រាជធានីភ្នំពេញ ៖ គួរឲ្យសង្វេគខ្លាំងណាស់ នារីម្នាក់ជិតដល់ថ្ងៃចូលរោងការទៅហើយនោះ ក៏ស្រាប់តែមានបុរសម្នាក់សង្ស័យថាស្រវឹងស្រាបានបើករថយន្តមួយគ្រឿងបុករថយន្ត១គ្រឿងរងការខូចខាតិចតួចកាលពីម៉ោង៧និង៥០នាទីយប់ ថ្ងៃទី២៣ ខែមករា ឆ្នាំ២០២១ នៅចំណុចមុខវត្តសំបួរមាស តាមផ្លូវ២១៧ ក្នុងសង្កាត់ដង្កោ រួចមិនឈប់ដោះស្រាយនោះទេ បែរជាបន្តបើករត់ក៏ទៅបុករថយន្ត១គ្រឿងផ្សេងទៀតនៅស្តុបស្ពានដែកចំការដូង ហើយបន្តទៅបុកម៉ូតូ២គ្រឿងទៀតនៅមុខបុរីប៉េងហួត តាមបណ្ដោយផ្លូវ២១៧ ក្នុងសង្កាត់ស្ទឹងមានជ័យ២ ខណ្ឌមានជ័យ បណ្ដាលឲ្យនារីម្នាក់បាត់បង់ជីវិតក្នុងថ្លុកឈាម និងប្រុស-ស្រី៣នាក់ទៀតរបួសស្រាល ។
![](https://kohsantepheapdaily.com.kh/wp-content/images/2021/01/8e296a067a37563370ded05f5a3bf3ec-29.jpg)
នារីរងគ្រោះខាងលើដែលបាត់បង់ជីវិតមានឈ្មោះ លីម ស្រីហេង អាយុ២៨ឆ្នាំ ស្នាក់នៅសង្កាត់ដង្កោ ខណ្ឌដង្កោ ហើយនៅសល់រយៈពេលជាង១០ថ្ងៃទៀតចូលរោងការទៅហើយ ។ ចំណែកជនបង្កឈ្មោះ គួង ស៊ីថន ភេទប្រុស អាយុ៤១ឆ្នាំ ស្នាក់នៅម្ដុំស្ទឹងមានជ័យ សង្កាត់ស្ទឹងមានជ័យ១ ខណ្ឌមានជ័យ។
![](https://kohsantepheapdaily.com.kh/wp-content/images/2021/01/6364d3f0f495b6ab9dcf8d3b5c6e0b01-36.jpg)
តាមប្រភពព័ត៌មានពីកន្លែងកើតហេតុបានប្រាប់ឲ្យដឹងថា មុនពេលកើតហេតុ គេឃើញបុរសម្នាក់បើករថយន្តម៉ាក ALPHAPD ពណ៌ស ពាក់ស្លាកលេខភ្នំពេញ 2BJ-2004 សង្ស័យមានសារធាតុស្រវឹងស្រា ធ្វើដំណើរតាមផ្លូវបេតុងវត្តសំបូរ ក្នុងទិសដៅពីលិចទៅកើត លុះមកដល់ផ្លូវ២១៧ បុរសជាអ្នកបើករថយន្តរូបនេះបានបុកជាមួយនឹងរថយន្តម៉ាកម៉ាស្ដា ពណ៌ស ពាក់ស្លាកលេខភ្នំពេញ 2BG-4225 បើកបរដោយស្ត្រីម្នាក់តាមផ្លូវ២១៧ ក្នុងទិសដៅពីជើងទៅត្បួងធ្វើឲ្យរងការខូចខាត ។
![](https://kohsantepheapdaily.com.kh/wp-content/images/2021/01/37693cfc748049e45d87b8c7d8b9aacd-28.jpg)
ប្រភពដដែលបន្តថា ភ្លាមៗនោះ អ្នកបើករថយន្តបង្កមិនបានឈប់ដោះស្រាយនោះទេ បែរជាបើករថយន្តបត់ឆ្វេងឡើងទៅលើផ្លូវ២១៧ ក្នុងទិសដៅពីត្បូងទៅជើង ក្នុងល្បឿនយ៉ាងលឿនបំណងចង់រត់គេចខ្លួន លុះមកដល់ស្តុបស្ពានដែកចំកាដូង បុរសជាអ្នកបើករថយន្តបង្ករូបមិនព្រមឈប់ស្តុបឡើយ ដោយបានបើកបុករថយន្តកាមរីឆ្លាម ពណ៌ត្រីឆ្លូញ ពាក់ស្លាកលេខភ្នំពេញ 2S-6510 ធ្វើឱ្យរងការផ្នែកខាងមុខយ៉ាងដំណំ រួចរថយន្តបង្កបន្តបើកទៅមុខបន្តទៀត ។
