ខេត្តស្វាយរៀង ៖ បើតាមសេចក្តីរាយការណ៍បឋមបានឱ្យដឹងថា បើគិតត្រឹមម៉ោង៦និង១០នាទីព្រឹក ថ្ងៃទី២០ ខែធ្នូ ឆ្នាំ២០២០នេះ មុខសញ្ញាជនសង្ស័យដែលជាត្រូវជាប្អូនប្រុសបាញ់សម្លា.ប់បងប្រុសបង្កើតរបស់ខ្លួន ព្រោះតែខឹងជាមួយបងប្រុសចេះដឹងរឿងប្រពន្ធពេកនោះ ពេលនេះចាប់ខ្លួនបានហើយ ស្ថិតនៅភូមិត្រពាំងត្រាច ឃុំស្វាយតាយាន ស្រុកកំពង់រោទិ៍ ខេត្តស្វាយរៀង។
សេចក្តីរាយការណ៍បន្តថា ជនសង្ស័យជាប្អូនប្រុសខាងលើមានឈ្មោះ ឆាយ សាលាភ ភេទប្រុស អាយុ៣៦ឆ្នាំ ជនជាតិខ្មែរ មុខរបរលក់ផលិតផលតាមអនឡាញ មានទីលំនៅភូមិព្រែកខ្សេវ សង្កាត់រកាខ្ពស់ ក្រុងតាខ្មៅ ខេត្តកណ្តាល ចំណែកជនរងគ្រោះឈ្មោះ ឆាយ សៀមមី អាយុ៤៣ឆ្នាំ មុខរបរជាងភ្លើង មានទីលំនៅភូមិកាហេ ឃុំកាហេ ស្រុកកងមាស ខេត្តកំពង់ចាម។
សេចក្តីរាយការណ៍បន្តថា មុនពេលឃាត់ខ្លួន គឺខណៈពេលក្រោយពីជនសង្ស័យជាប្អូនប្រុសបានបាញ់សម្លា.ប់បងប្រុសបង្កើតខ្លួនឯង ព្រោះតែខឹងជាមួយបងប្រុសចេះដឹងរឿងប្រពន្ធនោះ ដែលជនសង្ស័យប្រព្រឹត្តិកាលពីថ្ងៃទី១៩ ខែធ្នូ ឆ្នាំ២០២០ នៅភូមិព្រែកខ្សេវ សង្កាត់រកាខ្ពស់ ក្រុងតាខ្មៅ ខេត្តកណ្តាល ហើយក៏រត់គេចមកលាក់ខ្លួននៅផ្ទះរបស់ឈ្មោះម៉ា ឈិត ហៅយុ ភេទប្រុស នៅភូមិត្រពាំងត្រាច ឃុំស្វាយតាយាន ស្រុកកំពង់រោទិ៍ ខេត្តស្វាយរៀងតែម្តង ។
សេចក្តីរាយការណ៍បន្តទៀតថា លុះដល់ថ្ងៃទី២០ ខែធ្នូ ឆ្នាំ២០២០ វេលាម៉ោង៦និង១០នាទីព្រឹក លោកឧត្តមសេនីយ៍ត្រី កុយ សុភាព បានដឹកនាំកម្លាំងជំនាញការិយាល័យព្រហ្មទណ្ឌកម្រិតធ្ងន់ និងកម្លាំងអធិការដ្ឋានគរបាលស្រុកកំពង់រោទិ៍ សហការជាមួយសមត្ថកិច្ចនគរបាលខេត្តកណ្តាល ដឹកនាំដោយលោកឧត្តមសេនីយ៏ត្រី រឿន ណារ៉ា ស្នងការរងទទួលផែនការងារនគរបាលព្រហ្មទណ្ឌ ដោយមានការសម្របសម្រួលពីលោកព្រះរាជអាជ្ញាអមសាលាដំបូងខេត្តស្វាយរៀងទៀត បានឃាត់ខ្លួនមុខសញ្ញាជនសង្ស័យត្រូវជាប្អូនដែលរត់គេចមកលាក់ខ្លួននៅផ្ទះរបស់ឈ្មោះម៉ា ឈិត ហៅយុ ក្នុងនៅភូមិត្រពាំងត្រាច ឃុំស្វាយតាយាន ស្រុកកំពង់រោទិ៍ ខេត្តស្វាយរៀង ។
បច្ចុប្បន្នជនជនសង្ស័យ ត្រូវបានបញ្ជូនមកដល់ការិយាល័យជំនាញខេត្ត ដើម្បីបំពេញនីតិវិធី រួចប្រគល់ជូនសមត្ថកិច្ចនគរបាលខេត្តកណ្តាល ដើម្បីចាត់ការតាមច្បាប់។ ចំណែកសំភារៈ ដែលដកហូតបានរួមមាន ម៉ូតូមួយគ្រឿងម៉ាកស៊ីរូស ពណ៌ខ្មៅតែមក្រហម ពាក់ស្លាក លេខ វៀតណាម 84-G1 019.40 និងទូរស័ព្ទមួយគ្រឿងម៉ាកហាវ៉េ ពណ៌ខ្មៅផងដែរ ។
