រាជធានីភ្នំពេញ ៖ បន្ទាប់ពីបានផ្អាកជាបណ្តោះអាសន្ននូវការនាំចូលត្រី៤ប្រភេទពីប្រទេសវៀតណាមបានត្រឹមមួយរយៈពេលដ៏ខ្លី ស្រាប់តែក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ជាថ្មីថាក្រសួងនៅតែបន្តអនុញ្ញាតឱ្យនាំចូលត្រី៤ប្រភេទ មានត្រីប្រា ត្រីពោ ត្រីអណ្តែង…
រាជធានីភ្នំពេញ ៖ បន្ទាប់ពីបានផ្អាកជាបណ្តោះអាសន្ននូវការនាំចូលត្រី៤ប្រភេទពីប្រទេសវៀតណាមបានត្រឹមមួយរយៈពេលដ៏ខ្លី ស្រាប់តែក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ជាថ្មីថាក្រសួងនៅតែបន្តអនុញ្ញាតឱ្យនាំចូលត្រី៤ប្រភេទ មានត្រីប្រា ត្រីពោ ត្រីអណ្តែង និងត្រីឆ្តោដដែល ដោយផ្អែកទៅតាមតម្រូវការជាក់ស្តែងក្នុងស្រុក។
យោងតាមសេចក្តីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី៨ កុម្ភៈ នេះបង្ហាញថា កាលថ្ងៃទី៨ មករា ២០២១ កន្លងមកនេះ ក្រសួងកសិកម្ម រុក្ខាប្រមាញ់ និងនេសាទបានចេញសេចក្តីប្រកាសព័ត៌មាន ជូនដំណឹង អំពីការព្រមព្រៀងគ្នាដោយស្មគ្រ័ចិត្ត រវាងសមាគមវារីវប្បករ នៅកម្ពុជា និងអាជីវករនាំចេញ នាំចូលផល ផលិតផលជលផលក្នុងការផ្អាកជាបណ្តោះអាសន្ននូវការនាំចូលត្រីចំនួន៤ប្រភេទ មានត្រីប្រា ត្រីពោ ត្រីអណ្តែង និងត្រីឆ្តោ ពីក្រៅប្រទេស។
ក្រសួងកសិកម្មគូសបញ្ជាក់ថា «ដើម្បីបញ្ចាក់បន្ថែមនូវខ្លឹមសារនៃសេចក្តីប្រកាសព័ត៌មាននេះ ក្រសួងកសិកម្ម រុក្ខាប្រមាញ់ និងនេសាទសូមជម្រាបជូនសាធារណជនថា ៖
១)- ក្រសួងនៅតែបន្តការអនុញ្ញាតឱ្យនាំចូលផល ផលិតផលជលផលជាពិសេសត្រី៤ប្រភេទដូចជា ត្រីប្រា ត្រីពោ ត្រីអណ្តែង និងត្រីឆ្តោ តាមតម្រូវការជាក់ស្តែងក្នុងស្រុក ដោយអនុលោមតាមច្បាប់ និងលិខិតបទដ្ឋានគតិយុត្តជាធរមា។
២)- ក្រសួងនឹងបន្តពិគ្រោះយោបល់ជាមួយសមាគមវារីវប្បករនៅកម្ពុជា អាជីវករនាំចេញ នាំចូលផល ផលិតផលជលផល និងអាជ្ញាធរមានសមត្ថកិច្ចពាក់ព័ន្ធ ដែលជាដៃគូពាណិជ្ជកម្មរបស់កម្ពុជា ដើម្បីកសាងនិងទទួលស្គាល់លិខិតបទដ្ឋានបច្ចេកទេស។
៣)- តាមរយៈយន្តគណៈកម្មការជំរុញវារីវប្បកម្មកម្ពុជា ក្រសួងសហការជាមួយក្រសួងពាក់ព័ន្ធនឹងបន្តដោះស្រាយបញ្ហាប្រឈមរបស់វារីវប្បករ ដើម្បីអភិវឌ្ឍវិស័យវារីវប្បកម្ម និងពង្រឹងសមត្ថភាពប្រកួតប្រជែងរបស់វារីវប្បករស្របតាមគោលការណ៍ ពាណិជ្ជកម្មសេរី ព្រមទាំងធានាដល់ការការពារសុខភាពមនុស្ស សត្វ បរិស្ថាន និងជំរុញកំណើនពាណិជ្ជកម្ម »។
ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទថ្មីៗនេះមានប្រសាសន៍ថា អនុវត្តតាមអនុសាសន៍ដ៏ខ្ពង់ខ្ពស់របស់សម្តេច ក្រសួងបាននិងកំពុងជំរុញបន្ថែមដល់សហគមន៍ កសិករ ផលិតករខ្នាតតូច និងមធ្យម សហការធ្វើការដាំដុះ ចិញ្ចឹមសត្វ និងត្រីជាមួយវិស័យឯកជនតាមរយៈការធ្វើកសិកម្មតាមកិច្ចសន្យា ដើម្បីធានាបាននូវបរិមាណផ្គត់ផ្គង់ទីផ្សារ និងស្ថិរភាពតម្លៃ ព្រមជាមួយការលើកទឹកចិត្ត ជំរុញ គាំទ្រវិស័យឯកជន សហគ្រាសខ្នាតតូច មធ្យម និងដៃគូអភិវឌ្ឍន៍នានា វិនិយោគលើវិស័យកែច្នៃ ដើម្បីធានានូវនិរន្តរភាពនៃការផលិតក្នុងស្រុក ស្ថិរភាពទីផ្សារ បង្កើនតម្លៃបន្ថែម លើកកម្ពស់គុណភាព ស្តង់ដារអនាម័យ និងសុវត្ថិភាព ឆ្លើយតបតាមលក្ខខណ្ឌតម្រូវភូតគាមអនាម័យរបស់ទីផ្សារទាំងក្នុងតំបន់ និងអន្តរជាតិ៕
ចែករំលែកព័តមាននេះ