រាជធានីភ្នំពេញ ៖ អ្នកតំណាងរាស្ត្រ និងជាអ្នកនាំពាក្យគណបក្សសង្គ្រោះជាតិ (CNRP) លោក យ៉ែម បុញ្ញឫទ្ធិ បានបដិសេធចំពោះការលើកឡើងរបស់អ្នកនាំពាក្យក្រសួងការបរទេសវៀតណាម ពីការប៉ះទង្គិចគ្នានៅខេត្តស្វាយរៀងថា
រាជធានីភ្នំពេញ ៖ អ្នកតំណាងរាស្ត្រ និងជាអ្នកនាំពាក្យគណបក្សសង្គ្រោះជាតិ (CNRP) លោក យ៉ែម បុញ្ញឫទ្ធិ បានបដិសេធចំពោះការលើកឡើងរបស់អ្នកនាំពាក្យក្រសួងការបរទេសវៀតណាម ពីការប៉ះទង្គិចគ្នានៅខេត្តស្វាយរៀងថា បណ្តាលមកពីតំណាងរាស្ត្រគណបក្សសង្គ្រោះជាតិ ព្រះសង្ឃ យុវជនកម្ពុជា ជាក្រុមជ្រុលនិយមដូចការចោទប្រកាន់របស់វៀតណាមនោះទេ ។
ការលើកឡើងរបស់អ្នកនាំពាក្យគណបក្សសង្គ្រោះជាតិនេះគឺតាមរយៈទំព័រហ្វេសប៊ុកផ្ទាល់ខ្លួនបន្ទាប់ពីសេចក្ដីប្រកាសព័ត៌មានរបស់ក្រសួងការបរទេសវៀតណាម ចេញផ្សាយនៅថ្ងៃទី៣០ មិថុនា ២០១៥ ដែលថា តំណាងរាស្ត្រគណបក្សសង្គ្រោះជាតិ ជាអ្នកដឹកនាំនោះ ក្រុមជ្រុលនិយមកម្ពុជាបានសម្រុកចូលវាយប្រហារនាំឲ្យជនជាតិវៀតណាមរបួស៧នាក់។
ឆ្លើយតបនឹងបញ្ហានេះ លោក យ៉ែម បុញ្ញឫទ្ធិ មានប្រសាសន៍ថា តំណាងរាស្ត្រគណបក្សសង្គ្រោះជាតិ ព្រះសង្ឃ យុវជនកម្ពុជា មិនមែនជាជនជ្រុលនិយម ដូចការចោទប្រកាន់របស់វៀតណាមនោះទេ ។ ព្រះសង្ឃ តំណាងរាស្ត្រ យុវជនខ្មែរ គ្រាន់តែចង់ចុះទៅមើលព្រំដែនក្នុងទឹកដីខ្មែរប៉ុណ្ណោះ ហើយបើការបោះបង្គោលព្រំដែននោះ មានតម្លាភាព ហេតុអី្វក៏ចាំបាច់ស្ទាក់ដំណើរ ។ សូមទៅមើលរូបភាព តើទាហានវៀតណាម មានកាន់កាំភ្លើង ឬអត់ ? មានកាន់ដំបង ឬអត់ ? តើយុវជនខ្មែរដែលចូលរួមទាំងប៉ុន្មាន គាត់មានអាវុធ ឬក៏អត់ ? ដូច្នេះការចោទប្រកាន់នេះមិនត្រឹមត្រូវទេ។
យោងតាមប្រព័ន្ធផ្សព្វផ្សាយក្នុងស្រុកមួយ បានស្រង់សម្តីអ្នកនាំពាក្យក្រសួងការបរទេសវៀតណាម លោក ឡេ ហាយប៊ិញ ដែលបានថ្លែងនៅក្នុងសេចក្ដីប្រកាសនោះថា យើងខ្ញុំសូមរិះគន់យ៉ាងខ្លាំងចំពោះសកម្មភាពហិង្សា ដែលប្រព្រឹត្តដោយជនជ្រុលនិយមកម្ពុជា ដោយល្មើសច្បាប់ប្រទេសទាំងពីរ គឺសន្ធិសញ្ញា អនុសញ្ញា និងកិច្ចព្រម ព្រៀងរវាងប្រទេសវៀតណាម និងកម្ពុជា ធ្វើឲ្យប៉ះពាល់ដល់ដំណើរការបោះបង្គោលព្រំដែន និងទំនាក់ទំនងដ៏ល្អរវាងវៀតណាម និងកម្ពុជា ។ លោកបានអំពាវនាវឲ្យស្ថាប័នពាក់ព័ន្ធរបស់កម្ពុជា ត្រូវមានវិធានការទប់ស្កាត់កុំឲ្យសកម្មភាពដដែលនេះកើតឡើងទៀត ។
គួរបញ្ជាក់ថា កាលពីថ្ងៃទី២៩ មិថុនា កន្លងមក លោក ខៀវ សុភ័គ មន្ត្រីនាំពាក្យក្រសួងមហាផ្ទៃ មានប្រសាសន៍ថា តំបន់ដែលប៉ះទង្គិចគ្នានោះ គឺគណៈកម្មការព្រំដែននៃប្រទេសទាំងពីរ មិនទាន់ដោះស្រាយចប់នៅឡើយទេ ហើយក្រសួងការបរទេសកម្ពុជា ក៏ធ្លាប់ធ្វើកំណត់ទូតទៅវៀតណាមដែរ ។ ទោះជាយ៉ាងនេះក្ដី លោកសោកស្ដាយ និងថ្កោលទោសចំពោះការប្រើអំពើហិង្សានៅជិតតំបន់ព្រំដែននោះ ។ លោកកោតសរសើរចំពោះស្មារតីស្នេហាជាតិរបស់ពលរដ្ឋខ្មែរ ក្នុងការការពារព្រំដែន និងបូរណភាពទឹកដី ប៉ុន្តែការប្រើហិង្សា និងអាវុធ រឹតតែធ្វើឲ្យមានបញ្ហាស្មុគស្មាញមិនអាចដោះស្រាយបាន ។ លោកថា មានតែការចរចាតាមច្បាប់អន្តរជាតិទេ ដែលអាចដោះស្រាយបានប្រយោជន៍ជាតិរៀងខ្លួន ។
កាលពីថ្ងៃទី២៨ មិថុនា លោក ថាច់ សេដ្ឋា នាយកប្រតិបត្តិសហគមន៍ខ្មែរកម្ពុជាក្រោម សហការជាមួយសម្ព័ន្ធយុវជនខ្មែរ ដើម្បីលទ្ធិប្រជាធិបតេយ្យ បានដឹកនាំយុវជន ព្រះសង្ឃ តំណាងរាស្ត្រគណបក្សសង្គ្រោះជាតិ និងពលរដ្ឋប្រមាណ ២០០អង្គ-នាក់ ទៅពិនិត្យបង្គោលព្រំដែនលេខ២០៣ ត្រង់ចំណុចភូមិធ្លក ឃុំត្នោត ស្រុកកំពង់រោទ៍ ខេត្តស្វាយរៀង ដែលគេសង្ស័យថា វៀតណាមរំកិលចូលដីខ្មែរប្រមាណ១០គីឡូម៉ែត្រពីបង្គោលចាស់ ។ ខណៈពេលនោះក៏មានការប៉ះទង្គិចគ្នាមួយប្រាវ បណ្តាលឲ្យមានរបួសទាំងសងខាង ៕
ចែករំលែកព័តមាននេះ