ប្រទេសថៃ ៖ ប្រទេសថៃកំពុងតែមានការព្រួយបារម្ភលើប្រភពថ្មីនៃការឆ្លងវីរុស COVID-19 ចេញពីផ្សារលក់គ្រឿងសមុទ្រដ៏ធំមួយរបស់ប្រទេស ស្ថិតនៅជិតក្រុងបាងកក ។
អាជ្ញាធរថៃប្រកាសនាថ្ងៃទី២០ ខែធ្នូ ឆ្នាំ២០២០ ថា ដើម្បីប៉ុនប៉ង់ទប់ការឆ្លងមនុស្សជាង១ម៉ឺននាក់នឹងត្រូវធ្វើតេស្ត ។ សរុបមានអ្នកឆ្លងវីរុស៦៨៩នាក់ ទាក់ទិននឹងកំពង់ផែ និងផ្សារលក់គ្រឿងសមុទ្រ MAHACHAI ជិតក្រុងបាងកក ត្រូវបានរកឃើញចាប់តាំងពីរកឃើញស្ថ្រីអ្នកលក់បង្គារអាយុ៦៧ឆ្នាំម្នាក់ធ្វើតេស្តឃើញលទ្ធផលវិជ្ជមាននៃការឆ្លងកាលពីថ្ងៃទី១៧ ធ្នូមក ។
អ្នកឆ្លងភាគច្រើនជាជនជាតិមីយ៉ាន់ម៉ា ដែលមកធ្វើការនៅក្នុងផ្នែកសេដ្ឋកិច្ចគ្រឿងសមុទ្រដែលពេញនិយម ។ អាជ្ញាធរថៃបានចេញបញ្ជាដល់បណ្ដាពលករមីយ៉ាន់ម៉ាឲ្យស្ថិតក្នុងលំនៅឋានពួកគេនៅជុំវិញផ្សារកុំចេញក្រៅ ។
ក្រសួងសុខាភិបាលថៃ និយាយថា ពួកពលករទាំងនោះនឹងទទួលស្បៀងនិងទឹកពីអាជ្ញាធរ ។ ផ្នែកត្រួតពិនិត្យជំងឺថៃនឹងប្រមូលមនុស្សក្នុងសហគមន៍ជាច្រើនដល់ទៅជាង១០.៣០០នាក់ដើម្បីធ្វើតេស្ត ដែលមិនគិតប្រាក់សម្រាប់ពលករអន្តោប្រវេសន៍ ដែលការធ្វើតេស្តបន្តរហូតដល់ថ្ងៃទី២៣ ធ្នូ្ន ។ នៅជុំវិញផ្សារនោះ ត្រូវដាក់បម្រាមគោចរយ៉ាងម៉ឺងម៉ាត់បំផុត ៕ ដកស្រង់ចេញពីវេបសាយ ៖ leparisien
ចែករំលែកព័តមាននេះ