ខេត្តមណ្ឌលគិរី ៖ បន្ទាប់ពីមានការយល់ព្រមពីសម្ដេចតេជោ ហ៊ុន សែន ជុំវិញការអនុញ្ញាតឱ្យក្រសួងកសិកម្ម រុក្ខាប្រម៉ាញ់ និងនេសាទ រួមជាមួយអាជ្ញាធរខេត្តមណ្ឌលគិរី សម្រេចធ្វើការនិរាករណ៍លើវិញ្ញាបនប័ត្រសម្គាល់អចលនវត្ថុដែលត្រូវចេញនាពេលកន្លងមក…
ខេត្តមណ្ឌលគិរី ៖ បន្ទាប់ពីមានការយល់ព្រមពីសម្ដេចតេជោ ហ៊ុន សែន ជុំវិញការអនុញ្ញាតឱ្យក្រសួងកសិកម្ម រុក្ខាប្រម៉ាញ់ និងនេសាទ រួមជាមួយអាជ្ញាធរខេត្តមណ្ឌលគិរី សម្រេចធ្វើការនិរាករណ៍លើវិញ្ញាបនប័ត្រសម្គាល់អចលនវត្ថុដែលត្រូវចេញនាពេលកន្លងមក ហើយមិនមានភាពប្រក្រតីជាន់ក្នុងភូមិសាស្ត្រ ដីអភិរក្ស ឬក៏ដីការពារ ជាពិសេសដីដែលគ្រប់គ្រងដោយក្រសួងកសិកម្ម ដែលរាជរដ្ឋាភិបាលផ្តល់ឲ្យក្រុមហ៊ុនអភិវឌ្ឍន៍ដាំដើមស្រល់ កាលពីពេលថ្មីៗនេះ មហាជនកំពុងរង់ចាំមើលថា តើនរណាខ្លះមានការពាក់ព័ន្ធរំលោភយកនោះ? ព្រោះមន្ទីររៀបចំដែនដី នគររូបនីយកម្ម សំណង់ និងសុរិយោដីខេត្តមណ្ឌលគិរី ធ្លាប់បានចេញវិញ្ញាបនប័ត្រដីចំការស្រល់នៅតំបន់ព្រះមហាក្សត្រដាំដើមស្រល់កាលអំឡុងឆ្នាំ២០០៥ ក្នុងភូមិអូរស្ពាន សង្កាត់ ស្ពានមានជ័យ ក្រុងសែនមនោរម្យ ហើយក៏ត្រូវថ្នាក់លើសម្រេចនិរាករណ៍ចោលចំនួន ៦ ប្លង់កន្លងទៅនេះ។ មហាជនយល់ថា មិនគួរថ្លើមពាសមេឃយកដីចម្ការស្រល់របស់រដ្ឋធ្វើប្លង់កម្មសិទ្ធិឱ្យឯកជនទេ? អស់លោកសង្ស័យស៊ីធំណាស់មើលទៅ?
