កាលពីព្រឹកថ្ងៃទី១៣ ខែមករា ឆ្នាំ២០២១ ក្រសួងសុខាភិបាលបានប្រកាសថា មានករណីវិជ្ជមានវីរុសកូវីដ១៩ថ្មី ចំនួន៦នាក់ទៀត ដែលជាស្ត្រីពលករខ្មែរយើងធ្វើដំណើរមកពីប្រទេសថៃ ។ សេចក្តីប្រកាសព័ត៌មានរៀងរាល់ព្រឹករបស់អ្នកនាំពាក្យក្រសួងសុខាភិបាលបង្ហាញថា ស្ត្រីពលករទាំង៦នាក់…
កាលពីព្រឹកថ្ងៃទី១៣ ខែមករា ឆ្នាំ២០២១ ក្រសួងសុខាភិបាលបានប្រកាសថា មានករណីវិជ្ជមានវីរុសកូវីដ១៩ថ្មី ចំនួន៦នាក់ទៀត ដែលជាស្ត្រីពលករខ្មែរយើងធ្វើដំណើរមកពីប្រទេសថៃ ។
សេចក្តីប្រកាសព័ត៌មានរៀងរាល់ព្រឹករបស់អ្នកនាំពាក្យក្រសួងសុខាភិបាលបង្ហាញថា ស្ត្រីពលករទាំង៦នាក់ ដែលទើបរកឃើញឆ្លងជំងឺកូវីដ១៩នោះ មានអាយុចាប់ពី១៨ឆ្នាំ ដល់៣៦ឆ្នាំ មានស្រុកកំណើតនៅបាត់ដំបង និងនៅខេត្តព្រៃវែង ។ ពួកគាត់បានធ្វើដំណើរមកពីប្រទេសថៃ ចូលមកដល់កម្ពុជានៅថ្ងៃទី១០ និងថ្ងៃទី១១ ខែមករា ឆ្នាំ២០២១ តាមច្រកព្រំដែន ខេត្តបន្ទាយមានជ័យ និងខេត្តបាត់ដំបង ។
គិតមកដល់ព្រឹកថ្ងៃទី១៣ ខែមករា មានពលករខ្មែរមកពីប្រទេសថៃ រកឃើញកើតជំងឺកូវីដ១៩ សរុបចំនួន៣៣នាក់ ។ ប៉ុន្តែក៏មានពលករ១២នាក់ហើយ ត្រូវបានព្យាបាលជាសះស្បើយពីជំងឺកូវីដ១៩ ។ ដោយឡែក នៅទូទាំងប្រទេស គិតត្រឹមម៉ោង៧ព្រឹកថ្ងៃទី១៣ ខែមករានេះ មានអ្នកឆ្លងជំងឺកូវីដ១៩ សរុប៣៩៨នាក់។ ក្នុងនោះមានអ្នកជាសះស្បើយ៣៧៦នាក់ និង២២នាក់ កំពុងសម្រាកព្យាបាលនៅមន្ទីរពេទ្យ ។
បើយើងមើលតាមប្រកាសព័ត៌មានរៀងរាល់ព្រឹករបស់អ្នកនាំពាក្យក្រសួងសុខាភិបាល គឺលទ្ធផលនៃការធ្វើតេស្តរកមេរោគកូវីដ១៩ លើពលករខ្មែរ ដែលបានឆ្លងដែនចេញពីប្រទេសថៃ ចូលមកស្រុកកំណើត តាមព្រំដែនគោក គឺត្រូវចំណាយពេលយូរជាង អ្នកចូលតាមយន្តហោះ ។ អ្នកដំណើរតាមយន្តហោះមកកម្ពុជា ត្រឹមតែ១ថ្ងៃ គឺអាចដឹងលទ្ធផលនៃការធ្វើតេស្តរកមេរោគកូវីដ១៩ហើយ ។
