ស្ត្រីកំពុងតែព្រួយបារម្ភអំពីជំងឺដុំសាច់ស្បូនមែនទេ!!!
- ភ្នំពេញ
រាជធានីភ្នំពេញ ៖ លោកស្រីវេជ្ជបណ្ឌិត ម៉េង កល្យាណ ឯកទេសសម្ភព និងរោគស្ដ្រីនៃមន្ទីរពេទ្យកាល់ម៉ែត បានលើកឡើងថា ៖ ស្ត្រីភាគច្រើនតែងតែមានការព្រួយបារម្ភអំពីសាច់ដែលដុះនៅលើស្បូន។ ជាទូទៅដុំសាច់ស្បូន ជាដុំសាច់ស្លូត ហើយមិនសូវឱ្យមានជាសញ្ញាអ្វីទេ។ វាច្រើនកើតលើស្ត្រីដែលមានអាយុលើសពី៣០ឆ្នាំ។ វាអាចមានទំហំចាប់ពីប៉ុនគ្រាប់ម្រេច ដល់ប៉ុនផ្លែក្រូចថ្លុង។
លោកស្រីវេជ្ជបណ្ឌិត ម៉េង កល្យាណ ក៏បានបញ្ជាក់យ៉ាងលំអិតថា ៖
ទី១) ដុំស្បូនមានបីទីតាំង៖
- ដុំសាច់នៅលើសាច់ស្បូន
- ដុំសាច់នៅក្នុងសាច់ស្បូន
- ដុំសាច់នៅក្នុងរន្ធស្បូន ។
ទី២) មូលហេតុ ៖ រហូតមកដល់បច្ចុប្បន្ននេះ គេមិនទាន់រកឃើញមូលហេតុច្បាស់លាស់នៅឡើយទេ។ ប៉ុន្តែគេសង្កេតឃើញថា មានកត្តាប្រឈមមួយចំនួនដូចជា ៖
- កត្តាអ័រម៉ូន៖ គេសង្កេតឃើញថា ស្ត្រីពេញវ័យ ឬក្នុងវ័យបន្តពូជមានការ កកើត ឬកើនទំហំនៃដុំសាច់ស្បូនតែដល់ពេលស្ត្រីអស់រដូវ ទំហំដុំស្បូនរួមតូចមកវិញ។
- កត្តាតំណពូជ
- កត្តាជាតិសាសន៍ ៖ គេច្រើនឃើញពួកពូជសាសន៍ស្បែកខ្មៅមានដុះសាច់ស្បូនច្រើនជាងពូជសាសន៍ស្បែកស។
ទី៣) រោគសញ្ញារបស់ដុំស្បូន ៖
- មានឈាមរដូវធ្លាក់ច្រើនជាងធម្មតា ដុំៗ ឬអាចមានឈាមធ្លាក់ពាក់កណ្ដាលវដ្ដរដូវ
- ចុកពោះពេលមករដូវ
- ឈឺធ្ងន់ៗក្នុងអាងត្រគាក
- បត់ជើងតូចញឹកញាប់ ទល់លាមក។
ទី៤) ផលប៉ះពាល់ ៖
- ធ្លាក់ឈាមរហូតធ្វើឲ្យស្លេកស្លាំង
- ការបង្កកំណើតមានការថយចុះ ដោយសារទីតាំងរបស់ដុំស្បូន
- ពេលមានផ្ទៃពោះ វាអាចបង្កឲ្យកូនរលូត ឬកើតមិនគ្រប់ខែ
- សង្កត់ទៅលើសរីរាង្គជិតខាង បើដុំនៅខាងមុខ វាសង្កត់លើប្លោកនោម ធ្វើឲ្យរំខានដល់ ការបត់ជើងតូច (នោមញឹក) បើសង្កត់ខាងក្រោយ ធ្វើឲ្យទល់លាមក។
ទី៥) ការព្យាបាល ៖
- ដោយការប្រើថ្នាំលេប ដែលកំណត់ដោយគ្រូពេទ្យជំនាញ
- ដោយការវះកាត់ ៖
- ដុំសាច់នៅលើសាច់ស្បូន និងដុំសាច់នៅក្នុងសាច់ស្បូន ៖ បកយកដុំសាច់ចេញ ឬ កាត់ស្បូន
- ដុំសាច់នៅក្នុងរន្ធស្បូន ៖ កាត់ស្បូន ឬ កាត់ដុំសាច់ស្បូនដែលមានទំហំតូចល្មម ដោយធ្វើការវះកាត់តាមក្រោម។
បញ្ជាក់ ៖ បច្ចេកទេសវះកាត់ជំនាញ អមដោយបច្ចេកវិទ្យាវេជ្ជសាស្ត្រទំនើបថ្មីៗចុងក្រោយបង្អស់ កំពុងតែដំណើរការជាប្រចាំនៅមន្ទីរពេទ្យកាល់ម៉ែត។
លោកស្រីវេជ្ជបណ្ឌិត ម៉េង កល្យាណ ឯកទេសសម្ភព និងរោគស្ដ្រីនៃមន្ទីរពេទ្យកាល់ម៉ែតបានសំណូមពរដល់ប្រជាពលរដ្ឋដែលជាស្ត្រីថា បើមានអាការៈដូចបានជម្រាបជូខាងលើ សូមមេត្តាមកពិគ្រោះជាមួយវេជ្ជបណ្ឌិតជំនាញនៅមន្ទីរពេទ្យកាល់ម៉ែត ដើម្បីស្វែងរកមូលហេតុពិតប្រាកដ និងស្វែងយល់អំពីជំរើសនៃការព្យាបាលឲ្យបានត្រឹមត្រូវ ប្រកបដោយប្រសិទ្ធិភាព និងសុវត្ថិភាពខ្ពស់ ៕
ចែករំលែកព័តមាននេះ