យោងតាមស្មារតីអង្គប្រជុំនៅសាលាក្រុងសែនមនោរម្យ ថ្ងៃទី ១៧ ខែវិច្ឆិកា ឆ្នាំ២០២០ លោក សុង ឃាង ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តមណ្ឌលគិរី បានស្នើដល់លោក ម៉ៅ ចម្រើន ដែលជាប្រធានមន្ទីររៀបចំដែនដី នគររូបនីកម្ម និងសំណង់ខេត្តមណ្ឌលគិរី បង្ហាញពីទីតាំងដីចំនួន៦កន្លែង ដែលត្រូវបានថ្នាក់ក្រសួង សម្រេចធ្វើការនិរាករណ៍ចោល ដោយសារតែដីនោះបានរំលោភដល់ដីដែនគ្រប់គ្រងដោយក្រសួងកសិកម្ម ឬហៅថា ដីចំការស្រល់ស្ដេច។ តាមមហាជនថា ពិតជាថ្លើមធំណាស់ រំលោភយកដីចម្ការស្រល់របស់រដ្ឋបែបនេះ ទាំងអ្នកចេញប័ណ្ណកម្មសិទ្ធិ ក៏ថ្លើមខ្មៅពាសមេឃដែរ ត្រូវតែផ្តន្ទាទោស។
នៅក្នុងកិច្ចប្រជុំដ៏តានតឹងនោះ លោក សុង ឃាង បានទាមទារដល់លោក ម៉ៅ ចម្រើន បង្ហាញប្លង់ទាំង៦ទីតាំង ដើម្បីបង្កើតគណៈកម្មការត្រួតពិនិត្យ និងអនុវត្តតាមបញ្ជារបស់ថ្នាក់ដឹកនាំ។ ក្នុងករណីនេះ លោកសុង ឃាង បានកត់សម្គាល់ថា បើសិនជាការអនុវត្តវិធានការច្បាប់ មិនទាន់ពេលវេលានោះទេ ដីនៅតំបន់ខាងលើត្រូវប្រឈមនឹងការបាត់បង់កាន់តែច្រើន ត្បិតសព្វថ្ងៃ សំណង់នានាត្រូវបានសាងសង់យ៉ាងព្រោងព្រាត ហើយមួយភាគធំគឺសង់នៅក្នុងដីដែលគ្រប់គ្រងដោយក្រសួងកសិកម្ម ជាពិសេសគឺដីចម្ការស្រល់របស់ព្រះមហាក្សត្រតែម្ដង។ តាមមតិមហាជនសំដែងចេញថា គួរតែនាំយក ម៉ៅ ចម្រើន ចេញពីខេត្ត ទើបអាចយកមកវិញបានដីចម្ការស្រល់នេះ ។
ប្រធានមន្ទីរកសិកម្មខេត្តមណ្ឌលគិរី បានសង្កត់ធ្ងន់ថា ការស្នើចុះបញ្ជីដីក្រុមហ៊ុនដាំស្រល់វូជីសាន និងក្រុមហ៊ុនហូលីង តាំងពីឆ្នាំ២០១៧ ការសុំដំណើរការចុះបញ្ជីនៅតែចុះមិនបាន ធ្វើមិនចេញ តែខាងមន្ទីរកសិកម្មនៅតែមិនទាន់ទទួលរបាយការណ៍ អំពីមូលហេតុនៃការចុះបញ្ជីដីក្រុមហ៊ុនទាំងពីរខាងលើនេះ តើមានបញ្ហាអ្វី? ទើបរយៈពេល៣-៤ឆ្នាំទៅហើយ នៅតែមិនអាចចុះបញ្ជីបាន។ បែរជាមានវិញ្ញាបនបត្រសម្គាល់អចលនវត្ថុមួយចំនួនបានចេញទៅបុគ្គលឯកជននៅលើដីក្រុមហ៊ុនទាំងពីរនេះទៅវិញ។
