ខេត្តបាត់ដំបង ៖ សម្តេចក្រឡាហោម ស ខេង និងលោកជំទាវ បានអញ្ជើញជាអធិប តីភាពដ៏ខ្ពង់ខ្ពស់ក្នុងពិធីសម្ពោធដាក់ឱ្យប្រើប្រាស់ជាផ្លូវការអគារសិក្សា១ខ្នង ២ជាន់ និងសមិទ្ធផលនានាជាច្រើនទៀត នៅក្នុងសាលាបឋមសិក្សា សម្តេច ជា ស៊ីម ក្រុងបាត់ ដំបង ខេត្តបាត់ដំបង នៅព្រឹកថ្ងៃទី២០ ខែមករា ឆ្នាំ២០២១ ។
សាលាបឋមសិក្សា សម្តេច ជា ស៊ីម ស្ថិតក្នុងភូមិបែកចាន សង្កាត់ព្រែកព្រះសម្តេច ក្រុងបាត់ដំបង ខេត្តបាត់ដំបង ដែលជាអំណោយដ៏ថ្លៃថ្លា របស់សម្តេចក្រឡាហោម ស ខេង និងលោកជំទាវ តាមរយៈ លោក ស សុខា អនុរដ្ឋលេខាធិការក្រសួងអប់រំ យុវជន និងកីឡា និងមានការចូលរួមពី លោកអភិបាល នៃគណៈអភិបាលខេត្ត ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ គណៈប្រតិភូអមដំណើរ លោកគ្រូ អ្នកគ្រូ យុវជនសសយក យុវជនកាយរិទ្ធិ និងសិស្សានុសិស្សជាច្រើនទៀត។
លោក ងួន រតនៈ ជំនួសមុខឱ្យអាព្យាបាល សិស្សានុសិស្ស លោកគ្រូ អ្នកគ្រូ ក៏ដូចជាប្រជាពលរដ្ឋរស់នៅក្នុងក្រុងបាត់ដំបងទាំងអស់ សូមថ្លែងអំណរគុណយ៉ាងជ្រាលជ្រៅចំពោះ លោក ស សុខា រដ្ឋលេខាធិការក្រសួងអប់រំ យុវជន និងកីឡា និងលោកជំទាវ ព្រមទាំងក្រុមការងារ ដែលបានផ្តួចផ្តើមគំនិតក្នុងរៀបចំកសាង ជួសជុល និងកែលម្អរអគារសិក្សា ខ្លោងទ្វា និងបរិវេណទាំងក្នុង និងក្រៅឲ្យមានសោភ័ណ្ឌភាពកាន់តែស្អាត ដែលចំណាយថវិកាសរុប ៥០៥.២៣៧ ដុល្លារ ។
ក្នុងនោះ លោកងួន រតនះ អភិបាលខេត្តបាត់ដំបង បានមានមតិស្វាគមន៍ និងអានរបាយការណ៍ អំពីសភាពការណ៍ទូទៅក្នុងខេត្ត ហើយបានគូសបញ្ជាក់ផងដែរថា ពិធីសម្ពោធអគារសិក្សា និងសមិទ្ធផលនានាក្នុងសាលាបឋមសិក្សាសម្តេច ជា ស៊ីម រួមមាន៖ អគារសិក្សា ១ខ្នង ២ជាន់ ១០ បន្ទប់ ដែលមានឈ្មោះថា អគារលោកជំទាវ ញ៉ែម សឿន ជា ស៊ឹម ព្រមទាំងបំពាក់សម្ភារៈសិក្សា និងជួសជុលអគារសិក្សា បំពាក់សម្ភារៈ ទីចាត់ការ សាលប្រជុំ ទីធ្លាទាំងក្នុង និងក្រៅ និងសមិទ្ធផលផ្សេងៗជាច្រើនទៀតផងដែរ ។
បន្ទាប់មក សម្តេចក្រឡាហោម ស ខេង បានលើកអំពីប្រវត្តិសាងសង់សាលារៀននៅបាត់ដំបងនេះ គឺកើតមានតាំងពីសម័យមានសង្គ្រាមមកម្ល៉េះ ដោយបានសាងសង់នៅវិទ្យាល័យស្រុកបវេលនៅឆ្នាំ១៩៩៣ ហើយពេលនោះមានគ្រាប់ផ្លោងជាបន្តបន្ទាប់ពីសម័យភាគីម្ខាងដែលមិនទាន់ត្រូវគ្នា ហើយសម្តេចក្រឡាហោមក៏បានលើកឡើងថា យើងធ្វើបាននៅតំបន់មានសង្គ្រាមនៅឡើយ ចុះហេតុអ្វីនៅក្នុងក្រុងយើងមិនអាចធ្វើបាន ដូច្នោះហើយទើបសាលារៀនចេះតែកើតឡើងមកជាបន្តបន្ទាប់រហូតដល់រាជរដ្ឋាភិបាលយើងបានបង្រួបបង្រួមជាតិបញ្ចប់សង្គ្រាម រួចហើយនាំគ្នាកសាងបន្ថែមនូវហេដ្ឋារចនាសម្ព័ន្ធក្រោមម្លប់សន្តិភាព និងថែរក្សាសុខសន្តិភាពរហូតបានដល់សព្វថ្ងៃនេះ ហើយរួមគ្នាបន្តថែរក្សា កសាងជាបន្តទៅទៀត ។
សម្តេចក្រឡាហោម បានបន្តទៀតថា ពិតមែនតែយើងងកំពុងតែប្រឈមមុខនិងជម្ងឺកូវីដ-១៩ និងគ្រោះទឹកជំនន់កន្លងមក តែការសាងសង់របស់យើងមិនបានបញ្ចប់នៅឡើយ គឺនៅតែធ្វើតាមតម្រូវការជាបន្តបន្ទាប់ ។ ក្រោយពីកាត់ខ្សែបូរដាក់ឲ្យប្រើប្រាស់រួចហើយ សម្តេចក្រឡាហោមបានបន្តទៅចែកប្រគល់ចែកសញ្ញាបត្រជូននិស្សិតជ័យលាភីថ្នាក់ របស់សាកលវិទ្យាល័យជាតិបាត់ដំបងបន្តទៀត ហើយបានបញ្ជាក់អំពីតួលេខនៅសាកលវិទ្យាល័យនោះថា មានសិស្ស និស្សិតកន្លងមកបានចេញពីសាលាសាកលវិទ្យាល័យនេះប្រមាណ២ម៉ឺននាក់បានរៀនបញ្ចប់ចេញទៅរកការងារធ្វើដែលមានប្រមាណ៨០% សុទ្ធតែមានការងារធ្វើទាំងអស់គ្នា។
ចែករំលែកព័តមាននេះ