ខេត្តសៀមរាប ៖ ក្នងគោលបំណងការពារការកាន់កាប់ដោយខុសច្បាប់ពីឈ្មួញទិញលក់ដីធ្លីនៅតំបន់បុរាណដ្ឋាន ក្រុមការងារបច្ចេកទេសនៃនាយកដ្ឋានអភិរក្សប្រាសាទក្រៅឧទ្យានអង្គរ បានសហកាជាមួយមន្ទីរវប្បធម៌ស្រុក រដ្ឋបាលស្រុក អាជ្ញាធរភូមិ ឃុំ ដោយមានការចូលរួមពីប្រជាការពារភូមិ និងប្រជាជនមួយចំនួន បានបន្តការងារបោះបង្គោលព្រំការពារបុរាណដ្ឋាន នៅក្នុងភូមិល្វា ឃុំស្រែណូយ ស្រុកវ៉ារិន ខេត្តសៀមរាប បានចំនួន៨ទីតាំងហើយ កាលពីថ្ងៃទី១២ ខែធ្នូ ឆ្នាំ២០២០ កន្លងទៅ ។
អាជ្ញាធរជាតិអប្បរា បានបន្តថា បុរាណដ្ឋានទាំង៨ទីតាំងនោះមានដូចជា ប្រាសាទអូរប្រាសាទ ប្រាសាទរលំដូនមោង ប្រាសាទត្រពាំងឈូក គោកពពូល ត្រពាំងបេង ត្រពាំងចង្ហុកក្រាំង ត្រពាំងរលំវែង និងត្រពាំងគុម្ពភ្នៀង។
ការបោះបង្គោលព្រំការពារបុរាណដ្ឋាន គឺដើម្បីជាប្រយោជន៍ក្នុងការកំណត់ព្រំដី ដែលមានបុរាណដ្ឋានត្រូវការពារបានត្រឹមត្រូវ ការពារការកាន់កាប់ដោយខុសច្បាប់ពីឈ្មួញទិញលក់ដីធ្លី និងងាយស្រួលសម្រាប់ប្រជាពលរដ្ឋដឹងកុំឱ្យពួកគាត់វាទទីដី ធ្វើកសិកម្មឬរស់នៅលើប្រាសាទ ស្រះទឹក និងរចនាសម្ពន្ធសំណង់បុរាណផ្សេងៗដោយពុំដឹង ព្រោះពួកគាត់ក៏មានបំណងចង់ការពារឱ្យបុរាណដ្ឋានទាំងនោះឱ្យល្អប្រសើរដែរ។
តាមរយៈអាជ្ញាធរជាតិអប្សរាកន្លង តែងតែមានការលក់ដូរដីធ្លី ក្នុងតំបន់រមណីយដ្ឋានអង្គរ ដែលជាបេតិកភណ្ឌពិភពលោក ហើយអាជ្ញាធរជាតិក៏បាន ក្រើនរំលឹកជាច្រើនលើកច្រើនសាដល់បុគ្គលដែលប្រកាសលក់ដូរដីធ្លីក្នុងតំបន់រមណីយដ្ឋានអង្គរ ថាអាចនឹងប្រឈមវិធានការផ្លូវច្បាប់ប្រសិនបើមិនបញ្ឈប់។
គួរបញ្ជាក់ផងដែរថា លោក ឡុង កុសល អ្នកនាំពាក្យអាជ្ញាធរជាតិអប្សារា ធ្លាប់បានបញ្ជាក់ប្រាប់សារព័ត៌មានកោះសន្តិភាព ដូចនេះថា ផ្ទៃដីទំហំប្រមាណជា ៤០១ គីឡូរម៉ែត្រក្រឡា ដែលលាតសន្ធឹង ក្នុងភូមិសាស្ត្រ ៥ ក្រុង និងស្រុក ដែលមានផ្នែកខ្លះនៃ ក្រុងសៀមរាប ស្រុកប្រាសាទបាគង ស្រុកពួក ស្រុកបន្ទាយស្រី និងស្រុកអង្គរធំ និងនៅមានកន្លែងផ្សេងទៀត ដូចជា ទួលបុរាណ ប្រសាទបុរាណ និងបឹងបុរាណ គឺដែនដែលយើងត្រូវអភិរក្ស៕
ចែករំលែកព័តមាននេះ