ខេត្តកំពង់ឆ្នាំង ៖ ត្រីសម្រាប់ធ្វើប្រហុកផ្អក ចាប់ផ្ដើមសំបូរហើយ មន្ទីរជំនាញអំពាវនាវឲ្យបងប្អូនប្រជាពលរដ្ឋរួសរាន់មកធ្វើត្រីប្រហុកនៅតាមគោលដៅមួយចំនួនក្នុងខេត្តកំពង់ឆ្នាំង នេះជាការបញ្ជាក់របស់ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំងបានប្រាប់ភ្នាក់ងារកោះសន្តិភាព នៅព្រឹកថ្ងៃទី 21 ខែធ្នូ…
ខេត្តកំពង់ឆ្នាំង ៖ ត្រីសម្រាប់ធ្វើប្រហុកផ្អក ចាប់ផ្ដើមសំបូរហើយ មន្ទីរជំនាញអំពាវនាវឲ្យបងប្អូនប្រជាពលរដ្ឋរួសរាន់មកធ្វើត្រីប្រហុកនៅតាមគោលដៅមួយចំនួនក្នុងខេត្តកំពង់ឆ្នាំង នេះជាការបញ្ជាក់របស់ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំងបានប្រាប់ភ្នាក់ងារកោះសន្តិភាព នៅព្រឹកថ្ងៃទី 21 ខែធ្នូ នេះ ។
លោក ងិន ហ៊ុន ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំងបានបញ្ជាក់ថា នៅព្រឹកថ្ងៃទី 21 ខែធ្នូនេះ ត្រីប្រហុកបានត្រូវជាបណ្ដើរៗហើយសង្ឃឹមថា ចាប់ពីថ្ងៃទី 22 រហូតដល់ថ្ងៃទី២៩ ត្រូវនឹងថ្ងៃ15 កើតខែបុស្ស ត្រីនឹងបន្តត្រូវរហូតជាបន្តបន្ទាប់ ។
យ៉ាងនេះក្តី លោកប្រធានមន្ទីរកសិកម្ម បានលើកឡើងថា គិតត្រឹមថ្ងៃ 21 ខែធ្នូនេះ ត្រីប្រហុកនៅមានតម្លៃថ្លៃនៅឡើយ ក្នុងនោះត្រីធំបន្តិច មួយគីឡូក្រាមថ្លៃ 5.000 ទៅ 5500រៀល ។ ត្រីតូចថ្លៃពី3000 ទៅ 3500 រៀលក្នុងមួយគីឡូក្រាម ។
ចំពោះការនេសាទរបស់បងប្អូនប្រជាពលរដ្ឋវិញក្នុងទូកដាក់មងបណ្ដែតក្នុងមួយជើងបានត្រីពី 30 ទៅ 50 គីឡូក្រាម ។ យ៉ាងនេះក្តី លោកហិន ហ៊ុន ក៏បានបញ្ជាក់ដែរថា ត្រីសម្រាប់ធ្វើប្រហុកផ្អកឆ្នាំនេះបានយឺតយ៉ាវអូសបន្លាយរយៈពេល 1ខែ ដោយសារការបម្រែបម្រួលអាកាសធាតុ និងរបបទឹកទន្លេមេគង្គ ។
ជាមួយគ្នានេះ ក្នុងនាមមន្ទីរជំនាញជំនាញ សូមអំពាវនាវដល់ប្រជាពលរដ្ឋដែលមានបំណងធ្វើត្រីប្រហុក សូមប្រញាប់រួសរាន់ឡើង ព្រោះផុតខ្នើតនេះទៅត្រីអាចនឹងមិនសម្បូរឡើងវិញវិញទេ ។ សម្រាប់បងប្អូនចង់ធ្វើត្រីប្រហុកនៅខេត្តកំពង់ឆ្នាំង មាននៅចំណុចឆ្នុកទ្រូ ស្រុកបរិបូណ៌ ចំណុចកំពង់ប្រសាទ និងកំពុងត្រឡាចក្រោម ស្រុកកំពង់ត្រឡាច ។
ជាមួយគ្នានេះដែរ លោកក៏សូមអំពាវនាវដល់អាជ្ញាធរដែនដីដែលមានកន្លែងសម្រាប់ធ្វើត្រីប្រហុកសូមជួយសម្រួលការពារសុវត្ថិភាពដល់ប្រជាពលរដ្ឋដែលមកដេករង់ចាំធ្វើត្រីប្រហុកផងដែរ ៕
ចែករំលែកព័តមាននេះ