ខេត្តកំពង់ស្ពឺ ៖ បើតាមសេចក្តីរាយការណ៍បានឱ្យដឹងថា ស្ត្រីម្នាក់ស៊ីឈ្នូលចាំចម្ការស្វាយឲ្យគេបានបាត់បង់ជីវិតនៅក្នុងថ្លុកឈាមយ៉ាងអាណោចអាធម ដោយសង្ស័យជាអំពើផ្តាច់ជីវិត ហេតុការណ៍នេះបានបង្កឱ្យមានការភ្ញាក់ផ្អើលកាលពីវេលាម៉ោង៥និង៣០នាទីល្ងាច នាថ្ងៃទី១ ខែមករា ឆ្នាំ២០២១ នៅចំណុចអូចោត ស្ថិតក្នុងភូមិដូង ឃុំក្រាំងដីវ៉ាយ ស្រុកភ្នំស្រួច ខេត្តកំពង់ស្ពឺ។
តាមប្រភពព័ត៌មានពីមន្ត្រីកងរាជអាវុធហត្ថស្រុកភ្នំស្រួច បានឲ្យដឹងថា សពស្ត្រីរងគ្រោះខាងលើមានឈ្មោះ ជឹម ផា អាយុ៥៥ឆ្នាំ មានទីលំនៅភូមិព្រៃទទឹង ឃុំក្រាំងដីវ៉ាយ ស្រុកភ្នំស្រួច ខេត្តកំពង់ស្ពឺ និងប្តីឈ្មោះ ពុធ ផាន អាយុ៦៨ឆ្នាំ បច្ចុប្បន្នជាអ្នកចាំចំការស្វាយឱ្យឈ្មោះឡេង ចាន់ថានី (រស់នៅភ្នំពេញ) ក្នុងភូមិ-ឃុំកើតហេតុខាងលើ។
ប្រភពដដែលបានបន្តថា មុនពេលកើតហេតុ បុរសជាប្តីបានចេញពីចំការទៅធ្វើទ្វាររបងផ្ទះឱ្យកូននៅភូមិព្រៃទទឹង ឃុំក្រាំងដឺវ៉ាយ ស្រុកភ្នំស្រួច លុះដល់វេលាម៉ោងជាង៥ល្ងាច ក៏បានវិលមកចំការវិញ តែមិនឃើញប្រពន្ធនៅរោងចាំចំការនោះទេ ក៏ត្រឡប់មករកនៅផ្ទះបងប្អូនក្នុងភូមិក៏មិនឃើញទៀត ទើបបុរសជាប្តីបានទូរស័ព្ទទៅប្រពន្ធ តែចូលជាច្រើនដងគ្មានអ្នកទទួល។
ប្រភពដដែលបន្តទៀតថា បន្ទាប់មក រូបគាត់ (ប្តី) ក៏ត្រឡប់មករកប្រពន្ធនៅចំការវិញ ក៏ស្រាប់តែប្រទះឃើញសពប្រពន្ធដេកបាត់បង់ជីវិតនៅក្នុងថ្លុកឈាមខាងជើងរោងចាំចំការចម្ងាយ២០ម៉ែត្រ រួចគាត់ក៏បានរាយការណ៍ទៅសមត្ថកិច្ចមូលដ្ឋានជំនាញឱ្យចុះមកពិនិត្យតែម្តង។
ប្រភពដដែលបន្តទៀតថា ក្រោយពីកម្លាំងជំនាញធ្វើកោសល្យវិច្ឆ័យរួច បានដាក់ការសង្ស័យថា ជនរងគ្រោះអាចត្រូវជនសង្ស័យយកវត្ថុរឹងវាយក្បាល និងអារ.កទៀតផង។ ក្រោយពីធ្វើសកម្មភាពរួច ជនសង្ស័យបានយកទូរស័ព្ទពីជនរងគ្រោះចំនួន១គ្រឿងម៉ាកViVo រត់គេចខ្លួនបាត់ស្រមោល បន្សល់ទុកតែកូនកាំបិតចិតបន្លែមុខពីរចំនួន១, កាបូបស្ពាយ១ មានប្រាក់រៀលចំនួន៣៦០០០រៀល និងខ្សែ.កមាសមួយខ្សែ។
បច្ចុប្បន្ន សមត្ថកិច្ចកំពុងស្រាវជ្រាវរកមុខជនដៃដល់ហើយ ដើម្បីយកមកផ្តន្ទាទោសទៅតាមច្បាប់ ចំណែកសពស្ត្រីរងគ្រោះបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
ចែករំលែកព័តមាននេះ