ខេត្តកណ្តាល ៖ លោក ផាន់ ហ៊ន អ្នកយកព័ត៌មានផ្សាយផ្ទាល់តាមបណ្តាញសង្គមហ្វេសបុកនៅខេត្តស្វាយរៀង ដែលអ្នកប្រើប្រាស់បណ្តាញសង្គមចាប់អារម្មណ៍ និងស្គាល់ច្រើនមួយរយៈចុងក្រោយនេះ ដោយសារតែវោហារកំប្លុកកំប្លែងនៅពេលធ្វើការអធិប្បាយព័ត៌មានទាន់ហេតុការណ៍ម្តងៗនោះ ត្រូវមន្ត្រីនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តកណ្តាល កោះហៅចូលប៉ុស្តិ៍ ដើម្បីសួរនាំ ពន្យល់ អប់រំ ណែនាំរឿងថតយកព័ត៌មាននៅក្នុងដែនសមត្ថកិច្ចដែលកំពុងបំពេញកិច្ចការ ព្រោះខុសនឹងវិជ្ជាជីវៈសារព័ត៌មាន ។
ហ្វេសប៊ុកផេករបស់ស្នងការដ្ឋាននគរបាលខេត្តកណ្តាល បានអោយដឹងនៅថ្ងៃទី២០ មករា ២០២១នេះថា លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានបញ្ជាឲ្យលោកនាយការិយាល័យនគរបាលចរាចរណ៍ផ្លូវគោក ធ្វើការស្រាវជ្រាវ និងឆ្លើយតបចំពោះខ្លឹមសារ ដែលសារព័ត៌មាន KH Plus News ដែលបានធ្វើការផ្សាយផ្ទាល់ ពីសកម្មភាពសមត្ថកិច្ចនគរបាលចរាចរណ៍ផ្លូវគោក ចុះរឹតបន្តឹងការអនុវត្តច្បាប់ចរាចរណ៍ផ្លូវគោក កាលពីថ្ងៃទី១៨ ខែមករា ឆ្នាំ២០២១ ។
បន្ទាប់ពីស្រាវជ្រាវ រកឃើញថា នៅថ្ងៃទី១៨ មករា កន្លងមកកម្លាំងការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តកណ្តាល ដឹកនាំដោយលោកវរសេនីយ៍ទោ ខៀវ ប៊ុនធឿន មានតួនាទីជានាយរងការិយាល័យនគរបាលចរាចរណ៍ផ្លូវគោក និងជាប្រធានក្រុមត្រួតពិនិត្យការអនុវត្តច្បាប់ស្តីពីចរាចរណ៍ផ្លូវគោក និងការបើកបរយានយន្តក្រោមឥទ្ធិពលនៃគ្រឿងស្រវឹង នៅចំណុចគោលដៅ លើផ្លូវជាតិលេខ១ ត្រង់ចំណុចភូមិក្បាលជ្រោយ ឃុំកំពង់ភ្នំ ស្រុកលើកដែក ខេត្តកណ្តាល ដោយបានសហការជាមួយកម្លាំងនគរបាលអន្តរាគមន៍ និងកម្លាំងនគរបាលចរាចរណ៍ នៃអធិការដ្ឋាននគរបាលស្រុកលើកដែក ។
នៅពេលកំពុងអនុវត្តនោះ សមត្ថកិច្ចបានឃាត់រថយន្ត០១គ្រឿងម៉ាក TOYOTA HIGHLENDER ពណ៌ទឹកមាស ពាក់ផ្លាកលេខ ភ្នំពេញ 2AV-9264 បើកបរដោយឈ្មោះ ភិន ដុំ ភេទប្រុស អាយុ៤០ឆ្នាំ មានទីលំនៅភូមិព្រៃផ្អាវ ឃុំសំឡី ស្រុកកំពង់រោទ៍ ខេត្តស្វាយរៀង ដែលបើកបរមិនពាក់ខ្សែក្រវ៉ាត់សុវត្ថិភាព ពេលនោះឈ្មោះ ផាត់ ហ៊ន ភេទប្រុស អាយុ៣៣ឆ្នាំ មានទីលំនៅភូមិទួលអង្គុប ឃុំសំបួរ ស្រុកស្វាយទៀប ខេត្តស្វាយរៀង មុខរបរ សារព័ត៌មានក្តាមក្រហម តួនាទីនិពន្ធនាយករង ដែលជិះនៅខាងក្រោយរថយន្តនោះ បានចុះមកធ្វើការផ្សាយវីដេអូផ្ទាល់ ដោយមិនបានសុំការអនុញ្ញាត និងនិយាយបំភ្លើសការពិត ។
រហូតដល់ថ្ងៃទី១៩ ខែមករា ឆ្នាំ២០២១ ការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តកណ្តាល បានកោះអញ្ជើញ ឈ្មោះ យឹម សារ៉ែម ចាងហ្វាងសារព័ត៌មានក្តាមក្រហម និងឈ្មោះ ផាត់ ហ៊ន និពន្ធនាយករងសារព័ត៌មានក្តាមក្រហម មកការិយាល័យធ្វើការសួរនាំ ពន្យល់ អប់រំ ណែនាំ អំពីការអនុវត្តតួនាទីភារកិច្ចរបស់សមត្ថកិច្ច ។
សូមជម្រាបដែរថា បើតាមប្រសាសន៍ឯកឧត្តម ខៀវ កញ្ញរិទ្ធ រដ្ឋមន្ត្រីក្រសួងព័ត៌មាន ដែលបានផ្សាយតាមទូរទស្សន៍ជាតិកម្ពុជា ទទក បានរម្លឹកដល់អ្នកសារព័ត៌មានទាំងអស់ កុំទៅថត យកព័ត៌មាននៅក្នុងដែនសមត្ថកិច្ច របស់អាជ្ញាធរដែលហាមឃាត់ កំពុងបំពេញកិច្ចការ ព្រោះខុសវិជ្ជាជីវៈសារព័ត៌មាន បើនៅមិនស្តាប់ការហាមឃាត់នោះទេ សមត្ថកិច្ចមានសិទ្ធិចាប់ឃាត់ខ្លួនអ្នកសារព័ត៌មានពេលនោះតែម្តង ៕
ចែករំលែកព័តមាននេះ