ជំងឺពុកធ្មេញអាចបណ្តាលមកពីការមិនមានអនាម័យមាត់ធ្មេញឲ្យបានល្អ ដូច្នេះដើម្បីការពារកុំឲ្យមានជំងឺពុកធ្មេញ លោកអ្នកត្រូវអនុវត្តតាមវិធីខាងក្រោម៖
-សម្អាតធ្មេញឲ្យបានទៀងទាត់ និងរាល់ពេលទទួលទានអាហាររួច
-ត្រូវសម្អាតកំបៅដែលនៅជាប់នឹងធ្មេញឲ្យបានស្អាតតាមរយៈគ្រូពេទ្យ
-រាល់ពេលទទួលទានអាហាររួចរាល់ត្រូវតែមានអំបោះទាក់អាហារចេញពីធ្មេញ
-ត្រូវប្រើប្រាស់ទឹកខ្ពុរមាត់ជាប្រចាំ
-ចំពោះកុមារត្រូវកាត់បន្ថយការទទួលទានស្ករ និងត្រូវសម្អាតឲ្យបានស្អាតញឹកញាប់ផងដែរ
-ត្រូវមកតាមដានសុខភាពមាត់ធ្មេញឲ្យបានញឹកញាប់ ។
ចំពោះមាត់ធ្មេញនេះចាំបាច់ត្រូវធ្វើការលាងសម្អាត់ជានិច្ចនៅពេលលោកអ្នកទទួនអាហាររួច គឺដើម្បីសុខភាពមាត់ធ្មេញផង និងដើម្បីការប្រាស្រ័យទាក់ទងការងារជាមួយអ្នកដទៃផង ។ ប្រសិនបើមាត់ធ្មេញរបស់លោកអ្នកបញ្ចេញទៅមិនល្អវាជាហេតុនាំឲ្យប៉ះពាល់ដល់ការសន្ទនានោះដោយសារជះក្លិនសម្អុយដល់អារម្មណ៍គេ ៕
ចែករំលែកព័តមាននេះ