![](https://kohsantepheapdaily.com.kh/wp-content/images/2021/01/4e732ced3463d06de0ca9a15b6153677-27.jpg)
ប្រភពដដែលបន្តថា ខណៈពេលនោះ អ្នកបើកបររថយន្តកាមរីឆ្លាមបានដេញតាមពីក្រោយរថយន្តបង្ក រហូតមកដល់ចំណុចមុខបុរីប៉េងហួត ជិតច្រមុះជ្រូកស្ទឹងមានជ័យ ក៏ស្រាប់តែរថយន្តបង្កបានបុកម៉ូតូហុងដាឌ្រីម ពណ៌ខ្មៅ ពាក់ស្លាកលេខ តាកែវ 1N-8939 និងម៉ូតូស្កុបពី ពណ៌ស ពាក់ស្លាកលេខភ្នំពេញ 1II-9166 ។ ក្នុងនោះហេតុការណ៍នោះ ភាគីខាងម៉ូតូស្កុបពី ធ្វើឱ្យនារីម្នាក់បានបាត់បង់ជីវិត និងរបួសស្រាល២នាក់ ព្រមទាំងមានបុរសម្នាក់ជាភាគីខាងម៉ូតូហុងដាឌ្រីម រងរបួស្រាលផងដែរ រីឯអ្នកបើករថយន្តបង្ក ក៏ត្រូវបានសមត្ថកិច្ចឃាត់ខ្លួនផងដែរ ។
![](https://kohsantepheapdaily.com.kh/wp-content/images/2021/01/c16a5320fa475530d9583c34fd356ef5-34.jpg)
ក្រោយពេលកើតហេតុ សមត្ថកិច្ចមូលដ្ឋានបានចុះមកជួយសម្រួលចរាចរណ៍ ដើម្បីកុំឲ្យកកស្ទះ និងទាក់ទងទៅសមត្ថកិច្ចជំនាញចរាចរណ៍ខណ្ឌ និងក្រុងភ្នំពេញ ដើម្បីធ្វើការវាស់វែង រួចយកវត្ថុតាងទៅរក្សាទុក ព្រមទាំងនាំខ្លួនអ្នករថយន្តបង្កទៅកាន់ការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយតាមច្បាប់ ។ ចំណែកសពនារីរងគ្រោះត្រូវបានសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕
![](https://kohsantepheapdaily.com.kh/wp-content/images/2021/01/1ff1de774005f8da13f42943881c655f-28.jpg)
![](https://kohsantepheapdaily.com.kh/wp-content/images/2021/01/02e74f10e0327ad868d138f2b4fdd6f0-26.jpg)
![](https://kohsantepheapdaily.com.kh/wp-content/images/2021/01/33e75ff09dd601bbe69f351039152189-24.jpg)
![](https://kohsantepheapdaily.com.kh/wp-content/images/2021/01/6ea9ab1baa0efb9e19094440c317e21b-19.jpg)
![](https://kohsantepheapdaily.com.kh/wp-content/images/2021/01/34173cb38f07f89ddbebc2ac9128303f-32.jpg)
ចែករំលែកព័តមាននេះ