លោក ម៉ៅ ចម្រើន ប្រធានមន្ទីររៀបចំដែនដី នគររូបនីយកម្ម សំណង់ និងសុរិយោដីខេត្តមណ្ឌលគិរី បានបកស្រាយជុំវិញករណីខាងលើនេះថា ចំពោះករណីដី ៦ប្លង់នោះ ក្បាលដីនេះបានបញ្ជូនទៅឲ្យក្រុមការងារហើយ។ ដោយទីតាំងនៅទីនោះ យើងមិនមែនមានតែ៦ប្លង់នោះទេ គឺលោកសង្កេតឃើញមានការសាងសង់ក៏មានដែរ នៅលើដីចម្ការស្រល់នោះ។ ប៉ុន្តែលោកក៏បានឱ្យខាងការិយាល័យសំណង់ សហការជាមួយនឹងអាជ្ញាធរសង្កាត់ក្រុង ចុះទៅពិនិត្យទីតាំងដីនោះ តែមកដល់ឥឡូវមិនទាន់ឃើញមានរបាយការណ៍ មិនដឹងថាពួកគេបានចូលទៅទីតាំងនោះឬទេ។ មតិខ្លះនិយាយថា ចម្លើយខាងលើនេះ ប្រៀបដូចលោកប្រធានល្ងង់ដប់គត់តែម្តង មិនសមយកមកធ្វើប្រធានមន្ទីរស្ថាប័ននេះឡើយ។
លោកម៉ៅ ចម្រើន បានបញ្ជាក់ថា ទីតាំងខ្លះមានការលួចសាងសង់ពេលយប់ទៀតផង។ ក្រុមការងាររបស់លោកមិនមានបញ្ហាក្នុងការផ្ដល់ទីតាំងដីទាំង ០៦នោះទេ ហើយចំពោះការចុះបញ្ជីដីក្រុមហ៊ុន ក្រុមការងារបានចុះដំណើរការវាល់វែងតាំងពីឆ្នាំ២០១៨ ប៉ុន្តែមានភាពយឺតយ៉ាវដោយសារតែមន្ត្រីជំនាញក្រុមការងារចុះបញ្ជីមានបញ្ហាតិចតួច ដោយពេលខ្លះមន្ត្រីដែនដីទំនេរ មន្ត្រីកសិកម្មរវល់ ហើយនៅពេលមន្ត្រីកសិកម្មទំនេរ មន្ត្រីដែនដីជាប់ភារៈកិច្ច ដូច្នេះធ្វើឲ្យក្រុមការងារមិនមានសមត្ថភាពគ្រប់គ្រាន់ក្នុងការចូលរួមកំណត់ព្រំដីរបស់ក្រុមហ៊ុនទាំងពីរ ។
លោក ម៉ៅ ចំរើន បានបន្តថា ក្រោយមកក្រុមការងារខេត្តបានចុះអនុវត្តការកាត់ខ្វៀលតាមភូមិ តែនៅពេលដែលខ្វៀលក៏មានក្រុមការងារអន្តរក្រសួងចុះផ្ទាល់ ក្រុមការងាររបស់ខេត្តក៏បានផ្អាក ដោយសារតែគិតថា ក្រុមការងារអន្តរក្រសួងនេះ ទៅវាស់វែងដីប្រជាពលរដ្ឋរួច សល់ប៉ុន្មានជារបស់ក្រុមហ៊ុនហ្នឹង ។ ហើយរហូតមកដល់ពេលនេះ ក្នុងនាមលោកជាប្រធានមន្ទីរដែនដី នៅមិនទាន់បានទទួលលិខិតណាមួយស្តីពីការនិរាករណ៍ដីចំនួន៦ប្លង់នៅចម្ការស្រល់ទេ។
នៅក្នុងលិខិតបំភ្លឺដែលកោះសន្តិភាពទទួលបាននាល្ងាចថ្ងៃទី២១ មករា ២០២១ ពីលោក ម៉ៅ ចម្រើន ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តមណ្ឌលគិរី មានខ្លឹមសារបកស្រាយ៨ចំណុចទៅនឹងការចេញផ្សាយនាពេលកន្លងមកថា មុនចេញបណ្ណកម្មសិទ្ធិដី មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តមណ្ឌលគិរី បានអនុវត្តន៍នូវនីតិវិធី ០១, ប្រកាសតំបន់វិនិច្ឆ័យចុះបញ្ជី ដីធ្លីមានលក្ខណៈជាប្រព័ន្ធ នៅភូមិអូរស្ពាន (ចេញដោយរដ្ឋបាលខេត្តមណ្ឌលគិរី)។ ០២, ប្រកាសបិទផ្សាយទិន្នន័យក្បាលដីរយៈពេល ៣០ ថ្ងៃ (មានធ្វើពិធីដោយមានការអញ្ជើញមន្ទីរពាក់ព័ន្ធចូលរួម