រាជធានីភ្នំពេញ ៖ មានករណីនារីម្នាក់ត្រូវបានជនសង្ស័យជាអ្នករត់កង់បីម្នាក់ធ្វើសកម្មភាពភ្ជង់យកកាបូបលុយ និងសម្ភារមួយចំនួនយកទៅបាត់ដោយសុវត្ថិភាព ។ ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលា១០និង១០នាទីយប់ថ្ងៃទី៧ កុម្ភៈ ឆ្នាំ២០២១ នៅចំណុចតាមបណ្តោយផ្លូវ R6…
រាជធានីភ្នំពេញ ៖ មានករណីនារីម្នាក់ត្រូវបានជនសង្ស័យជាអ្នករត់កង់បីម្នាក់ធ្វើសកម្មភាពភ្ជង់យកកាបូបលុយ និងសម្ភារមួយចំនួនយកទៅបាត់ដោយសុវត្ថិភាព ។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលា១០និង១០នាទីយប់ថ្ងៃទី៧ កុម្ភៈ ឆ្នាំ២០២១ នៅចំណុចតាមបណ្តោយផ្លូវ R6 ជិតផ្លូវរថភ្លើង ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។
នារីរងគ្រោះម្នាក់ខាងលើមិនត្រូវបានស្គាល់អត្តសញ្ញាណនោះទេ ។
តាមប្រភពពីនារីរងគ្រោះបានឱ្យដឹងថា មុនពេលកើតហេតុ គាត់ចេញពីធ្វើការនៅម្តុំច្បារអំពៅ ហើយក៏បានហៅកង់បីរបស់ជនសង្ស័យជិះក្នុងគោលបំណងទៅផ្ទះម្តាយមីងនៅខាងក្រោយមន្ទីរពេទ្យកាល់ម៉ែត្រ ។
តាមប្រភពដដែលបានបន្តថា លុះធ្វើដំណើរមកដល់ចំណុចកើតហេតុខាងលើនេះ ស្រាប់តែជនសង្ស័យជាអ្នកបើកម៉ូតូកង់បីបានយកលេសធ្វើជាសុំគាត់ចុះទៅបត់ជើងតូច ពេលនោះបានធ្វើឱ្យរូបគាត់ដែលជិះនៅលើកង់បីតែម្នាក់ឯងមានការភ័យខ្លាចដែរ ប៉ុន្តែនៅពេលឃើញជនសង្ស័យជាអ្នកបើកម៉ូតូកង់បីដើរមកវិញ គាត់ក៏គិតក្នុងចិត្តថាប្រហែលជាអត់មានរឿងអ្វីកើតឡើងទេ តែបែរជាជនសង្ស័យជាអ្នកបើកម៉ូតូកង់បីរូបនោះដកកាំបិតភ្ជង់គំរាមរូបគាត់យកកាបូបលុយតែម្តង ។
តាមប្រភពដដែលបានបន្តទៀតថា ពេលនោះគាត់ភ័យខ្លាំងពេកក៏យកកាបូបលុយ ព្រមទាំងសម្ភារមួយចំនួនទៀតអោយទៅជនសង្ស័យ បន្ទាប់មកជនសង្ស័យក៏បានដេញគាត់ឱ្យចុះពីលើម៉ូតូកង់បី ហើយជនសង្ស័យក៏បើកកង់បីគេចចេញបាត់ពីកន្លែងកើតហេតុ ។ ចំណែករូបគាត់ក៏បានស្រែកឆោឡោឱ្យគេជួយ ប៉ុន្តែមិនអាចដេញតាមទាន់ម៉ូតូកង់បីរបស់ជនសង្ស័យបានឡើយ ។
ក្រោយពេលកើតហេតុ សមត្ថកិច្ចក៏ចុះមកដល់កន្លែងកើតហេតុ និងសាកសួរនារីរងគ្រោះ ដើម្បីកំណត់មុខសញ្ញាជនសង្ស័យ និងស្រាវជ្រាវតាមចាប់ខ្លួនយកមកផ្តន្ទាទោសតាមច្បាប់ ៕
ចែករំលែកព័តមាននេះ