រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅរសៀលថ្ងៃទី៤ ខែកុម្ភៈ បានចេញបទបញ្ជាទៅកាន់អាជ្ញាធរខេត្តជាប់ព្រំដែនកម្ពុជា-វៀតណាម និងកងកម្លាំងប្រដាប់អាវុធគ្រប់ប្រភេទ…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅរសៀលថ្ងៃទី៤ ខែកុម្ភៈ បានចេញបទបញ្ជាទៅកាន់អាជ្ញាធរខេត្តជាប់ព្រំដែនកម្ពុជា-វៀតណាម និងកងកម្លាំងប្រដាប់អាវុធគ្រប់ប្រភេទ គឺត្រូវពង្រាយតាមព្រំដែនជាបន្ទាន់ដើម្បីទប់ស្កាត់នូវការធ្វើចរាចរណ៍មនុស្សដែលមិនបានធ្វើចត្តាឡីស័កបានត្រឹមត្រូវ ដើម្បីការពារកុំឲ្យមានការឆ្លងកូវីដ-១៩ ណាមួយចូលមកក្នុងប្រទេសកម្ពុជា ។
បទបញ្ជារបស់សម្តេចតេជោ នាយករដ្ឋមន្ត្រីនេះធ្វើឡើង ក្រោយមានស្ថានភាពផ្ទុះជំងឺកូវីដ-១៩ឆ្លងក្នុងសហគមន៍នៅប្រទេសវៀតណាម និងបណ្តាខេត្តមួយចំនួនរបស់វៀតណាមដែលមានព្រំដែនជិតប្រទេសកម្ពុជា ជាពិសេសនោះ គឺថ្នាក់ដឹកនាំមានការព្រួយបារម្ភអំពីមនុស្សដែលអាចនឹងធ្វើចរាចរណ៍ពីកម្ពុជាទៅវៀតណាម ឬពីវៀតណាមចូលកម្ពុជា នាឱកាសបុណ្យចូលឆ្នាំប្រពៃណីចិន-វៀតណាមដែលនឹងឈានចូលមកដល់នៅសប្តាហ៍ក្រោយនេះ ។
នៅក្នុងសារសម្លេងមានរយៈពេលជាង ១៤ នាទី សម្តេចតេជោ បានផ្ញើជូនថ្នាក់ដឹកនាំគ្រប់លំដាប់ថ្នាក់ ក្នុងជួរគណបក្ស ទាំងក្នុងរាជរដ្ឋាភិបាល ទាំងព្រឹទ្ធសភា ទាំងរដ្ឋភា ជាពិសេសអាជ្ញាធរតាមខេត្តនិងកងកម្លាំងប្រដាប់អាវុធនៅតាមខេត្ត ទាំងខេត្តនៅជាប់ព្រំដែនកម្ពុជា-ថៃ ទាំងខេត្តជាប់ព្រំដែនកម្ពុជា – វៀតណាម ឲ្យបានជ្រាបថា កន្លងទៅនេះ យើងបានខិតខំទប់ស្កាត់នូវការរីករាលដាលកូវីដ ១៩ ពីប្រទេសថៃមកកាន់កម្ពុជារបស់យើង ដោយយើងរឹតបន្តឹងការធ្វើចរាចរណ៍មនុស្សតាមរយៈបងប្អូនពលករកម្ពុជារបស់យើងត្រឡប់ចូលមកក្នុងផ្ទៃប្រទេស ។
សម្តេចបានបន្តថា ឥឡូវនេះគឺនៅទិសខាងលិច នៅក្នុងប្រទេសថៃ ការឆ្លងចំពោះកូវីដ-១៩នៅមានសភាពធ្ងន់ធ្ងរនៅឡើយ ដែលតម្រូវឲ្យយើងត្រូវរៀបចំទីកន្លែងដើម្បីធ្វើចត្តាឡីស័កបន្ថែមទៀត ដែលរហូតមកដល់ពេលនេះមានពលករខ្មែរមកពីប្រទេសថៃ ជាង ៨ ពាន់នាក់ ហើយដែលនឹងមកជាបន្តបន្ទាប់ទៀត ។