សម្រាប់ពលករខ្មែរ ដែលចេញពីប្រទេសថៃ ចូលមកកាន់ស្រុកកំណើតតាមច្រកព្រំដែនគោក នៅក្នុងខេត្តកោះកុង ប៉ៃលិន ពោធិ៍សាត់ បាត់ដំបងបន្ទាយមានជ័យ ឧត្តរមានជ័យ និងខេត្តព្រះវិហារ គឺត្រូវចំណាយពេលចាប់ពី២ទៅ៣ថ្ងៃ ហើយខ្លះដល់៤ថ្ងៃក៏មាន ទើបអាចដឹងលទ្ធផលនៃការធ្វើតេស្តរកមេរោគកូវីដ១៩។ ពោលគឺវត្ថុសំណាកទាំងនោះ ត្រូវបានគេដឹកជញ្ជូនតាមរថយន្តពីច្រកព្រំដែនតាមបណ្តាខេត្តនានា មកកាន់វិទ្យាស្ថានប៉ាស្ទ័រកម្ពុជានៅភ្នំពេញ ។
ការដឹកជញ្ជូននេះ ត្រូវចំណាយពេលយ៉ាងហោចណាស់១ថ្ងៃ ហើយការពិនិត្យវិភាគនៅប៉ាស្ទ័រ ត្រូវចំណាយពេល១ថ្ងៃទៀត ។ ដូច្នេះលឿនបំផុត ក៏ត្រូវចំណាយពេលដល់ទៅ
២ថ្ងៃ ទើបគេអាចដឹងលទ្ធផលធ្វើតេស្តលើពលករខ្មែរ ដែលចូលតាមច្រកព្រំដែនគោករវាងកម្ពុជានិងថៃ ។ នេះយើងគិតថា លទ្ធផលនឹងត្រូវបញ្ជូនត្រឡប់ទៅវិញលឿន ដោយប្រើប្រាស់ខ្សែទំនាក់ទំនងពិសេស ឬក៏តាមប្រព័ន្ធតេឡេក្រាម រវាងខ្សែបណ្តោយរបស់មន្ទីរសុខាភិបាល ឬក៏អាជ្ញាធរខេត្តពាក់ព័ន្ធទាំងអស់នោះ ដោយមិនចាំបាច់ដល់ថ្នាក់យកឯកសារជាក្រដាសដឹកជញ្ជូនតាមឡានចេញពីភ្នំពេញវិញនោះទេ ។
គិតចាប់ពីថ្ងៃទី២០ ខែធ្នូ ឆ្នាំ២០២១ រាជរដ្ឋាភិបាល ក្រោមការដឹកនាំបញ្ជាផ្ទាល់ពីសម្តេចតេជោនាយករដ្ឋមន្ត្រី ហ៊ុន សែន បានដាក់ចេញនូវវិធានការបន្ទាន់ ដើម្បីទប់ស្កាត់ការឆ្លងរាលដាលជំងឺកូវីដ១៩ ពីប្រទេសថៃ ចូលមកកម្ពុជាយើង ខណៈដែលថៃ ផ្ទុះការឆ្លងរាលដាលសហគមន៍នៅខេត្តសាមុតសាខន ។
ការរឹតបន្តឹងតាមច្រកព្រំដែនគោក ត្រូវបានធ្វើឡើង ដោយអាជ្ញាធរសមត្ថកិច្ច ពិសេសក្រុមគ្រូពេទ្យបានប្រចាំការ២៤ម៉ោងលើ២៤ម៉ោង ដើម្បីត្រួតពិនិត្យសុខភាពលើអ្នកដំណើរចូលមកកម្ពុជា ដែលជាពលករខ្មែរយើង ។ ក្រៅពីពិនិត្យសុខភាព យកវត្ថុសំណាក ដើម្បីធ្វើតេស្តរកមេរោគកូវីដ១៩ គឺពលករទាំងអស់ ត្រូវបានដឹកជញ្ជូនតាមរថយន្តយោធា ចេញពីច្រកព្រំដែន តាមបណ្តាខេត្តជាប់ព្រំដែនថៃ ទៅកាន់មណ្ឌលចត្តាឡីស័ក ដែលគេរៀបចំនៅតាមបណ្តាខេត្តទាំងនោះ ។
