រាជធានីភ្នំពេញ ៖ អគ្គិភ័យបាន និងកំពុងឆាបឆេះកន្លែងស្តុកអាល់កុល និងប្រេងបូមមួយកន្លែង ស្ថិតនៅតាមផ្លូវរថភ្លើង ក្នុងភូមិត្រាញ់ត្របាញ់ សង្កាត់ភ្លើងឆេះរទេះ ខណ្ឌកំបូល បង្កឲ្យមានការភ្ញាក់ផ្អើល…
រាជធានីភ្នំពេញ ៖ អគ្គិភ័យបាន និងកំពុងឆាបឆេះកន្លែងស្តុកអាល់កុល និងប្រេងបូមមួយកន្លែង ស្ថិតនៅតាមផ្លូវរថភ្លើង ក្នុងភូមិត្រាញ់ត្របាញ់ សង្កាត់ភ្លើងឆេះរទេះ ខណ្ឌកំបូល បង្កឲ្យមានការភ្ញាក់ផ្អើល កាលពីវេលាម៉ោង៩និង៣០នាទីព្រឹក ថ្ងៃទី៦ ខែកុម្ភៈ ឆ្នាំ២០២១ យ៉ាងសន្ធោសន្ធៅ ។
ដោយពុំទាន់ដឹងថា មូលហេតុដែលនាំឲ្យមានការឆាបឆេះនេះ បណ្ដាលមកពីឆ្លងចរន្តអគ្គិសនី ឬមានអ្នកដុតនោះទេ ប៉ុន្តែទំហំនៃការឆាបឆេះនេះ ពិតជាមានទ្រង់ទ្រាយធំ ដោយមានអណ្ដាតភ្លើងក្រហមឆ្អៅ និងផ្សែងហុយឡើងលើយ៉ាងឃ្មួលខ្មាញ់ ហើយក៏ពុំទាន់ដឹងថា មានអ្នកស្លាប់ ឬរងរបួសដែរឬអត់នៅឡើយ ។
តាមប្រភពពីប្រជាពលរដ្ឋបានឲ្យដឹងថា កន្លែងស្តុកអាល់កុល និងប្រេង នៅមុនពេលមានការឆាបឆេះកើតឡើង ពួកគាត់បានឮសូរជនជាតិចិនដែលធ្វើការនៅក្នុងកន្លែងខាងលើនេះ ស្រែកឡូឡាឈ្លោះប្រកែកគ្នា ប៉ុន្តែពួកគាត់ពុំបានចាប់អារម្មណ៍មើលនោះទេ លុះមួយសន្ទុះក្រោយមក ក៏ស្រាប់តែមានអគ្គិភ័យឆាបឆេះឃ្លាំងយ៉ាងសន្ធោសន្ធៅ បែបនេះតែម្ដង ។
ខណៈនោះកម្លាំងអាជ្ញាធរ និងសមត្កិច្ចខណ្ឌកំបូលបានចុះទៅអន្តរាគមន៍ ហើយក៏មានរថយន្តពន្លត់អគ្គិភ័យជាច្រើនគ្រឿងបានទៅធ្វើសកម្មភាពបាញ់ពន្លត់ ប៉ុន្តែភ្លាមៗនោះភ្លើងពុំបានថមថយឡើយ នៅតែបន្តការឆេះខ្លាំងដដែល ព្រោះនៅកន្លែងស្តុកនេះសុទ្ធតែទឹកអាល់កុល ប្រេងម៉ាស៊ីន និងប្រេងបូមរាប់ពាន់លីត្រ ៕
ចែករំលែកព័តមាននេះ