«ដោយសារតែការមិនទាន់បានធូរស្រាលនៅផ្នែកខ្លះនៅក្នុងប្រទេសថៃដែលឆ្លងក្នុងសហគមន៍យើងមិនអាចបោះបង់ចោលនូវការធ្វើចត្តាឡីស័ករយៈពេល ១៤ ថ្ងៃបានទេ ។ ទិសខាងលិច នៃមាតុប្រទេសរបស់យើងដែលជាប់នឹងប្រទេសថៃ ត្រូវបានរៀបចំបានល្អ ជាមួយនឹងការខិតខំរបស់អាជ្ញាធរខេត្តទាំងអស់ដែលនៅជាប់ព្រំដែនកម្ពុជា-ថៃ ដោយមានការគាំទ្រពីកងកម្លាំងប្រដាប់អាវុធគ្រប់ប្រភេទ ក៏ដូចជាផ្នែកសុខាភិបាល » ។ សម្តេចបានបញ្ជាក់ ។
សម្តេចតេជោ ហ៊ុន សែន បានបន្តទៀតថា «ប៉ុន្តែឥឡូវនេះការព្រួយបារម្ភធំបំផុតរបស់យើង គឺការផ្ទុះឡើងនូវការឆ្លងក្នុងសហគមន៍ក្នុងប្រទេសវៀតណាម ដែលចាប់ផ្តើមពីភាគខាងជើង ភាគកណ្តាល ហើយឥឡូវនេះគឺឈានមកដល់ភាគខាងត្បូង ដែលមេរោគនោះ តាមព័ត៌មានដែលយើងទទួលបាន មានការបម្លែងភេទទៀតផង។ នេះជាការកង្វល់យ៉ាងធំ ដែលខ្ញុំសូមប្រកាសឲ្យបណ្តាខេត្តដែលនៅជាប់ព្រំដែនកម្ពុជា-វៀតណាមទាំងអស់ ចាប់តាំងពីខេត្តកំពត រហូតដល់ខេត្តរតនគិរី ចាត់វិធានការណ៍បន្ទាន់ ទប់ស្កាត់កុំឲ្យមានការឆ្លងទៅឆ្លងមករបស់ប្រជាជន ទាំងប្រជាជនកម្ពុជានិងប្រជាជនវៀតណាម ។ ប្រជាជនកម្ពុជាដែលឆ្លងចូលទៅក្នុងប្រទេសវៀតណាម ក៏ត្រូវធ្វើចត្តាឡីស័ក ដោយអាជ្ញាធរវៀតណាម ដូចដែលបានធ្វើកន្លងទៅ ។ ឯប្រជាជនវៀតណាមដែលឆ្លងចូលមកកម្ពុជាក៏ត្រូវតែធ្វើចត្តាឡីស័ក នៅក្នុងប្រទេសកម្ពុជាផងដែរ ។ ប្រជាជនកម្ពុជាដែលចេញពីប្រទេសវៀតណាមចូលមកក្នុងកម្ពុជា ក៏ត្រូវធ្វើចត្តាឡីស័កផងដែរ ។ ប្រការនេះពឹងពាក់ទាំងស្រុងទៅលើអាជ្ញាធរអភិបាលខេត្តដឹកនាំការងារនេះ ជាមួយនឹងកងកម្លាំងប្រដាប់អាវុធឈរជើង បិទខ្ទប់ឲ្យខានតែបានតាមច្រករបៀងទាំងនៅតាមព្រំដែន និងត្រួតពិនិត្យនៅខាងក្នុងឲ្យបានហ្មត់ចត់ ហើយតម្រូវឲ្យរៀបចំតំបន់ធ្វើចត្តាឡីស័កឲ្យបានរឹងមាំបំផុត » ។