ដំបូងៗ មានករណីពលករឆ្លងដែនរួចធ្លាយទៅដល់ស្រុកកំណើតខ្លះដែរ ។ មួយចំនួនធំទៀត ត្រូវបានគេដឹកជញ្ជូនតាមរថយន្តយោធាយកពលករ ដែលធ្វើតេស្តរួច មិនមានវីរុសកូវីដ១៩ យកទៅធ្វើចត្តាឡីស័ក នៅតាមខេត្តស្រុកកំណើតរបស់ពលករទាំងនោះ។ តែចំណាត់ការដំបូងៗនេះ ត្រូវបានសម្តេចនាយករដ្ឋមន្ត្រី ហ៊ុន សែន ប្រកាសហាមឃាត់ និងបញ្ឈប់ការដឹកជញ្ជូនពលករទាំងនោះចេញពីព្រំដែនទៀត ហើយតម្រូវឲ្យធ្វើចត្តាឡីស័កគ្រប់រយៈពេល ១៤ថ្ងៃ នៅខេត្តជាប់ព្រំដែនថៃតែម្តង។ ធ្វើដូច្នេះដើម្បីការពារ ក្រែងលោថ្លោះធ្លោញដោយប្រការណាមួយនាំឲ្យឆ្លងចូលសហគមន៍នៅកម្ពុជាយើងជាថ្មី ។
ចំណាត់ការនេះ ត្រូវបានអនុវត្ត ប្រកបដោយប្រសិទ្ធភាព និងមានទំនុកចិត្តជាងមុន ។ ប៉ុន្តែបណ្តាខេត្តជាប់ព្រំដែនថៃ ក្នុងអំឡុងពេលនេះ និងបន្តទៅមុខទៀត ក៏មិនត្រូវប្រហែស ឬព្រលែងដៃឡើយ ។ មូលហេតុ អ្នកកើតជំងឺកូវីដ១៩ ដែលជាពលករខ្មែរ បន្តរកឃើញជាបន្តបន្ទាប់ ហើយទាល់តែ២-៣ថ្ងៃ រហូតដល់ករណីខ្លះ ៤ថ្ងៃ ទើបលទ្ធផលចេញថែមទៀត ។
ដូច្នេះអំឡុងពេលរង់ចាំលទ្ធផលធ្វើតេស្តនេះ ទាមទារឲ្យអាជ្ញាធរសមត្ថកិច្ចខេត្តជាប់ព្រំដែនទាំងអស់ ត្រូវបង្កើនការយកចិត្តទុកដាក់ខ្ពស់។ ពោលគឺចាប់តាំងពីមាត់ច្រកព្រំដែន រហូតដល់ត្រួតពិនិត្យសុខភាពពលករ និងអ្នកដំណើរមកពីថៃ ត្រូវធ្វើដោយប្រុងប្រយ័ត្នខ្ពស់។ ការដឹកជញ្ជូនចេញពីច្រកព្រំដែន ទៅកាន់មណ្ឌលចត្តាឡីស័ក រួមទាំងការស្នាក់នៅក្នុង មណ្ឌលចត្តាឡីស័ក ក៏ត្រូវរក្សាឲ្យបាននូវវិធានសុខាភិបាល តាមរយៈពាក់ម៉ាសជានិច្ច ឧស្សាហ៍ឲ្យពលករលាងសម្អាតដៃ ពិសេសបាញ់អាល់កុល ឬជែលសម្លាប់មេរោគ និងត្រូវរក្សាគម្លាតជាចាំបាច់ យ៉ាងតិចបំផុត ១ម៉ែត្រកន្លះ ពីម្នាក់ទៅម្នាក់។
