ខេត្តកំពង់ចាម ៖ ក្រោមការយកចិត្តទុកដាក់ពីសំណាក់ឯកឧត្តម អ៊ុន ចាន់ដា អភិបាលខេត្ត សួនផ្កាស្បៃរឿងមួយមានទំហំធំទូលាយ ត្រូវបានបង្កើតឡើងនៅមាត់ទន្លេក្បែរស្ពានគីហ្ស៊ុណា ក្នុងសង្កាត់វាលវង់ ក្រុងកំពង់ចាម…
ខេត្តកំពង់ចាម ៖ ក្រោមការយកចិត្តទុកដាក់ពីសំណាក់ឯកឧត្តម អ៊ុន ចាន់ដា អភិបាលខេត្ត សួនផ្កាស្បៃរឿងមួយមានទំហំធំទូលាយ ត្រូវបានបង្កើតឡើងនៅមាត់ទន្លេក្បែរស្ពានគីហ្ស៊ុណា ក្នុងសង្កាត់វាលវង់ ក្រុងកំពង់ចាម ។
ជារៀងរាល់ថ្ងៃ នៅទីនេះមានមនុស្សម្នាក្មេងចាស់ ប្រុសស្រី មកកម្សាន្តគយគន់មើលទេសភាពស្រស់បំព្រង ដែលអ្នកខ្លះនៅស្រុកមេមត់ជាប់ព្រំដែនវៀតណាម ក៏មកកម្សាន្តនៅទីនេះដែរហើយតែងតែសរសើរមិនដាច់ពីមាត់ទៀតផង ។ ព្រះភិក្ខុ សុ មនោ គង់នៅវត្តជីរោទ៍ ស្រុកត្បូងឃ្មុំ ខេត្តត្បូងឃ្មុំ មានថេរដីកាថា ព្រះអង្គបានឃើញគេបង្ហោះចែកចាយព្រោងព្រាតតាមបណ្ដាញសង្គម ពីផ្កាស្បៃរឿងដ៏ស្រស់ស្អាតនៅមាត់ទន្លេក្រុងកំពង់ចាម ។
ព្រះអង្គបានឲ្យសេក្ខឌុបតាមម៉ូតូមួយគ្រឿងមកលេងឃើញថា ពិតជាប្លែកភ្នែក និងមានពុទ្ធបរិស័ទ ព្រមទាំងបងប្អូនជិតឆ្ងាយ នាំគ្នាមកថតយកទេសភាពតាមទូរស័ព្ទដៃរៀងៗខ្លួន ក្នុងទឹកមុខស្រស់ញញឹមទៀតផង ។
ព្រះភិក្ខុអង្គនេះមានថេរដីកាទៀតថា តាមការសង្កេតដោយផ្ទាល់ ក្រោមការដឹកនាំរបស់ឯកឧត្តម អ៊ុន ចាន់ដា អភិបាលខេត្ត ពីមួយឆ្នាំទៅមួយឆ្នាំបានធ្វើឲ្យខេត្តមានការរីកចម្រើនគួរឱ្យកត់សម្គាល់ ។
ជាក់ស្ដែង ការដាំផ្កាស្បៃរឿងនៅមាត់ទន្លេក្រុងកំពង់ចាម គឺបានទាក់ទាញមហាជនមកលេងកម្សាន្តច្រើន សូម្បីតែព្រះអង្គផ្ទាល់ពេលបានឃើញផ្កាស្រស់បំព្រងបែបនេះ ធ្វើឲ្យមានអារម្មណ៍ជ្រះថ្លា ហើយគិតថា ពេលណាទំនេរព្រះអង្គនឹងមកលេងម្ដងទៀត ។ អ្នកស្រី អ៊ុន នីតា អាយុ២៥ឆ្នាំ មានទីលំនៅនៅស្រុកមេមត់ ខេត្តត្បូងឃ្មុំ ជាប់ព្រំដែនវៀតណាម និយាយថា នៅពេលបើកទូរស័ព្ទដៃមើលឃើញគេផុសពីផ្កាស្បៃរឿងនៅក្រុងកំពង់ចាម ពិតជាមានភាពស្រស់ស្អាតណាស់ ។
នៅព្រឹកថ្ងៃទី២៦ ខែមេសា ឆ្នាំ២០២៥ គាត់បានធ្វើដំណើរតាមយានយន្តជាមួយនឹងស្វាមីមកកាន់ទីនេះ ។ ពេលមកដល់ឃើញផ្កាច្រើននៅមាត់ទន្លេក្រុងកំពង់ចាម ហើយនិងឃើញផ្ទៃទឹកទន្លេមេគង្គទៀតនោះ គឺកាន់តែមានអារម្មណ៍ស្រឡះ និងរីករាយក្នុងចិត្តឥតឧបមា ។ មិនតែប៉ុណ្ណោះ សួនផ្កាស្បៃរឿងនេះ ពិតជាបានទាក់ទាញភ្ញៀវជាតិ និងអន្តរជាតិ មកកម្សាន្តជាហូរហែទៀតផង ។
លោក ស៊ាន សុគុណ ប្រធានមន្ទីរទេសចរណ៍ខេត្ត មានប្រសាសន៍ថា ក្រោមការដឹកនាំរបស់ឯកឧត្តមអភិបាលខេត្ត បានយកចិត្តទុកដាក់អភិវឌ្ឍន៍ហេដ្ឋារចនាសម្ព័ន្ធនានា ក្នុងខេត្តគួរឲ្យកត់សម្គាល់ ។
ផ្កាស្បៃរឿងដែលដាំនៅមាត់ទន្លេក្រុងកំពង់ចាម ពេលរីកស្រស់បំព្រង ធ្វើឲ្យបងប្អូនដែលមិនទាន់បានឃើញ គឺមានចិត្តមួយត្រូវតែធ្វើយ៉ាងណាចំណាយពេលវេលាដើម្បីមកមើលដោយផ្ទាល់ ។ បើនិយាយពីវិស័យទេសចរណ៍ អ្វីដែលប្លែកនោះ គឺបងប្អូនប្រជាពលរដ្ឋជិតឆ្ងាយតែងតែចង់ដឹងចង់ឃើញ ។
មួយវិញទៀត ថ្នាក់ដឹកនាំក្រសួងទេសចរណ៍បានមកពិនិត្យមើលដោយផ្ទាល់នៅប្រាសាទនគរបាជ័យ ក្នុងស្រុកកំពង់សៀម ដែលពេលខាងមុខគ្រោងបង្កើតរមណីយដ្ឋានទេសចរណ៍មួយ ដើម្បីទាក់ទាញភ្ញៀវជាតិ និងអន្តរជាតិឲ្យមកកម្សាន្ត ៕
ចែករំលែកព័តមាននេះ