ខេត្តប៉ៃលិន ៖ អាជីវករជាច្រើននាក់រស់នៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន បាននាំគ្នាត្អូញត្អែរពីជីវភាពរស់នៅប្រចាំថ្ងៃរបស់ខ្លួន និងព្រួយបារម្ភយ៉ាងខ្លាំងចំពោះបញ្ហារកប្រាក់ ដើម្បីយកទៅសងជំពាក់បំណុលមីក្រូហិរញ្ញវត្ថុ ខណៈជំងឺកូវីដ១៩ បន្តរាតត្បាតអូសបន្លាយរយ:ពេលយូរនៅទូទាំងពិភពលោក ក៏ដូចជាប្រជាពលរដ្ឋកម្ពុជាផងដែរ ។
ពីមុនការលក់ដូរកាក់កប ព្រោះតែមានបុគ្គលិកកាស៊ីណូ និងប្រជាពលរដ្ឋឆ្លងដែនចេញ-ចូលទៅពីប្រទេសកម្ពុជា ចូលប្រទេសថៃ ដើម្បីទិញនំចំណី ម្ហូបអាហារ តែពេលហាមប្រាមការឆ្លងដែន ដើម្បីការពារជំងឺដ៏កាចសាហាវនេះ អត់សូវមានអ្នកទិញដូចកាលពីមុននោះឡើយ ។
ជាក់ស្តែងកាលពីវេលាម៉ោង៣និង៣០នាទីរសៀល ថ្ងៃទី០២ ខែធ្នូ ឆ្នាំ២០២០នេះ អាជីវករ ឈ្មោះ នុត តាន់ ភេទប្រុស អាយុ៣៦ឆ្នាំ ប្រកបមុខរបរលក់នំដំឡូងមី លក់សាច់មាន់ សាច់គោអាំង និងឈ្មោះ ឃាង ហ៊ុល ភេទប្រុស អាយុ២៥ឆ្នាំ លក់ទាដុតក្នុងពាង ព្រមទាំងអ្នកលក់ប្រហិត និងគ្រឿងហូបផ្សេងៗ រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន បានរៀបរាប់ឱ្យដឹងដូចៗគ្នាថា ៖
«រហូតមកដល់ពេលនេះ ការលក់ដូររបស់ពួកគេ ពិតជាមានការធ្លាក់ចុះយ៉ាងខ្លាំង ដោយកាលពីមិនទាន់មានជំងឺកូវីដ១៩ចូលមកដល់ ក្នុង១ថ្ងៃពួកគាត់អាចរកបានប្រាក់ចំណូល ចាប់ពី៣០ម៉ឺនទៅ៤០ម៉ឺនរៀល លុះពេលកូវីដ១៩ វាយប្រហារអស់រយ:ពេលយូរជិត១ឆ្នាំនេះ ក្នុង១ថ្ងៃពួកគាត់លក់បានប្រាក់ត្រឹមតែ១០ម៉ឺនទៅ១៥ម៉ឺនប៉ុណ្ណោះ ដោយខ្វះមុខ ខ្វះក្រោយ» ។
ប្រភពដដែលបន្តទៀតថា បច្ចុប្បន្ននេះ ពិតជាស្ងាត់ម៉ូយខ្លាំងណាស់ ខណ:ច្រកទ្វារអន្តរជាតិព្រំជាប់ព្រំដែនកម្ពុជា-ថៃ អនុញ្ញាតិឱ្យត្រឹមតែរថយន្តដឹកទំនិញចូលប៉ុណ្ណោះ រីឯកាស៊ីណូទាំងអស់ត្រូវបានបិទទ្វារ មិនអាចឱ្យប្រជាពលរដ្ឋ ឬភ្ញៀវទេសចរចូលមកលេងបាននោះឡើយ ។ ដូច្នេះទើបធ្វើឱ្យមុខរបរអាជីវកម្មរបស់ពួកគាត់ មានការធ្លាក់ចុះជាងពាក់កណ្តាលតែម្តង ។
បច្ចុប្បន្ន ពួកគាត់កំពុងតែជំពាក់បំណុលគេគ្រប់ៗគ្នា ដោយមានការព្រួយបារម្ភខ្លាំងចំពោះជីវភាព ហើយថែមទាំងដេកបារម្ភចំពោះការរកប្រាក់ ដើម្បីយកទៅសងជំពាក់ខាងមីក្រូហិរញ្ញវត្ថុផងដែរ។
តែទោះបីជាយ៉ាងណា ក៏ពួកគាត់មិនអាចសម្ងំសម្រាកនៅផ្ទះបានឡើយ គឺនាំគ្នាពុះពារ ដើម្បីរកប្រាក់ផ្សែផ្សំគ្នាយកទៅសងបំណុលគេ រហូតដល់អស់ បើជំងឺនេះនៅតែមានការកើតឡើងក្នុងប្រទេសកម្ពុជាក៏ដោយ ៕
ចែករំលែកព័តមាននេះ