ប្រមុខដឹកនាំរាជរដ្ឋាភិបាលបានបញ្ជាក់ថា «យើងមិនអាចយោគយល់អព្យាស្រ័យបានចំពោះនរណាម្នាក់ឡើយ … ដូច្នេះចត្តាឡីស័កត្រូវតែធ្វើឲ្យបាន១៤ ថ្ងៃ ដោយខានពុំបាន។ ដូច្នេះ ខ្ញុំដាក់ចេញបទបញ្ជាបន្ទាន់ ឲ្យអាជ្ញាធរខេត្តនៅតាមព្រំដែន ជាមួយនឹងស្ថាប័នមានការពាក់ព័ន្ធទាំងអស់សហការគ្នា ហើយក្រសួងសុខាភិបាលត្រូវផ្គត់ផ្គង់ទៅបណ្តាខេត្តដែលនៅជាប់ព្រំដែនកម្ពុជា-វៀតណាម » ។ សម្តេចបានមានប្រសាសន៍បន្ថែមថា បណ្តាខេត្តដែលនៅជាប់ ព្រំដែនកម្ពុជា-វៀតណាម ត្រូវតែពិនិត្យថាតើ មានអ្វីជាការខ្វះខាតត្រូវលើកសំណើរស្នើឡើងមកក្រសួងសុខាភិបាល ដើម្បីនឹងជួយផ្តត់ផ្គង់រៀបចំកន្លែងធ្វើចត្តាឡីស័ក ។ ត្រូវទាក់ទងអាជ្ញាធរខេត្តជាប់គ្នា ដើម្បីជួយទប់ស្កាត់ប្រជាជនឆ្លងពីវៀតណាមមកកម្ពុជា ឬពីកម្ពុជាឆ្លងកាត់ទៅវៀតណាម ។
«យើងរួមគ្នាទប់ស្កាត់បែបនេះទើបអាចជៀសវាងបាននូវចរាចរណ៍នូវជំងឺកុវីដ ១៩ ទោះបីប្រភេទចាស់ ឬប្រភេទថ្មីក៏ដោយ»។ អ្វីដែលជាការព្រួយបារម្ភគឺអាចនឹងមានការឆ្លងទៅឆ្លងមក នៅក្នុងរយៈពេលនៃការចូលឆ្នាំចិន ចូលឆ្នាំវៀតណាមខាងមុខនេះដែលអាចអាជ្ញាធរត្រូវតែពង្រាយកម្លាំងជាបន្ទាន់ដើម្បីទប់ស្កាត់ ទៅលើការចេញចូលរបស់ប្រជាជន ទៅតាមច្រករបៀបនានា» ។ នេះជាការបញ្ជាក់របស់ សម្តេចតេជោ បញ្ជាក់ ។ យ៉ាងណាមិញ កម្ពុជាយើង នៅបន្តការសម្របសម្រួលនៅលើការដឹកទំនិញ ទៅមក ដូចដែលបានព្រមព្រៀងគ្នាកាលពីខែមីនា ឆ្នាំ២០២០ ដោយមិនធ្វើឲ្យមានការរាំងស្ទះពាណិជ្ជកម្មនិងដឹកទំនិញឆ្លងដែននោះទេ ។ តែយើងត្រូវធ្វើការរឹតបន្តឹងមនុស្សធ្វើការឆ្លងកាត់ព្រំដែន ដោយមិនបានធ្វើចត្តាឡីស័ក ប្រជាជនខ្មែរយើងទៅវៀតណាម ត្រូវចាំបាច់ធ្វើចត្តាឡីស័ក ប្រជាជនវៀតណាមចូលកម្ពុជា ។
សម្តេចតេជោ មានប្រសាសន៍បន្ថែមថា «នេះជាវិធានការបន្ទាន់ដើម្បី ឆ្លើយតបជាមួយនឹងសភាពការណ៍ ដែលកំពុងហុំព័ទ្ធយើង ពីទិសខាងលិច គឺព្រំដែនកម្ពុជា-ថៃនិងទិសខាងកើត គឺព្រំដែនកម្ពុជា-វៀតណាម ។ ប្រសិនបើយើងមានការធ្វេសប្រហែស ប្រទេសយើងនឹងខ្ទេចខ្ទាំទៅដោយកូវីដ ១៩ ដែលរុញច្រានពីប្រទេសថៃមកផង