ខេត្តកំពង់ឆ្នាំង៖ បុរស២នាក់បានស្លាប់នៅនឹងកន្លែង ក្នុងករណីគ្រោះថ្នាក់ចរាចរណ៍មួយបានកើតឡើង នៅ រសៀលថ្ងៃទី០៦ ខែធ្នូ ឆ្នាំ២០២០ លើកំណាត់ផ្លូវជាតិលេខ៥៣ ចន្លោះបង្គោលគីឡូម៉ែត្រលេខ២០-២១ ស្ថិតក្នុងភូមិសាស្ត្រភូមិត្រពាំងព្រីង ឃុំអភិវឌ្ឍន៍ ស្រុកទឹកផុស ខណៈដែលរថយន្ត ហាយឡេនឌ័រព្យាយាមវ៉ារថយន្តមួយគ្រឿងជ្រុលទៅបុកនឹងម៉ូតូជនរងគ្រោះ។ ប្រភពពីសមត្ថកិច្ចនគរបាលនៅកន្លែងកើតហេតុបានបញ្ជាក់ថា គ្រោះថ្នាក់ចរាចរណ៍បង្កឡើងដោយរថយន្តម៉ាក ហាយឡេនឌ័រ ពណ៌ទឹកប្រាក់ ពាក់ស្លាកលេខ បាត់ដំបង 2B-5193 បុកម៉ូតូម៉ាកហុងដា ពណ៌ខ្មៅ ពាក់ស្លាកលេខ កំពង់ឆ្នាំង 1E-0051 បណ្តាលឱ្យបុរសពីរនាក់ស្លាប់នៅកន្លែង។
ជនរងគ្រោះមានឈ្មោះ ផ្លុង វិត ភេទប្រុស អាយុ៤១ឆ្នាំ និងអ្នករួមដំណើរឈ្មោះ ហន ហួយ ភេទប្រុស អាយុ៤០ឆ្នាំ រស់នៅភូមិត្រពាំងព្រីង ឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំង។ ប្រភពដដែលបានបញ្ជាក់ថា មានរថយន្តទាំង០២គ្រឿង បើកបរក្នុងដំណើរស្របទិសគ្នា បើកចេញពីទិសខាងជើងទៅទិសខាងត្បូង លុះដល់ចំណុចកើតហេតុមានរថយន្តហាយឡេនឌ័រ បានឡើងវ៉ារថយន្តមួយគ្រឿងទៀតក៏ជ្រុលចង្កូតទៅបុកម៉ូតូនោះតែម្តង។
អ្នកបើកបររថយន្តបានរត់គេចខ្លួនបាត់ បានបន្សល់ទុករថយន្ត០១គ្រឿង។ ចំពោះវត្ថុតាងទាំង០២គ្រឿង សមត្ថកិច្ចបានយកមករក្សាទុកបណ្តោះអាសន្ននៅអធិការដ្ឋាននគរបាលស្រុកទឹកផុស ដើម្បីកសាងសំណុំរឿងតាមនីតិវិធីច្បាប់។ ដោយឡែកសពបានប្រគល់ជូនបងប្អូនយកទៅធ្វើបុណ្យតាមប្រពៃណី។ ចំណែកជនបង្ករង់ចាំមន្ត្រីជំនាញសហការជាមួយប៉ុស្តិ៍ស្រាវជាវរកអ្នកបើកបររថយន្តយកមកអនុវត្តបន្តតាមច្បាប់៕ ដោយ ៖ ពៅ សុខហ៊ាន
ចែករំលែកព័តមាននេះ