ខេត្តត្បូងឃ្មុំ ៖ ក្រោមបញ្ជាផ្ទាល់ពីសំណាក់លោកបណ្ឌិត ជាម ច័ន្ទសោភ័ណ អភិបាលខេត្ត បានឲ្យកម្លាំងនគរបាល អាវុធហត្ថ ទាហាន រួមនឹងស្ថាប័នពាក់ព័ន្ធបើកប្រតិបត្តិការចុះបង្ក្រាបបទល្មើសនេសាទនៅក្នុងឃុំប៉ើស២…
ខេត្តត្បូងឃ្មុំ ៖ ក្រោមបញ្ជាផ្ទាល់ពីសំណាក់លោកបណ្ឌិត ជាម ច័ន្ទសោភ័ណ អភិបាលខេត្ត បានឲ្យកម្លាំងនគរបាល អាវុធហត្ថ ទាហាន រួមនឹងស្ថាប័នពាក់ព័ន្ធបើកប្រតិបត្តិការចុះបង្ក្រាបបទល្មើសនេសាទនៅក្នុងឃុំប៉ើស២ ឃុំទួលស្នួល ឃុំស្វាយឃ្លាំង ក្នុងស្រុកក្រូចឆ្មារ។ ប្រតិបត្តិការនេះបានធ្វើឡើងចំនួន២ថ្ងៃជាប់ៗគ្នា (គឺថ្ងៃទី២៨ ដល់ថ្ងៃទី២៩ ខែវិច្ឆិកា) ឆ្នាំ២០២០ ហើយយរឹបអូសបានដាយឧបករណ៍នេសាទល្មើសច្បាប់ជាច្រើនមាត់ និងបាន បំផ្លាញចោល បន្ទាប់ពីក្រុមជនខិលខូចលួចដាក់តាមដងព្រែកនៅព្រោងព្រាត ដើម្បីចាប់យកត្រីលក់។
បើតាមមន្ត្រីនគរបាលនៅមូលដ្ឋានបានប្រាប់ឲ្យដឹងថា យោងតាមបញ្ជារបស់លោកឧត្តមសេនីយ៍ស្នងការនគរបាលខេត្តត្បូងឃ្មុំ នៅព្រឹកថ្ងៃទី២៨ ខែវិច្ឆិកា ឆ្នាំ២០២០ កម្លាំងចំរុះចំនួន៣៤នាក់ ក្នុងនោះមាន កម្លាំងស្នងការដ្ឋានខេត្តត្បូងឃ្មុំ រួមនឹងកម្លាំងនៃអធិការដ្ឋាននគរបាលស្រុកត្បូងឃ្មុំ ព្រមទាំងខណ្ឌរដ្ឋបាលជលផល បានចុះបង្ក្រាបបទល្មើសជលផលចេញពីចំណុចព្រែកឆុង ដល់ព្រែកកំពង់រ័ត្ន ឃុំទួលស្នួល ស្រុកក្រូចឆ្មារ។ ជាលទ្ធផលបង្ក្រាបកាត់បំផ្លាញដាយបានចំនួន១៦មាត់ ប្រើរយៈពេលពីម៉ោង៦ព្រឹកនាទីដល់ម៉ោង៣រសៀល ក្រោយពេលដែលក្រុមឈ្មួញបានបោះបង្គោលដាក់របាំងព្រួលកាត់ព្រែក ដើម្បីចាប់យកត្រីយ៉ាងអនាធិបតេយ្យ។
សមត្ថកិច្ចមូលដ្ឋានប្រាប់បន្តឲ្យដឹងទៀតថា រហូតមកដល់ព្រឹកថ្ងៃទី២៩ ខែវិច្ឆិកា លោក ម៉ៅ ឌុង នាយករដ្ឋបាលសាលាខេត្ត បានដឹកនាំកម្លាំងសមត្ថកិច្ចទាំង៣ រួមនឹងអាជ្ញាធរមូលដ្ឋាន ចុះបង្ក្រាបបទល្មើសនេសាទបន្ត ក្នុងនោះរួមមាន ព្រែកខ្នា ព្រែកចង្វា ព្រែកកំពង់រ័ត្ន ស្រះអង្កាម ដែលមានទីតាំងស្ថិតនៅក្នុងស្រុកក្រូចឆ្មារ រហូតមកដល់ពេលរសៀលថ្ងៃដដែល កម្លាំងនៅបន្តបង្ក្រាបបទល្មើសនេសាទបន្តទៀត តាមការបញ្ជារបស់លោកអភិបាលខេត្តត្បូងឃ្មុំ។ ក្នុងនោះដែរ ដាយជាច្រើនមាត់ត្រូវបានកាប់បំផ្លាញចោល និងព្រលែងកូនត្រីរាប់រយគីឡូក្រាមចូលទៅក្នុងទឹកព្រែក និងបឹងធម្មជាតិវិញ។
គួរបញ្ជាក់ថា មានការលើកឡើងពីសំណាក់សមត្ថកិច្ចថា ដាយដែលបានដាក់នៅតាមព្រែកក្នុងអតីតឡូត៍នេសាទលេខ១០ មានទីតាំងស្ថិតនៅជាប់ព្រំប្រទល់ត្បូងឃ្មុំ និងស្រុកក្រូចឆ្មារ គឺបានបង់លុយឲ្យទៅមន្ត្រីជំនាញជលផល លុះពេលមានកម្លាំងសមត្ថកិច្ចចុះបង្ក្រាបក៏បែកធ្លាយរឿងនេះឡើង ដោយអ្នកដាក់ដាយថា បង់លុយឲ្យហើយ បែរជាមកចុះចាប់ទៀត…។
ជុំវិញការចោទប្រកាន់ខាងលើនេះនារសៀលថ្ងៃទី២៩ ខែវិច្ឆិកា លោកម៉ា យ៉ុងរី នាយខណ្ឌរដ្ឋបាលជលផលខេត្តត្បូងឃ្មុំ បានបដិសេធតាមទូរស័ព្ទថា មិនមានមន្ត្រីណាម្នាក់ពាក់ព័ន្ធទៅនឹងបទល្មើសនេសាទ ដោយយកលុយពីគេ ហើយចុះទៅបង្ក្រាបទៀតនោះទេ គឺជារឿងមិនពិត។
គួររំលឹកថា ៖ កម្ទេចរបាំងព្រែកក្នុងអតីតឡូតិ៍នេសាទលេខ10 (វីដេអូ) ៕
ចែករំលែកព័តមាននេះ