ខេត្តតាកែវ ៖ អាចចាត់ទុកជារឿងល្បីមួយ នៅចុងឆ្នាំ២០២០នេះ សម្រាប់គូស្នេហ៍មួយ១គូ បានរៀបការក្លាយជាប្តីប្រពន្ធនិងគ្នា ក្រោយពីបានស្គាល់គ្នាតាមទូរស័ព្ទត្រឹមតែមួយអាទិត្យប៉ុណ្ណោះ ។ អ្វីដែលប្លែកនិងចាប់អារម្មណ៍បំផុតហើយក៏គួរឱ្យអាណិតដែរនោះ គឺបានឃើញកូនកំលោះជាមនុស្សពិការនិងមានមាឌតូចល្អិត ប៉ុន្តែគាត់មានសមត្ថភាពអាចចងចិត្តបេះដូងរបស់កូនក្រមុំមានអាយុ១៩ឆ្នាំ មកលង់ស្រឡាញ់បាន រហូតបាននាំឪពុកម្តាយមកចូលស្តីដណ្តឹង និងរៀបអាពាហ៍ពិពាហ៍តាមប្រពៃណីខ្មែរ ដែលពិធីរៀបការធ្វើឡើងនៅគេហដ្ឋានខាងប្រុស នៅថ្ងៃទី២៤ ធ្នូ ២០២០ ស្ថិតនៅភូមិជ្រោយស្លែង ឃុំគិរីចុងកោះ ស្រុកគិរីវង់ ខេត្តតាកែវ ។
កោះសន្តិភាពបានសុំការអនុញ្ញាតជួបផ្ទាល់ ដោយសុំការសម្ភាសន៍ និងចង់ដឹងពីប្រវត្តិខ្លះៗពីចំណងស្នេហ៍នេះ ។ កូនកម្លោះបានរៀបរាប់ប្រាប់ថា រូបគាត់មានឈ្មោះ ភឿន ចាន់រឹទ្ធ អាយុ៣០ឆ្នាំ រស់នៅភូមិជ្រោយស្លែង ឃុំគីរីចុងកោះ ស្រុកគីរីវង់ ខេត្តតាកែវ ។ លោកជាជនពិការ ដោយសាតែកើតមក គឺតែងតែឈឺមិនឈប់ ទើបក្លាយជាជនពិការបែបនេះ មានឪពុកឈ្មោះ សា វនសុខ អាយុ៥៩ឆ្នាំ និងម្ដាយឈ្មោះ ភោគ សុផល អាយុ៥២ឆ្នាំ លោកមានបងប្អូន៥នាក់ (លោកជាកូនទី៣) ។
កូនកំលោះបានបន្តទៀតថា ចំពោះរឿងរ៉ាវដែលឈានដល់មានការរៀបការនេះ លោកបញ្ជាក់ថា លោកបានប្រើរយៈពេលខ្លីទេ គឺតាមលេខទូរសព្ទ័តេទំនាក់ទំនងជាមួយនារីដែលជាកូនក្រមុំ ឈ្មោះ ហយ មួយ អាយុ១៩ឆ្នាំ រស់នៅភូមិថ្មី ឃុំត្រពាំងចកស្រុកកណ្ដាលស្ទឹង ខេត្តកណ្ដាល ដែលជាកម្មការនីរោងចក្រ។
លោកថា លោកបានទំនាក់ទំនងសាសងស្នេហាជាមួយកូនក្រមុំតាមលេខទូរសព្ទ័រយៈពេលតែមួយសប្ដាហ៍ទេ ធ្វើឱ្យកូនក្រមុំក៏មកបង្ហាញខ្លូនដល់ផ្ទះរបស់លោក ហើយក្រោយពីឃើញមុខមាត់គ្នា គឺពួកយើងរឹតតែស្រលាញ់គ្នាកាន់តែខ្លាំងៗឡើង និងបានឲ្យឪពុកម្ដាយទាំងសងខាងរៀបចំពិធីមង្គលកាភ្លាមៗ ក្នុងរយៈពេលតែមួយខែប៉ុណ្ណោះ។
សម្រាប់កូនក្រមុំវិញ ក៏បានប្រាប់កោះសន្តិភាពដែរថា នាងបានស្រលាញ់គ្នាតាមទូរសព្ទ័ រួចក៏បង្ខំម្ដាយនិងអ៊ុំសុំមកផ្ទះកូនកម្លោះ ព្រោះគាត់ពិការ ចឹងមិនអាចមកដល់ផ្ទះនាងបាននោះទេ។ នាងបានបញ្ជាក់ថា នាងមាននិស្ស័យជាមួយប្ដីនាងដោយមិនបានគិតក្រមាន ឬពិការនោះទេ ហើយថា ក្រោយពីរៀបការរួច នាងមិនទៅធ្វើការរោងចក្រចោលប្ដីនាងទេ គឺសុខចិត្តស៊ីអត់ស៊ីឃ្លានមើលថែប្ដីរបស់នាង ព្រោះប្ដីរបស់នាងធ្វើអ្វីៗមិនកើតនោះទេ។
បើតាមការឲ្យដឹងពីឪពុកម្ដាយខាងកូនកំលោះបានប្រាប់ថា គ្រាន់តែដឹងថា កូនស្រលាញ់គ្នា ពួកគាត់ចាប់ផ្ដើមរៀបចំពិធីមង្គលការ តែក្នុងរយៈពេល១ខែនោះទេ ដោយរៀបចំទទួលភ្ញៀវចំនួន៦០តុ ហើយភ្ញៀវដែលបានចូលរួម គឺលើសពីការប្រៀងទុកហើយចំណងដៃលោកទទួលបាន គឺជិត២០លានរៀល ។
ពិធីមង្គលការរបស់គូស្វាមីភរិយា១គូនេះ កំពុងត្រូវបានល្បីនៅលើបណ្តាញសង្គមយ៉ាងខ្លាំង បន្ទាប់ពីឃើញវីដេអូត្រូវបានបង្ហោះ ។ វីដេអូរៀបការរបស់គាត់ ត្រូវបានគេស៊ែរតៗគ្នាជាច្រើន ដោយមានអ្នកខមមិនថា ពិតជារំភើបនិងអាណិតខ្លាំងណាស់ និងបានជូនពរឱ្យគូស្វាមីភរិយាថ្មីនេះ សូមស្រឡាញ់គ្នាជារៀងរហូតទៀតផង ។
សូមប្រិយមិត្តទស្សនាវីដេអូទាំងអស់គ្នា ៖
ចែករំលែកព័តមាននេះ