ខេត្តសៀមរាប ៖ ប្រអប់កុងទ័រភ្លើងជាង១០នៅក្រោយពេទ្យនាគទេព តាមផ្លូវលោកតាណឺយ ត្រូវបានឆាបឆេះយ៉ាងសន្ធោរសន្ធៅ ហើយត្រូវបានប្រជាពលរដ្ឋរិះគន់ថាសមត្ថកិច្ចពាក់ព័ន្ធគ្មានសមត្ថភាពក្នុងការមកជួយពន្លត់ឱ្យបានទាន់ពេលវេលាដូចពលរដ្ឋត្រូវការ ព្រោះសមត្ថកិច្ចប្រហែលជាកំពុងប្រចាំគ្នា ទើបបណ្តាលកាប៊ីនភ្លើងមួយដើមដែលមានជាង១០ប្រអប់នេះត្រូវបានឆេះស្ទើរអស់ទាំងស្រុង ។
ហេតុការណ៍ឆេះកាប៊ីនភ្លើងនេះធ្វើឱ្យមានការភ្ញាក់ផ្អើលកាលពីវេលាម៉ោង៤ និង៣០នាទីល្ងាច ថ្ងៃទី១៤ ខែកក្កដា ឆ្នាំ២០១៥ ស្ថិតនៅចំណុចផ្លូវក្រោយពេទ្យនាគទេព ក្នុងភូមិវត្តបូព៌ សង្កាត់សាលាកំរើក ក្រុងសៀមរាប ។
ប្រជាពលរដ្ឋបាននាំគ្នារិះគន់ធ្ងន់ៗថា មុនពេលភ្លើងឆេះប្រអប់កុងទ័រភ្លើងនោះ ពួកគាត់បានទូរស័ព្ទទៅហៅខាងអគ្គិសនីឱ្យមកជួយផ្តាច់ភ្លើងកុំឱ្យឆ្លងទៅប្រអប់ផ្សេងទៀតដែរ តែរយៈជាង១ម៉ោងគ្មានឃើញខាងណាមកសោះ តើឱ្យប្រជាពលរដ្ឋជឿទុកចិត្តទៅលើសមត្ថកិច្ចពាក់ព័ន្ធទៀតឬអត់ ។ ប្រជាពលរដ្ឋបានបន្តថា ខណៈពួកគេបានហៅជាលើកទី២នោះ ក៏គ្មានឃើញខាងណាមកដែរ រហូតឆេះឆ្លងពីប្រអប់មួយទៅប្រអប់មួយក្នុងចំណោមជាង១០ប្រអប់នោះ ។ នេះប្រហែលជាមកពីខាងសមត្ថកិច្ចពន្លត់អគ្គិភ័យប្រចាំគ្នាជាមួយខាងអគ្គិសនីហើយមើលទៅ ទើបធ្វើឱ្យឆេះស្ទើរអស់ទាំងស្រុងបែបនេះ ។
ជុំវិញករណីឆេះកាប៊ីនភ្លើងនៅក្រោយពេទ្យនាគទេពខាងលើនោះ លោកវរសេនីយឯក សំ សុជាតិ ស្នងការរងទទួលបន្ទុកពន្លត់ និងបង្ការអគ្គិភ័យ នៃស្នងការនគរបាលខេត្តបានប្រាប់«កោះសន្តិភាព»តាមទូរស័ព្ទនៅល្ងាចថ្ងៃទី១៤ កក្កដានេះថា លោកបានរៀបចំកម្លាំង និងរថយន្តពន្លត់អគ្គិភ័យរួចរាល់ហើយ តែខាងអគ្គិសនីបានប្រាប់មកវិញថា មិនបាច់ចេញរថយន្តទេ ព្រោះអគ្គិសនីបានឱ្យកម្លាំងជំនាញទៅផ្តាច់ចរន្តខ្សែធំរួចរាល់អស់ហើយ មិនអាចឆ្លងទៅប្រអប់កុងទ័រផ្សេងបានទេ ។ លោកបន្តថា ករណីឆេះកាប៊ីនភ្លើងនៅក្រោយពេទ្យនាគទេពស្ទើរអស់ទាំងស្រុងនោះ មិនមែនជាកំហុសខាងលោកទេ ព្រោះអីខាងអគ្គិសនីគេមិនឱ្យចេញឡាន ។
ពាក់ព័ន្ធនឹងរឿងឆេះបង្គោលអគ្គិសនីនេះដែរ «កោះសន្តិភាព»បានទូរស័ព្ទទៅ លោកនិត មន្ត្រីអគ្គិសនីខេត្ត ខណៈពេលភ្លើងកំពុងឆេះនោះ លោកឆ្លើយថា បានបញ្ជូនកម្លាំងទៅបិទប៉ារ៉ែតធំហើយ មិនអីទេ ។
គួររំលឹកផងដែរថា ពលរដ្ឋក្នុងក្រុងសៀមរាបបានរិះគន់យ៉ាងចាស់ដៃទៅលើសមត្ថកិច្ចពាក់ព័ន្ធ ជាពិសេសខាងរថយន្តពន្លត់អគ្គិភ័យ និងខាងអគ្គិសនី ដូចករណីឆេះបង្គោលភ្លើងបណ្តាលមកពីឆ្លងចរន្តអគ្គិសនីនេះជាដើម គ្មានឃើញរថយន្តពន្លត់អគ្គិភ័យ ឬខាងអគ្គិសនីមកជួយពន្លត់ឱ្យបានដូចចិត្តរបស់ប្រជាពលរដ្ឋដែលចង់បាននោះទេ ព្រោះបើគ្មានលុយ ឬគ្មានខ្សែ ពួកគេមិនមកជិត ឬធ្វើជាយឺតយ៉ាវ ណ្តាលមកពីរថយន្តខូច ឬក៏រថយន្ត… ដូចករណីឆេះផ្ទះនៅក្នុងក្រុងសៀមរាបកន្លងទៅជាដើម បើប្រជាពលរដ្ឋហៅតាមទូរស័ព្ទ កំណត់ឱ្យយ៉ាងតិច១ម៉ោង ទៅ២ម៉ោងទើបមកដល់ នេះឬសមត្ថកិច្ចជួយពលរដ្ឋនោះ ៕
ចែករំលែកព័តមាននេះ