ស្នាមអុជខ្មៅគឺជាបញ្ហាសម្រាប់សុខភាពស្បែកពិសេសជាបញ្ហាសម្រាប់សម្ផស្សរបស់ស្ត្រីតែម្តងលែងមានការទាក់ទាញ ដែលចាំបាច់ត្រូវតែរកដំណោះស្រាយឱ្យបានត្រឹមត្រូវ ដើម្បីបំបាត់បញ្ហានេះជាបន្ទាន់
ស្នាមអុជខ្មៅគឺជាបញ្ហាសម្រាប់សុខភាពស្បែកពិសេសជាបញ្ហាសម្រាប់សម្ផស្សរបស់ស្ត្រីតែម្តងលែងមានការទាក់ទាញ ដែលចាំបាច់ត្រូវតែរកដំណោះស្រាយឱ្យបានត្រឹមត្រូវ ដើម្បីបំបាត់បញ្ហានេះជាបន្ទាន់ តែមិនមែនចេះតែទិញផលិតផលយកមកប្រើប្រាស់ដោយគ្មានប្រភពច្បាស់លាស់នោះទេ យកល្អគួររត់រកជំនាញ ។
ជួបជាមួយលោកវេជ្ជបណ្ឌិត ស្រេង រាសី អ្នកឯកទេសផ្នែករោគសើស្បែក នៃគ្លិនិកសើស្បែក និងសម្ផស្ស ស្រេង រាសីបានប្រាប់ឲ្យដឹងថា ស្បែកលោកអ្នកអាចមានស្នាមអុជខ្មៅខុសៗគ្នា ទៅតាមប្រភេទស្នាមនីមួយៗដូចជា៖
-ប្រជ្រុយ ៖ ប្រជ្រុយក៏ធ្វើឱ្យស្បែករបស់លោកអ្នកមានស្នាមអុជខ្មៅដុំតូចៗ ឬធំៗ ហើយក៏មានប្រជ្រុយខ្លះពណ៌ខ្មៅខ្លាំង និងអាចមានឡើងប៉ោងទៀតផង ។ ស្នាមប្រជ្រុយនេះភាគច្រើនមានមកពីកំណើត ប៉ុន្ដែករណីមួយចំនួនក៏អាចកើតមាននៅពេលស្បែកត្រូវកម្តៅថ្ងៃខ្លាំង ។
-អាចម៍រុយ ៖ ភាគច្រើនកើតមានចំពោះជនជាតិអឺរ៉ុបស្បែកស ព្រោះបើស្បែកត្រូវនឹងកម្ដៅថ្ងៃក៏ធ្វើឱ្យស្បែកបញ្ចេញជាតិមេឡានីននាំឱ្យកើតអាចម៍រុយបានដែរ តែភាគច្រើននៅពេលមានអាកាសធាតុត្រជាក់ស្នាមទាំងនោះអាចនឹងបាត់ទៅវិញដោយមិនចាំបាច់ព្យាបាលទេ ។
-ស្នាមជាំ ៖ បើកើតចំពោះស្ដ្រីដែលទើបសម្រាលកូនរួច គឺស្នាមជាំទាំងនោះបណ្ដាលមកពីអ័រម៉ូនដែលមានការបញ្ចេញ មេឡានីនច្រើនធ្វើឱ្យស្ដ្រីទើបសម្រាលកូនមានស្នាមជាំលើផ្ទៃមុខ។ រីឯស្ដ្រីដែលប្រើប្រាស់ថ្នាំពន្យារកំណើតក៏អាចធ្វើឱ្យមានស្នាមជាំផងដែរ ។ មួយទៀតលោកអ្នកដែលមានបញ្ហាពកក៏អាចនាំឱ្យមានស្នាមជាំអុជខ្មៅដែរដោយសារតែអ័រម៉ូនចុះខ្សោយធ្វើឱ្យពណ៌ខ្មៅនៅលើស្បែកកើនឡើង ។
ចំពោះវិធីបំបាត់ស្នាមអុជខ្មៅធ្វើទៅបានតាមរយៈវិធីព្យាបាលដូចជា៖
-ស្នាមប្រជ្រុយបើមិនចាំបាច់លោកអ្នក មិនបាច់កាត់ចោលទេ តែអាចបំបាត់ចេញដោយប្រើឡេស៊ើចៀរវាចេញ ឬដុតចោលតែម្ដងក៏បាន ។
-បញ្ហាអាចម៍រុយ ៖ លោកអ្នកគប្បីទៅជួបពិគ្រោះជាមួយគ្រូពេទ្យជំនាញដើម្បីពិនិត្យ និងព្យាបាលឱ្យបានត្រឹមត្រូវ ។ ប៉ុន្ដែលោកអ្នកអាចប្រើថ្នាំការពារកម្ដៅថ្ងៃ ដើម្បីការពារស្បែកពីពន្លឺថ្ងៃខ្លាំងកាត់បន្ថយកុំឱ្យស្បែកមានស្នាមអុជខ្មៅ។
-ទោះយ៉ាងណាបន្ទាប់ពីព្យាបាលរួច ស្នាមអុជខ្មៅទាំងនោះមិនអាចបាត់ទៅទាំងស្រុងទេ ដោយសារជាតិខ្មៅនៅក្នុងស្បែកមិនទាន់រលុបបាត់អស់ ។
លោកអ្នកគប្បីចងចាំថា នៅពេលដែលកើតមានស្នាមអុជខ្មៅ ឬជាំនៅលើរាងកាយឬកើតមាននៅលើផ្ទៃមុខលោកអ្នកមិនចាំបាច់ប្រើប្រាស់ផលិតផលច្រើនលាយឡំគ្នាទេ ព្រោះបើប្រើខុសកាន់តែមានស្នាមពណ៌ខ្មៅផុសចេញលើសដើម យកល្អគួរស្វែងរកការព្យាបាលមួយដ៏ត្រឹមត្រូវទើបជាការប្រសើរ ៕
ចែករំលែកព័តមាននេះ