ពីរុញច្រានពីប្រទេសវៀតណាមមកផង ។ ខ្ញុំដាក់ចេញបញ្ជាយ៉ាងម៉ឹងម៉ាត់ឲ្យកម្លាំងប្រដាប់អាវុធ ជាពិសេសគឺនគរបាលការពារព្រំដែន កងទ័ពជើងគោក ដែលរួមមានភូមិភាគជាប់ព្រំដែនវៀតណាម ត្រូវចាត់វិធានការណ៍ជាបន្ទាន់ដើម្បីនឹងរួមជាមួយនឹងកម្លាំងប្រដាប់អាវុធផ្សេងទៀត មានទាំងនគរបាលនិងអាវុធហត្ថ ដើម្បីត្រួតពិនិត្យឲ្យបានតឹងរ៉ឹងបំផុតនៅតាមព្រំដែនកម្ពុជា-វៀតណាម » ។
ក្រសួងសុខាភិបាលត្រូវធ្វើការជាមួយអាជ្ញាធរខេត្តរៀបចំចត្តាឡីស័កនៅតាមបណ្តាខេត្តជាប់ព្រំដែនកម្ពុជា-វៀតណាម ឲ្យបានត្រឹមត្រូវ ដូចដែលបានធ្វើនៅតាមបណ្តាខេត្តជាប់ព្រំដែនកម្ពុជា-ថៃ នៅទិសខាងលិចប្រទេសនោះ ។
«ទទួលបាននូវបទបញ្ជានេះ អាជ្ញាធរខេត្តដែលនៅជាប់ព្រំដែនកម្ពុជា-វៀតណាម ត្រូវតែពង្រឹងបន្ទាន់នូវសភាពការណ៍នូវវិធានការណ៍ទាំងឡាយដែលខ្ញុំបានដាក់ចេញ ព្រោះជាវិធានការការពារសុវត្ថិភាពប្រជាពលរដ្ឋយើង ឲ្យចេញផុតអំពីគ្រោះមហន្តរាយនៃការឆ្លងចូលដល់សហគមន៍ ។ តាមព្រំដែនថៃធ្វើបានល្អ តែមិនទាន់មានវិធានការម៉ឹងម៉ាត់តាមព្រំដែនកម្ពុជា-វៀតណាម ។
«នៅតាមព្រំដែនកម្ពុជា-វៀតណាម យើងមិនមានកង្វល់ច្រើនពេក ដោយសារយើងមិនមានពលករយើងនៅក្នុងប្រទេសវៀតណាមទេ ។ តែអ្វីដែលជាការកង្វល់របស់យើង គឺនៅជិតពេលចូលឆ្នាំចិន-វៀតណាមនេះ អាចនឹងមានពលរដ្ឋកម្ពុជាឆ្លងទៅវៀតណាម និងអណិជនវៀតណាម ដែលរស់នៅក្នុងប្រទេសកម្ពុជា ឆ្លងទៅវៀតណាម ហើយក៏ឆ្លងចូលមកកម្ពុជាវិញ ។ នេះគឺជារឿងដែលយើងត្រូវប្រុងប្រយ័ត្ន ហើយត្រូវតែដោះស្រាយបញ្ហានេះជាបន្ទាន់ ។ សូមអាជ្ញាធរខេត្តចាត់វិធានការពង្រាយកម្លាំងបន្ទាន់នៅតាមព្រំដែនកម្ពុជា-វៀតណាម» ។
យ៉ាងណាមិញ សម្តេចបានបញ្ជាក់ថា សម្រាប់កងទ័ពជើងគោក ត្រូវចេញបទបញ្ជារទៅចំពោះកងទ័ពនៅតាមព្រំដែនឲ្យដើរល្បាតឲ្យបានតឹងរ៉ឹង តែមិនត្រូវបោះតង់ ឬដាក់ពង្រាយកងទ័ពនៅតំបន់មិនដាច់ស្រេចជាមួយប្រទេសវៀតណាមនោះទេ ដើម្បីបញ្ជៀសនូវការភ័ន្តច្រឡំជាមួយនឹងមិត្តរបស់យើង ៕
ចែករំលែកព័តមាននេះ