ខេត្តស្វាយរៀង ៖ ឯកឧត្តមម៉ែនវិបុលអភិបាលនៃគណៈអភិបាលខេត្តបានអញ្ជើញចុះពិនិត្យស្ថានភាព និងកម្លាំងសមត្ថកិច្ចតាមច្រកទ្វាព្រំដែន ដើម្បីទប់ស្កាត់ការឆ្លងដែនខុសច្បាប់ក្នុងរយៈពេល៤ថ្ងៃ នៃបុណ្យចូលឆ្នាំចិន-វៀតណាម ដោយអនុវត្តតាមបទបញ្ជាដ៏ខ្ពង់ខ្ពស់របស់សម្តេចបអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃកម្ពុជា ក្នុងទិសដៅទប់ស្កាត់ការរីករាលដាលនៃជំងឺកូវីដ-១៩។
នៅព្រឹកថ្ងៃទី០៦ ខែកុម្ភៈ ឆ្នាំ២០២១នេះ ឯកឧត្តមម៉ែន វិបុល អភិបាលនៃគណៈអភិបាលខេត្ត ប្រធានគណៈបញ្ជាការឯកភាពរដ្ឋបាលខេត្ត និងជាប្រធានគណៈកម្មការប្រយុទ្ធប្រឆាំងនឹងជំងឺកូវីដ-១៩ ខេត្តស្វាយរៀង បានដឹកនាំក្រុមការងារចុះពិនិត្យស្ថានភាពតាមនៅបណ្តាប៉ុស្តិ៍ការពារព្រំដែន និងច្រកទ្វារព្រំដែន ក្នុងភូមិសាស្ត្រក្រុងបាវិត រួមមានប៉ុស្តិ៍ការពារព្រំដែនធ្លក ច្រកការពារព្រំដែនកំពង់ស្ពាន ច្រកទ្វារព្រំដែនអន្តរជាតិបាវិត ក្នុងនោះបានអញ្ជើញពិនិត្យទីតាំងបន្ទប់ដាក់ម៉ាស៊ីនវាស់កំដៅ ពេលភ្ញៀវឆ្លងកាត់ និងជួបសំណេះសំណាលជាមួយកងកម្លាំងវរៈសេនាតូចការពារព្រំដែន ដើម្បីពង្រឹងវិធានការបង្ការទប់ស្កាត់ការរីករាលដាលនៃជំងឺកូវីដ-១៩ ។
ការចុះពិនិត្យនេះ ក៏មានការអញ្ជើញចូលរួមពីឯកឧត្តមអភិបាលរងខេត្ត លោកនាយករដ្ឋបាលសាលាខេត្តលោកស្នងការនគរបាលខេត្ត លោកមេបញ្ជាការរងកងរាជអាវុធហត្ថខេត្តលោកមេបញ្ជាការរងតំបន់ប្រតិបត្តិការសឹករងស្វាយរៀង លោកប្រធានមន្ទីរ អង្គភាពពាក់ព័ន្ធលោកអភិបាលក្រុងបាវិតមន្ត្រីចត្តាឡីស័ក និងកងកម្លាំងឈជើងនៅតាមខ្សែបន្ទាត់ព្រំដែនជាច្រើនរូបទៀត ។
ឯកឧត្តមម៉ែន វិបុល បានមានប្រសាសន៍ថា ដើម្បីទប់ស្កាត់ការឆ្លងរាលដាលមេរោគកូវីដ-១៩ រដ្ឋបាលខេត្តបានដាក់កម្លាំងសមត្ថកិច្ចឈជើងតាមប៉ុស្ត៍ ច្រកទ្វាព្រំដែនទូទាំងខេត្តបន្ថែមសរុប៥៨ទីតាំង ដោយប្រើកម្លាំងនគរបាលវរៈការពារព្រំដែនសហការជាមួយកងរាជអាវុធហត្ថខេត្ត ក្រុងស្រុក និងកងយោធពលខេមរភូមិន្ទវរៈការពារព្រំដែននៃប្រតិបត្តិការសឹករងស្វាយរៀង សរុប២៣១នាក់ ក្នុងគោលបំណងទប់ស្កាត់ការឆ្លងដែនខុសច្បាប់ នៅក្នុងពេលបុណ្យចូលឆ្នាំចិន និងវៀតណាមខាងមុខនេះ ។