នៅពេលតម្រង់ជួរបំពេញបែបបទ ក៏ដូចជាអង្គុយរង់ចាំវាស់កម្តៅ យកវត្ថុសំណាក រហូតដល់ពេលឡើងឡាន ក៏ទាមទារឲ្យរក្សាគម្លាតជាចាំបាច់បំផុត ។ ឡានកងទ័ពដឹកជញ្ជូនពលករ និងអ្នកដំណើរចេញពីច្រកព្រំដែននានា ទៅកាន់មណ្ឌលចត្តាឡីស័ក ក៏កុំដាក់ផ្ទុកមនុស្សច្រើន រហូតដល់ប្រជ្រៀតគ្នាឲ្យសោះ ។ ស៊ូដឹកជញ្ជូនច្រើនជើងចុះ ដើម្បីការពារថា ក្រែងលោមួយក្រុមណានោះ មាននរណាម្នាក់ កើតកូវីដ១៩ ដែលយើងមិនទាន់ដឹងលទ្ធផល តែបើយើងប្រហែសតែបន្តិច នោះអាចនឹងនាំឲ្យមានអ្នកឆ្លងច្រើននាក់ ក្នុងពេលរង់ចាំលទ្ធផលធ្វើតេស្តនេះ ។
មួយវិញទៀត អាជ្ញាធរសមត្ថកិច្ច នៅខេត្តជាប់ព្រំដែនថៃ ពិសេសខេត្តទាំង៦ ដូចបានរៀបរាប់ខាងលើ ក៏ត្រូវចាត់កម្លាំងយាមល្បាតឲ្យបានហ្មត់ចត់ថែមទៀត តាមព្រំដែន ពិសេសនៅច្រករបៀងនានា កុំឲ្យមានអ្នកលួចឆ្លងដែនខុសច្បាប់។ ពេលនេះ តាមច្រកព្រំដែនផ្លូវការ យើងបានគ្រប់គ្រងបានល្អប្រសើរហើយ លើវិធានការរឹតបន្តឹង និងការត្រួតពិនិត្យដោយមិនមាននរណាម្នាក់របូតរួចពីការត្រួតពិនិត្យ និងធ្វើចត្តាឡីស័កនោះទេ ។
ប៉ុន្តែបើសិនជាអាជ្ញាធរសមត្ថកិច្ចប្រហែសតែបន្តិច រួចរបូតពលករណាចូលពីថៃតាមច្រករបៀង ឬក៏ច្រកព្រំដែនណាមួយដោយមិនបានដឹង ហើយចូលក្នុងប្រទេសយើង រហូតដល់ស្រុកកំណើតនោះជាបញ្ហា។ បើសិនជាអ្នកនោះម្នាក់ ឬក៏ច្រើននាក់ មិនមានកើតកូវីដ១៩ មិនអីទេ ។ តែផ្ទុយទៅវិញ បើជននោះ កើតកូវីដ១៩ ហើយមិនបានដឹង បែរជាទៅពួនសម្ងំរហូតដល់ស្រុកកំណើត នោះនឹងនាំឲ្យឆ្លងរាលដាលទៅក្រុមគ្រួសារ ហើយក៏អាចឆ្លងបន្តនៅតាមសហគមន៍ផ្ទៃក្នុងប្រទេសយើងជាមិនខាន ។
ក្នុងករណីមានអ្នកធ្លាយចូលពីថៃ ទៅដល់ផ្ទះនៅស្រុកកំណើតតាមបណ្តាខេត្តនានាមែននោះ ក៏គួរតែបុគ្គលនោះឯង ក៏ដូចជាក្រុមគ្រួសារ ឬក៏អ្នកជិតខាងរាយការណ៍បន្ទាន់ទៅកាន់អាជ្ញាធរភូមិឃុំ-សង្កាត់ ដើម្បីឲ្យគ្រូពេទ្យចុះជួបអប់រំណែនាំ និងយកវត្ថុសំណាកទៅពិនិត្យវិភាគធ្វើតេស្តរកមេរោគកូវីដ១៩ ។ ករណីនេះកើតមានរួចមកហើយ ហើយក៏ត្រូវបានចាត់វិធានការទាន់ពេលវេលានៅមូលដ្ឋានផងដែរ ៕
ចែករំលែកព័តមាននេះ