ភ្នំពេញ៖ នៅថ្ងៃទី៣ ខែកុម្ភៈ ឆ្នាំ២០២១ សម្តេចតេជោ នាយករដ្ឋមន្ត្រី ហ៊ុន សែន បានចេញសេចក្តីសម្រេច ស្តីពីការបង្កើតក្រុមការងារអន្តរក្រសួងគ្រប់គ្រងការអនុវត្តយុទ្ធសាស្ត្រ…
ភ្នំពេញ៖ នៅថ្ងៃទី៣ ខែកុម្ភៈ ឆ្នាំ២០២១ សម្តេចតេជោ នាយករដ្ឋមន្ត្រី ហ៊ុន សែន បានចេញសេចក្តីសម្រេច ស្តីពីការបង្កើតក្រុមការងារអន្តរក្រសួងគ្រប់គ្រងការអនុវត្តយុទ្ធសាស្ត្រ និងកិច្ចប្រតិបត្តិការចាក់វ៉ាក់សាំងកូវីដ១៩។ ក្រុមការងារថ្មីនេះ មានសមាសភាព ១៧រូប ដឹកនាំដោយលោក ម៉ម ប៊ុនហេង រដ្ឋមន្ត្រីក្រសួងសុខាភិបាល អមដោយអនុប្រធាន ៤រូប ដែលជារដ្ឋលេខាធិការក្រសួងសុខាភិបាល ២រូប រដ្ឋលេខាធិការក្រសួងការពារជាតិ ១រូប និងរដ្ឋលេខាធិការក្រសួងមហាផ្ទៃ ១រូប។ ចំណែកសមាជិក មានចំនួន ១២រូប។
ការសម្រេចបង្កើតក្រុមការងារអន្តរក្រសួងគ្រប់គ្រងការអនុវត្តយុទ្ធសាស្ត្រ និងកិច្ចប្រតិបត្តិការចាក់វ៉ាក់សាំងកូវីដ១៩ នាពេលនេះ បានធ្វើឡើងភ្លាមៗ ក្រោយពីរដ្ឋមន្ត្រីការពារជាតិ សម្តេច ទៀ បាញ់ និងលោក វ៉ាង វិនធាន ឯកអគ្គរដ្ឋទូតចិន ប្រចាំកម្ពុជា បានជួបសំណេះសំណាលជាមួយក្រុមគ្រូពេទ្យ ដែលជាអ្នកចាក់វ៉ាក់សាំងបង្ការជំងឺកូវីដ១៩ នៅមន្ទីរពេទ្យទាហាន ឬពេទ្យព្រះកេតុមាលា នារសៀលថ្ងៃទី៣ ខែកុម្ភៈ ឆ្នាំ២០២១។
ក្នុងពិធីជួបជុំនោះ ក៏មានការបង្ហាញឡានសម្រាប់ដឹកជញ្ជូនវ៉ាក់សាំង និងទូសម្រាប់រក្សាទុកវ៉ាក់សាំងកូវីដ១៩ របស់ចិនផងដែរ។ វ៉ាក់សាំងកូវីដ១៩ របស់ចិន ចំនួន ៦០ម៉ឺនដូស នឹងមកដល់ភ្នំពេញ នៅចុងសប្តាហ៍នេះ។ នេះបើតាមការបញ្ជាក់របស់ឯកអគ្គរដ្ឋទូតចិន ប្រចាំកម្ពុជា៕
ចែករំលែកព័តមាននេះ