មានប្រសាសន៍នៅក្នុងដំណើរចុះពិនិត្យស្ថានភាពតាមបណ្តាច្រកព្រំដែនក្នុងភូមិសាស្ត្រក្រុងបាវិតនាថ្ងៃនេះ ឯកឧត្ដមអភិបាលខេត្ត បានថ្លែងនូវការកោតសរសើរចំពោះមន្ត្រីចត្តាឡីស័ក សមត្ថកិច្ច និងមន្ត្រីជំនាញពាក់ព័ន្ធទាំងអស់ ដែលបានអនុវត្តតួនាទីក្នុងការការពារសន្តិសុខ សុវត្ថិភាព សណ្ដាប់ធ្នាប់នៅតាមព្រំដែន និងការពង្រឹងកិច្ចសហប្រតិបត្តិការល្អប្រសើរជាមួយភាគីវៀតណាម ក្នុងការសម្របសម្រួលលើការដឹកជញ្ជូននិងផ្លាស់ប្តូរទំនិញឆ្លងកាត់ព្រំដែន បញ្ចៀសបាននូវការកកស្ទះ ជាមួយនិងការប្រកាន់ខ្ជាប់នូវការអនុវត្តតាមវិធានការក្រសួងសុខាភិបាលបានយ៉ាងល្អប្រសើរ។
ឯកឧត្ដមអភិបាលខេត្ត ក៏បានធ្វើការផ្ដាំផ្ញើដល់អាជ្ញាធរដែនដី កងកម្លាំង និងមន្ត្រីជំនាញពាក់ព័ន្ធទាំងអស់ ត្រូវបន្តពង្រឹងការចេញល្បាតតាមភូមិសាស្ត្រខ្សែបន្ទាត់ព្រំដែន ដើម្បីបង្ការទប់ស្កាត់ការលួចឆ្លងដែនខុសច្បាប់ ហើយក្នុងករណីមានប្រជាពលរដ្ឋឆ្លងដែនចូលមកកម្ពុជា ត្រូវធ្វើចត្តាឡីស័កជាដាច់ខាត នៅទីតាំងដែលរដ្ឋបាលខេត្តបានរៀបចំរួចជាស្រេច ដោយមិនត្រូវឲ្យនរណាម្នាក់ឆ្លងកាត់ព្រំដែនដោយមិនបានត្រួតពិនិត្យនិងមិនបានធ្វើចត្តាឡីស័កនោះទេ ជារួមគឺត្រូវតែបង្ខំឲ្យធ្វើចត្តាឡីស័កជាដាច់ខាត ដោយគ្មានការលើកលែងនោះឡើយ។
ជាមួយនេះ ឯកឧត្ដមអភិបាលខេត្ត ក៏បានអំពាវនាវដល់បងប្អូនប្រជាពលរដ្ឋទាំងអស់ ត្រូវបន្តប្រុងប្រយ័ត្ន និងការពារខ្លួនជានិច្ចពីជំងឺកូវីដ-១៩ ដោយត្រូវប្រកាន់ខ្ជាប់នូវអនាម័យឧស្សាហ៍លាងសម្អាតដៃជាមួយសាប៊ូ ជែល ឬអាល់កុលជាប្រចាំ ហើយសូមកុំធ្វើដំណើរឆ្លងដែនបើមិនមានការចាំបាច់ ។
សូមបញ្ជាក់ថា ដើម្បីពង្រឹងវិធានការត្រួតពិនិត្យការចេញចូល ជាពិសេសការទប់ស្កាត់ការលួចឆ្លងដែនខុសច្បាប់ ក្នុងគោលដៅបង្ការទប់ស្កាត់ការឆ្លងរាលដាលនៃជំងឺកូវីដ១៩ រដ្ឋបាលខេត្ត បានរៀបចំគោលដៅប្រចាំការ និងល្បាតការពារនៅតាមខ្សែបន្ទាត់ព្រំដែនចំនួន៥៨គោលដៅ បន្ថែមទៀតផងដែរដោយមានកម្លាំងសរុប២៣១នាក់ ៕
ចែករំលែកព័តមាននេះ