សុខភាព៖ យោងតាមការចុះផ្សាយពីប្រភពបរទេស កាហ្វេជួយឱ្យស្វាង និងមានអារម្មណ៍ស្រស់ស្រាយ ប៉ុន្តែអ្នកដែលមាន ជំងឺបេះដូង ឬលើសឈាម​ គួរប្រុងប្រយ័ត្នចំពោះការផឹកកាហ្វេ ជាពិសេសប្រសិនបើសម្ពាធឈាមមិនទាន់គ្រប់គ្រងបានល្អ។

ជាតិកាហ្វេអ៊ីនក្នុងកាហ្វេអាចជំរុញប្រព័ន្ធសរសៃប្រសាទ ធ្វើឱ្យចង្វាក់បេះដូង និងសម្ពាធឈាមកើនឡើងជាបណ្តោះអាសន្ន។ សម្រាប់មនុស្សដែលមានបញ្ហាសរសៃឈាមបេះដូង ការប្រែប្រួលទាំងនេះអាចបង្កើនបន្ទុកលើប្រព័ន្ធបេះដូង និងធ្វើឱ្យមិនស្រួលក្នុងមនុស្សមួយចំនួន។

មនុស្សពេញវ័យភាគច្រើនអាចទទួលកាហ្វេអ៊ីនក្នុងបរិមាណមធ្យមបាន ប៉ុន្តែភាពងាយប្រតិកម្មខុសគ្នាពីមនុស្សម្នាក់ទៅម្នាក់។ ប្រសិនបើផឹកកាហ្វេហើយមានអារម្មណ៍បេះដូងលោតញាប់ បារម្ភ ឬគេងមិនលក់ គួរបន្ថយបរិមាណ និងជៀសវាងការផឹកនៅពេលល្ងាច។

អ្នកមានសម្ពាធឈាមខ្ពស់ និងកូឡេស្តេរ៉ុលខ្ពស់ ក៏គួរយកចិត្តទុកដាក់លើប្រភេទកាហ្វេផងដែរ។ កាហ្វេដែលមិនបានចម្រោះអាចមានសារធាតុមួយចំនួនដែលអាចបង្កើនកូឡេស្តេរ៉ុល LDL ខណៈការបន្ថែមស្ករ ទឹកដោះគោខាប់ ឬក្រែមច្រើន អាចធ្វើឱ្យភេសជ្ជៈមានជាតិស្ករ និងកាឡូរីខ្ពស់។

ដូច្នេះ អ្នកមានជំងឺបេះដូង ឬសម្ពាធឈាមខ្ពស់ មិនចាំបាច់ឈប់ផឹកកាហ្វេទាំងស្រុងនោះទេ ប៉ុន្តែគួរផឹកក្នុងបរិមាណសមរម្យ ជ្រើសរើសពេលវេលាសមស្រប និងកាត់បន្ថយស្ករ ឬគ្រឿងផ្សំបន្ថែម។ ប្រសិនបើមានជំងឺប្រចាំកាយ ឬមានរោគសញ្ញាមិនប្រក្រតីក្រោយផឹកកាហ្វេ គួរពិគ្រោះជាមួយអ្នកជំនាញសុខភាព៕