ខេត្តបាត់ដំបង ៖ ប្រាសាទបាណន់ជារមណីដ្ឋានទេសចរណ៍វប្បធម៌ធម្មជាតិដែលមានប្រាង្គប្រាសាទបុរាណឈ្មោះ ប្រាសាទបាណន់ ស្ថិតនៅលើកំពូលភ្នំបាណន់ ។ នេះបើតាមទូរទស្សន៍ជាតិកម្ពុជា បានផ្សាយនារសៀលថ្ងៃទី២៨ ខែធ្នូនេះ ។
រមណីយដ្ឋាននេះ ស្ថិតនៅខាងត្បូងទីរួមខេត្ដបាត់ដំបង ដែលមានចំងាយប្រមាណ ២០.២០ គ.ម ដោយគិតចាប់ពីសាលាខេត្ដបាត់ដំបង រហូតទៅដល់ប្រាសាទបាណន់ ។ ភ្ញៀវទេសចរអាចធ្វើដំណើរដោយមធ្យោបាយ រថយន្ដ ម៉ូតូ ចេញពីទីរួមខេត្ដបាត់ដំបងតាមផ្លូវលេខ P១៥៧១ និងផ្លូវលេខ៨០០ អមតាមមាត់ស្ទឹងសង្កែ ។ វាមានទីតាំងស្ថិតនៅក្នុងភូមិបាណន់ ឃុំកន្ទឺពីរ ស្រុកបាណន់ ។
ប្រាសាទបាណន់ បានសាងសង់ឡើងនៅពាក់កណ្ដាលសតវត្សទី១១ និងចុងសតវត្សរ៍ទី១២ ។ ព្រះរាជាដែលបានកសាងមុនគេ គឺព្រះបាទ ឧទយាទិត្យាវរ្ម័នទី២ (១០៥០-១០៦៦) ក្រោយមកត្រូវបានបពា្ចប់ដោយព្រះបាទជ័យវរ្ម័នទី៧ (១១៨១-១២១៩) ។ ប្រាង្គប្រាសាទនេះសង់នៅលើកំពូលភ្នំបាណន់ តំរៀបគ្នាមានលក្ខណៈដូចប្រាសាទអង្គរវត្ដ ប៉ុន្ដែជាសំណង់ដាច់ៗពីគ្នាធ្វើអំពីឥដ្ឋថ្មបាយគ្រាម និងថ្មភក់ ។
លោក HENRY MOUHOT ជាជនជាតិបារាំង ដែលជាអ្នកស្រាវជ្រាវរកឃើញអង្គរវត្ដបានរាយការណ៍ ១៤០ឆ្នាំកន្លងទៅហើយថា ទឹកនៅក្នុងល្អាងដ៏ពិសិទ្ធិ ដែលផឹកវាទៅនាំអោយដឹងដល់អតីតកាល អនាគតកាល និងបច្ចុប្បន្នកាល ។ ឈ្មោះល្អាងក្នុងសម័យនោះ គេហៅថាគុហាព្រះទឹក (ល្អាងទឹកពិសិទ្ធិ)។
រមណីយដ្ឋាននេះមានប្រាសាទនៅលើកំពូលភ្នំ ឯនៅជើងភ្នំមានគូទឹក និងល្អាងសំខាន់ពីរគឺ ល្អាងមួយឈ្មោះ ល្អាងអង្គរបិទមាស មានន័យថា ជញ្ជាំងគ្របដណ្ដប់ដោយមាស ទោះបីគេមិនឃើញមានមាសនៅទីនោះក៏ដោយ អ្នកអាចឃើញទឹកបពោ្ចញពន្លឺផេ្លកៗស្រក់មកពីដំបូលល្អាង និងល្អាងមួយទៀតឈ្មោះល្អាងឈូង ហៅថាឈូងអាជ័យ ។ នៅជើងភ្នំ និងកំពូលភ្នំមានព្រៃឈើតូចធំដុះចំរុះគ្នា យ៉ាងក្រាស់ដែលផ្ដល់ម្លប់ដ៏ត្រជាក់ ។ អ្នកទេសចរអាចស្ដាប់សំលេង សត្វយំយ៉ាងពិរោះរណ្ដំ ស្រូបយកខ្យល់អាកាសបរិសុទ្ធ និងសំរាកកាយនៅក្នុងល្អាងយ៉ាងត្រជាក់ ។ នៅទីធ្លាច្រកចូល មានអាហារដ្ឋាន និងតូបលក់ភោគផលក្នុងស្រុកមានសណ្ដាប់ធ្នាប់និងសន្ដិសុខល្អ ។
លើសពីនេះទៅទៀតភ្ញៀវ ទេសចរណ៍អាចធ្វើដំណើរតាមកាំជណ្ដើរដែលធ្វើអំពីថ្មបាយក្រៀមមានបង្កាន់ដៃនាគ ចាប់ពីជើងភ្នំរហូតទៅដល់កំពូល ភ្នំប្រាសាទ ហើយវាមានដំណាក់សំរាកជើងពីរកន្លែងទៀតផង ។ អី្វដែលសំខាន់ជាងនេះទៅទៀតនោះគឺនៅក្នុងល្អាង នៅលើភ្នំ ជ្រលងភ្នំ មានព្រៃឈើស្រស់ស្អាត និងសត្វជាច្រើនប្រភេទនៅទីនោះផងដែរ។
ក្រៅពីការទស្សនកិច្ចប្រាសាទ ភ្ញៀវទេសចរអាចជិះទូកលេងនៅកស្សិណទឹក ដាក់ចំណីត្រី ទិញផ្លែឈើដែលត្រូវបានដាំដុះក្នុងតំបន់នោះ ព្រមទាំងពិសារអាហារឆ្ញាញ់នៅតាមតូបកញ្ចុះមាត់ទឹកផងដែរ ៕
ចែករំលែកព័តមាននេះ