ដើម្បីឲ្យមានការប្ដឹងតវ៉ា) ។ ០៣, រដ្ឋបាលខេត្តមណ្ឌលគីរី បានធ្វើលិខិតទៅស្នើសុំយោបល់ពីក្រសួងកសិកម្ម រុក្ខាប្រម៉ាញ់ និងនេសាទ។ ០៤, មានការប្រជុំគណៈកម្មការគ្រប់គ្រងដីរដ្ឋថ្នាក់ខេត្ត ដើម្បីសម្រេចចេញគោលការណ៍ លក្ខខណ្ឌដែលត្រូវឲ្យមន្ទីររៀបចំដែនដី នគរូបនីយកម្ម សំណង់ និងសូរិយោដី ផ្ដល់ប័ណ្ណកម្មសិទ្ធិ។
ដូចនេះការផ្តល់កម្មសិទ្ធិទាំងនោះ ដោយឈរលើមូលដ្ឋានដូចជា ០១, ពុំមានការប្ដឹងជំទាស់តវ៉ាពីបុគ្គលណាម្នាក់ ឬស្ថាប័នណាមួយឡើយ។ ០២, ពីក្រសួងកសិកម្មរុក្ខាប្រម៉ាញ់ និងនេសាទ ពុំបានបញ្ជាក់ក្នុងលិខិតឆ្លើយតបមកសាលាខេត្តមណ្ឌលគិរីថា ក្បាលដីទាំងនោះជាន់លើដីចម្ការស្រល់រដ្ឋដាំដោយ ព្រះករុណា ទេ ។ ០៣, ចូលក្នុងលក្ខខណ្ឌដែលអាចផ្ដល់ប័ណ្ណកម្មសិទ្ធិបាន ដែលសម្រេចដោយអង្គប្រជុំគណៈកម្មការគ្រប់គ្រងដីរដ្ឋថ្នាក់ខេត្ត។ ០៤, ពុំមានស្ថាប័នណាមួយបានផ្ដល់ផែនទីដីចំការស្រល់រដ្ឋ ដែលដាំដោយ ព្រះករុណា មកមន្ទីរមុនពេលចេញប័ណ្ណកម្មសិទ្ធិទេ។
យោងតាមលិខិតខាងលើនេះ ដែលគេមើលឃើញមានត្រឹមតែត្រាក្រហមរបស់មន្ទីររៀបចំដែនដី នគរូបនីយកម្ម សំណង់ និងសូរិយោដី ខេត្តមណ្ឌលគិរី តែគ្មានការចុះថ្ងៃខែឆ្នាំបរិច្ឆេទបែបបទលិខិតរដ្ឋបាលផ្លូវការ ហាក់មានចេតនាចោទប្រកាន់ទាំងស្រុង ទៅលើក្រសួងពាក់ព័ន្ធនានា ជាពិសេសគឺក្រសួងកសិកម្ម រុក្ខាប្រម៉ាញ់ និងនេសាទ រួមនឹងមន្ទីរកសិកម្ម រុក្ខាប្រម៉ាញ់ និងនេសាទ ខេត្តមណ្ឌលគិរី ឯណោះវិញ ដែលធ្វេសប្រហែសមិន ប្តឹងជំទាស់ និងមិនបានផ្តល់ដំណឹងពីតំបន់ដីរដ្ឋ ឬដីចម្ការស្រល់ដែលដាំដោយព្រះមហាក្សត្រ ពោលគឺទុកឱកាសសម្បទានពេញលេញដល់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តមណ្ឌលគិរី ជិះសេះលែងដៃតែម្រ៉ង ចេញប្លង់រឹងជូនអ្នកស្នើសុំផ្សេង ។
តាមមតិរិះគន់ស្ថាបនាជាច្រើននៅជុំវិញស្ថាប័ននានាក្នុងខេត្តបានយល់ដល់បេះដូងរីករបស់លោក ម៉ៅ ចម្រើន ដល់គ្រឿងក្នុងតែម្តង ។ ការតែងតាំងប្រធានមន្ទីរបែបធ្វើល្ងង់ខ្លៅធុននេះ រលាយអស់ហើយដីរដ្ឋ ដូចករណីខាងលើជាដើម ។ ទីបំផុតបានទម្លាក់កំហុសទាំងផ្ទាំងទៅលើសមត្ថកិច្ច អភិបាលខេត្តមណ្ឌលគិរីទាំងដុលតែម្តង ។ សួរថា តើពាក្យថា «ស្វាស៊ីបាយលាបមាត់ពពែ» ត្រូវអត់?
ចែករំលែកព័តមាននេះ