កូនប្រុសពៅសម្តេច សុខ អាន ត្រូវបានតែងតាំងជាអនុរដ្ឋលេខាធិការក្រសួងទេសចរណ៍
- ភ្នំពេញ
ភ្នំពេញ៖ ព្រះករុណា ព្រះមហាក្សត្រ សម្តេចព្រះបរមនាថ នរោត្តម សីហមុនី បានចេញព្រះរាជក្រឹត្យ ចុះថ្ងៃទី១៥ ខែធ្នូ ឆ្នាំ២០២០…
ភ្នំពេញ៖ ព្រះករុណា ព្រះមហាក្សត្រ សម្តេចព្រះបរមនាថ នរោត្តម សីហមុនី បានចេញព្រះរាជក្រឹត្យ ចុះថ្ងៃទី១៥ ខែធ្នូ ឆ្នាំ២០២០ ត្រាស់បង្គាប់ តែងតាំងមុខតំណែងលោក សុខ សង្វារ ជាអនុរដ្ឋលេខាធិការ នៃក្រសួងទេសចរណ៍។
លោក សុខ សង្វារ នៅឆ្នាំ២០២០នេះ មានអាយុ ៣៣ឆ្នាំ ជាកូនប្រុសពៅរបស់សម្តេច សុខ អាន ត្រូវបានតែងតាំងជាអគ្គនាយករង អាជ្ញាធរ ដើម្បីការពាររមណីយដ្ឋាន និងរៀបចំតំបន់អង្គរ ហៅកាត់ថា «អាជ្ញាធរអប្សរា» កាលពីថ្ងៃទី២៨ ខែឧសភា ឆ្នាំ២០១៥។ លោក សុខ សង្វារ បានបន្តការងារជាអគ្គនាយករងអាជ្ញាធរជាតិអប្សរា មកដល់សព្វថ្ងៃ។
ដោយឡែក កូនប្រុសច្បងរបស់សម្តេច សុខ អាន ដែលជាកូនប្រសាររបស់សម្តេចតេជោ នាយករដ្ឋមន្ត្រី ហ៊ុន សែន គឺលោក សុខ ពុទ្ធិវុធ ជាអតីតប្រធានសហព័ន្ធស្រូវអង្ករកម្ពុជា ត្រូវបានតែងតាំងជាអនុរដ្ឋលេខាធិការក្រសួងប្រៃសណីយ៍ និងទូរគមនាគមន៍។ នៅថ្ងៃទី២៩ ខែកញ្ញា ឆ្នាំ២០១៨ ព្រះមហាក្សត្រ បានចេញព្រះរាជក្រឹត្យ ត្រាស់បង្គាប់ដំឡើងឋានៈ លោក សុខ ពុទ្ធិវុធ ជារដ្ឋលេខាធិការ នៃក្រសួងប្រៃសណីយ៍ និងទូរគមនាគមន៍។ លោក សុខ ពុទ្ធិវុធ បានបន្តការងារជារដ្ឋលេខាធិការ នៃក្រសួងប្រៃសណីយ៍ និងទូរគមនាគមន៍ រហូតដល់សព្វថ្ងៃ។
សូមរម្លឹកថា សម្តេចវិបុលបញ្ញា សុខ អាន បានទទួលមរណភាព កាលពីថ្ងៃទី១៥ ខែមីនា ឆ្នាំ២០១៧ ក្នុងជន្មាយុ ៦៦ឆ្នាំ។ សម្តេច សុខ អាន និងលោកជំទាវ ថេង អាយអាន្នី មានកូន ៥នាក់ ( ស្រីម្នាក់ និងកូនប្រុស ៤នាក់ ) រួមមាន៖ ១-លោកស្រី សុខ សូម៉ា ( អាយុ ៤១ឆ្នាំ ) ២-លោក សុខ ពុទ្ធិវុធ ( អាយុ ៤០ឆ្នាំ ) ៣-លោក សុខ សូកាន ( ៣៧ឆ្នាំ ) ៤-លោក សុខ សូកេន ( ៣៧ឆ្នាំ ) ៥-លោក សុខ សង្វារ ( អាយុ ៣៣ឆ្នាំ )។
ក្នុងនោះ កាលពីថ្ងៃទី១៦ ខែធ្នូ ឆ្នាំ២០២០ ព្រះករុណា ព្រះមហាក្សត្រ បានចេញព្រះរាជក្រឹត្យ ត្រាស់បង្គាប់តែងតាំងលោក សុខ សូកាន ដែលជាតំណាងរាស្ត្រមណ្ឌលខេត្តតាកែវ ជារដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់។
ដោយឡែក លោក សុខ សូកេន ជាកូនភ្លោះនឹងលោក សុខ សូកាន ជាអនុប្រធាននាយកដ្ឋានគណៈកម្មាធិការវិនិយោគ នៃក្រុមប្រឹក្សាអភិវឌ្ឍន៍កម្ពុជា ( គិតត្រឹមពេលសម្តេច សុខ អាន ទទួលមរណភាព កាលពីថ្ងៃទី១៥ ខែមីនា ឆ្នាំ២០១៧ )៕
ចែករំលែកព័តមាននេះ