រាជធានីភ្នំពេញ៖ ក្មេងទំនើងមួយក្រុម មានគ្នាជាង ១០នាក់ ដែលគេដឹងថា រហស្ស​នាម ក្រុម៩៨ ជិះម៉ូតូជាង ១០គ្រឿង ប្រដាប់ទៅដោយដាវសាំងម៉ូរៃ ដេញកាប់យុវជនមួយ​ក្រុម មានគ្នា ៦នាក់ ជិះម៉ូតូ ២គ្រឿង កំពុងអង្គុយហូបប្រហិតចៀន បណ្តាលអោយ​ខូចខាតម៉ូតូនិងរទេះលក់ប្រហិតចៀន បង្កការភ្ញាក់ផ្អើល កាលពីវេលាម៉ោង ១២អាធ្រាត្រ ថ្ងៃទី០៧ ខែមករា ឆ្នាំ២០២១​ តាមបណ្តោយផ្លូវអូរតែលសុខា នៅចំណុចមុខសណ្ឋាគារសុខា ស្ថិតនៅក្នុងសង្កាត់ជ្រោយចង្វារ ខណ្ឌជ្រោយចង្វារ​។

​ជនរងគ្រោះ សូមមិនបញ្ចេញឈ្មោះ បានអោយដឹងថា មុនពេលកើត គាត់មានគ្នា ៥ ទៅ ៦នាក់ ជិះម៉ូតូចំនួន ២គ្រឿង។ ក្នុងនោះ មានម៉ូតូហុងដាឌ្រីម ពណ៌ខ្មៅ ស៊េរី​ឆ្នាំ២០២០​ ពាក់ស្លាកលេខ ភ្នំពេញ1IJ-1266 និងមួយគ្រឿងទៀត ម៉ាកស៊ុយសុគី និច ពណ៌ស ពាក់ស្លាកលេខ កណ្តាល 1AC-8215 បាន​ជិះទៅអង្គុយលេង និងអង្គុយញុំា​ប្រហិតចៀន តាម​រទេះនៅតាមចិញ្ចើមផ្លូវ។ ខណៈពេលដល់ម៉ោងកើតហេតុ ស្រាប់​តែលេចមុខក្មេងទំនើងមួយក្រុម មានគ្នាជាង ២០​នាក់ ជិះម៉ូតូជិត ១០​គ្រឿង មិនចាំ​ម៉ាកនោះទេ គ្រាន់តែដឹងថា មានរហស្សនាមថា ក្រុម៩៨ ប្រដាប់ទៅដោយដាវសាំម៉ូរៃ និងដុំថ្ម ដំបង ឈើជ្រុង រត់ចូលទៅសំដៅកាប់ក្រុមខ្លួន​។ តែដោយសារតែ​ដឹងខ្លួនទាន់ ក៏រត់រួចខ្លួន។ ប៉ុន្តែចៃដន្យអី ម៉ូតូ​ទាំង ២គ្រឿងនោះ ត្រូវបានក្មេងទំនើង ជាជនបង្ក ព្រួតវាយកំទេចខ្ទេចស្ទើរទាំងស្រុងតែម្តង។ រីឯម៉ូតូហុងដាឌ្រីមវិញ រងការខូចខាត​បែកកុងទ័រ និងក្បាំង។ ចំណែកឯរទេះលក់ប្រហិតចៀនវិញ គឺបែកទូកញ្ចក់ដាក់ប្រហិត​ខូចខាត ហើយក្មេងទំនើងទាំងនោះ បានរត់គេចខ្លួនអស់តែម្តង​។

ជនរងគ្រោះ បាននិយាយថា ខ្លួនមិនដែលមានគំនុំជាមួយអ្នកណាទេ ហើយក៏មិនដែល​ធ្លាប់ទៅវ៉ៃអ្នកណាដែរ​។

ក្រោយពេលកើតហេតុ ជនរងគ្រោះ បានទៅដាក់ពាក្យបណ្តឹង នៅប៉ុស្តិ៍ជ្រោយចង្វារ ដើម្បីអោយសមត្ថកិច្ច ចាត់ការទៅតាមផ្លូវច្បាប់​៕ ដោយ៖ យឹម ឈឿន​