គួររំលឹកថា កាលពីថ្ងៃទី១៩ ខែធ្នូ ឆ្នាំ២០២០២ វេលាម៉ោង៧និង១០នាទីព្រឹកនៅចំណុចផ្ទះជនសង្ស័យស្ថិតនៅក្នុងព្រែកខ្សេវ សង្កាត់រកាខ្ពស់ ក្រុងតាខ្មៅ ខេត្តកណ្តាលបានបាញ់សម្លា.ប់បងប្រុសបង្កើតរបស់ខ្លួន ព្រោះតែខឹងនឹងបងប្រុសចេះដឹងរឿងប្រពន្ធខ្លួនពេក ។
គួររំលឹកបន្តថា មុនពេលកើតហេតុ ជនសង្ស័យជាមនុស្សប្រើប្រាស់គ្រឿងញៀន ហើយតែងតែឈ្លោះ គ្នាជាមួយប្រពន្ធ រឿងរកស៊ីលក់ផលិតផលតាមអនឡាញ ។ លុះមកដល់ថ្ងៃទី១៨ខែធ្នូ វេលាម៉ោង៤រសៀល ជនសង្ស័យក៏បានឈ្លោះប្រកែកជាមួយប្រពន្ធទៀត ពេលនោះ ជនរងគ្រោះជាបងប្រុសបានចូលទៅជួយសម្របសម្រួលឲ្យឈប់ឈ្លោះគ្នា តែពេលនោះជនសង្ស័យបែរជាខឹងថា ជនរងគ្រោះចេះដឹងរឿងប្តីប្រពន្ធរបស់គេ ចង់បំបែកបាក់ប្តីប្រពន្ធគេទៅវិញ ។
គួររំលឹកបន្តទៀតថា លុះមកដល់ម៉ោង៤ទៀបភ្លឺថ្ងៃទី១៩ ខែធ្នូ ជនសង្ស័យបានតេទូរស័ព្ទហៅជនរងគ្រោះពីខេត្តកំពង់ចាម ឲ្យឡើងមកជួបនៅផ្ទះរបស់ខ្លួននៅភូមិព្រែកខ្សេវ សង្កាត់រកាខ្ពស់ ក្រុងតាខ្មៅ ខេត្តកណ្តាល ដើម្បីនិយាយគ្នាបន្តិច។ ខណៈពេលជនរងគ្រោះបានជិះម៉ូតូឡើងមកជួបជនសង្ស័យតាមការណាត់ តែនៅពេលមកដល់មិនទាន់បាននិយាយអ្វីផង ក៏ត្រូវជនសង្ស័យដកកាំភ្លើងខ្លីម៉ាកឡុក Lock 98 បាញ់ទៅលើជនរងគ្រោះត្រូវចំក្រោមក្លៀកខាងស្តាំធ្លាយគ្រាប់ទៅក្រោយ មានរបួសស្នាមយ៉ាងធ្ងន់ធ្ងរ ហើយជនសង្ស័យក៏រកបាញ់ឪពុកក្មេកទៀតតែមិនផ្ទុះ ក៏បានប្រវាយប្រតប់គ្នា រហូតជ្រុះកាំភ្លើងខ្លី ហើយក៏ត្រូវឪពុកក្មេកយកបាន ចំណែកជនសង្ស័យក៏បានគេចខ្លួន រួចឡើងជិះម៉ូតូ scoopy ពណ៌ក្រហម ស្លាកលេខ ភ្នំពេញ 9941 ដោយជិះឡើងមកតាខ្មៅ ដើម្បីគេចខ្លួនសំដៅមក ភ្នំពេញតែម្តង ។
គួរបញ្ជាក់ថា បើតាមឱ្យដឹងពីមន្ត្រីតុលាការបានបង្ហើបថា ជនសង្ស័យជាឃាត.ករដែលបានបាញ់សម្លា.ប់បងបង្កើតរបស់ខ្លួននេះ កន្លងទៅធ្លាប់ជាប់ពាក់ព័ន្ធនឹងបទល្មើសករណីហិង្សាមានស្ថានទម្ងន់ទោស និងប្រើប្រាស់អាវុធខុសច្បាប់តៀតផង។ ប៉ុន្តែឃុំខ្លួនបានត្រឹមតែ ២១ថ្ងៃ តុលាការក៏ធ្វើការដោះលែងវិញ លុះចុងក្រោយបុគ្គលរូបនេះបានបន្តនិទណ្ឌភាពនៃការប្រព្រឹត្តបទល្មើសឧក្រិដ្ឋ គឺបាញ់សម្លា.ប់បងប្រុសរបស់ខ្លួនដល់ផ្ទះតែម្តង ។ ដូច្នេះស្ថាប័នតុលាការគួរពិចារណា ធ្វើការថ្លឹងថ្លែង មុននឹងធ្វើការដោះលែងជនត្រូវចោទរូបនេះ ចៀសវាងការធ្វើសកម្មភាពនៅតែបន្តកើតមានក្នុងសង្គម៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