ខេត្តបាត់ដំបង ៖ លោក ងួន រតនៈ អភិបាលខេត្តបាត់ដំបង បានពង្រឹងការគ្រប់គ្រង និងទប់ស្កាត់ការផ្ទុះជំងឺកូវីដ-១៩ ចំពោះពលករទើបត្រឡប់មកពីប្រទេសថៃ និងចុះសំណេះសំណាលជាមួយបុគ្គលិកកាស៊ីណូប្រមាណជិត២០០នាក់ ដែលស្ម័គ្រចិត្តធ្វើចត្តាឡីស័ក នៅក្នុងកាស៊ីណូនៅស្រុកជាយដែនចំនួន៣ទីតាំង ដែលជាប់ព្រំប្រទល់ប្រទេសថៃ ខេត្តបាត់ដំបង ដែលបានធ្វើឡើងនៅព្រឹកថ្ងៃសុក្រ ទី១៥ ខែមករា ឆ្នាំ២០២១ ។
នាព្រឹកថ្ងៃដដែលនោះដែរ ក៏មានបើកកិច្ចប្រជុំបន្ទាន់ស្តីពីការគ្រប់គ្រងពលករវិលត្រឡប់មកពីប្រទេសថៃ នៅស្រុកកំរៀង ភ្នំព្រឹក និងស្រុកសំពៅលូន ដែលជាប់ព្រំប្រទល់ប្រទេសថៃ ខេត្តបាត់ដំបង នៅវិទ្យាល័យកំរៀង ស្រុកកំរៀង ដោយមានការចូលរួមពីលោកស្នងការ ស្នងការរងនគរបាលខេត្ត លោកអភិបាល អភិបាលរង ស្រុកទាំង៣ កម្លាំងវរៈការពារព្រំដែន កម្លាំងយោធភូមិភាគទី៥ និងកម្លាំងចម្រុះពាក់ព័ន្ធនានាជាច្រើនទៀត។
ដោយមានការលំហូរចូលពលករខ្មែរនៅតាមបន្ទាត់ព្រំដែននៅតែបន្តមានជាហូរហែរពីមួយថ្ងៃទៅមួយថ្ងៃប្រមាណជាង៥០ទៅ១០០នាក់ និងមានការកើនឡើងការផ្ទុះជំងឺកូវីដ ១៩ លោក ងួន រតនៈ បានដឹកនាំកិច្ចប្រជុំបន្ទាន់ ដើម្បីមានវិធានការបន្ថែមចំពោះពលករដែលវិលត្រឡប់ពីប្រទេសថៃ និងក្តាប់សភាពការណ៍ថ្មីៗ នៅតាមបន្ទាត់ព្រំដែនផងដែរ ។
លោក សុខ គឹមខុន អភិបាលនៃគណៈអភិបាលស្រុកកំរៀង បានឱ្យដឹងថា តាមរយៈទាហានទំនាក់ទំនងកម្ពុជា-ថៃ និងការផ្តល់ព័ត៌មានពីភាគីថៃ គឺថាមានករណីសង្ស័យពលករមួយចំនួន ដែលវិលត្រឡប់ពីប្រទេសថៃមានផ្ទុកជំងឺកូវិដ ១៩ ដែលត្រូវមានការប្រុងប្រយ័ត្នខ្ពស់ និងរៀបចំពួកគាត់ឱ្យរស់នៅដាច់ដោយឡែកពីពលករផ្សេងៗ ។
លោក ងួន រតនៈ អភិបាលខេត្ត បានណែនាំដល់រដ្ឋបាលស្រុក ត្រូវរៀបចំបន្ទប់ទឹកបន្ថែម និងរៀបចំផ្លូវឱ្យពួកគាត់សម្រាប់ប្រើប្រាស់ ដើម្បីចៀសវាងការប្រើប្រាស់ជាមួយពលករផ្សេងទៀត និងបន្ថែមកម្លាំងយាមការឱ្យបានច្បាស់លាស់នៅបន្ទាត់ព្រំដែន កុំមានការថ្លោះធ្លោយ និងបន្តដាក់កម្លាំងឆែករថយន្តតាក់ស៊ី នៅតាមដងបន្ថែម ចៀសវាងកុំឱ្យពួកគាត់ទៅដល់មូលដ្ឋានផ្សេងៗផងដែរ។
បន្តមកទៀតនៅព្រឹកថ្ងៃទី១៦ ខែមករា ឆ្នាំ២០២១ លោក ងួន រតនៈ អភិបាល នៃគណៈអភិបាលខេត្តបាត់ដំបង បានចូលរួមដោយផ្ទាល់សំណេះសំណាលជាមួយបុគ្គលិកកាស៊ីណូ នៅស្រុកកំរៀង ខេត្តបាត់ដំបង ដែលស្ម័គ្រចិត្តធ្វើចត្តាឡីស័កនៅក្នុងកាស៊ីណូប្រមាណជិត ២០០នាក់ ដែលមានការអញ្ជើញពីលោកស្នងការនគរបាលខេត្ត លោកប្រធានមន្ទីរ អង្គភាព លោកនាយករដ្ឋបាលខេត្ត លោកអភិបាលស្រុក កងកម្លាំង និងអ្នកពាក់ព័ន្ធមួយចំនួនទៀត ។
ក្នុងពិធីនោះដែរ លោកអភិបាលខេត្ត បានសង្កត់ធន់ និងចាត់វិធានការផ្លូវច្បាប់ចំពោះមេខ្យល់ណា ដែលហ៊ានញុះញង់នាំពលករលួចឆ្លងដែនខុសច្បាប់ ដោយគ្មានករណីលើកលែងឡើយ ពីព្រោះការលួចឆ្លងដែននាពេលនេះអាចប្រឈមនឹងការឆ្លងនូវជំងឺកូវីដ ១៩ ដល់បងប្អូនប្រជាពលករ ក៏ដូចជាសហគមន៍ទាំងមូលផងដែរ ។
បន្ទាប់មកលោកអភិបាលខេត្ត ក៏បាននាំយកអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជណាចក្រកម្ពុជា រួមមាន ទឹកសុទ្ធ និងមី ដើម្បីប្រគល់ជូនបុគ្គលិកកាស៊ីណូដែលកំពុងធ្វើចត្តាឡីស័កផងដែរ ។
សូមជម្រាបជូនដែរថាបុគ្គលិកកាស៊ីណូ ដែលស្ម័គ្រចិត្តធ្វើចត្តាឡីស័កនៅក្នុងបរិវេណកាស៊ីណូស្រុកកំរៀង មានប្រមាណជិត២០០នាក់ ដោយអ្នកខ្លះធ្វើការបោះតង់ និងអ្នកខ្លះទៀតស្នាក់នៅតាមបន្ទប់រៀងៗខ្លួនដាច់ដោយឡែកពីគ្នាផងដែរ ៕
ចែករំលែកព័តមាននេះ