ខេត្តបន្ទាយមានជ័យ ៖ កងកម្លាំងមូលដ្ឋានកងរាជអាវុធហត្ថក្រុងប៉ោយប៉ែត បានរៀបចំសំណុំរឿងបញ្ជូនជនសង្ស័យចំនួន០២នាក់ ជាមុខសញ្ញាជួញដូរម្នាក់ និងម្នាក់ទៀតជាមុខសញ្ញារក្សាទុកនូវសារធាតុញៀនដោយខុសច្បាប់ ទៅបញ្ជាការដ្ឋានកងរាជអាវុធហត្ថខេត្តបន្ទាយមានជ័យ ដើម្បីចាត់ការតាមនីតិវិធីច្បាប់។ លោកវរសេនីយ៍ត្រី នួន…
ខេត្តបន្ទាយមានជ័យ ៖ កងកម្លាំងមូលដ្ឋានកងរាជអាវុធហត្ថក្រុងប៉ោយប៉ែត បានរៀបចំសំណុំរឿងបញ្ជូនជនសង្ស័យចំនួន០២នាក់ ជាមុខសញ្ញាជួញដូរម្នាក់ និងម្នាក់ទៀតជាមុខសញ្ញារក្សាទុកនូវសារធាតុញៀនដោយខុសច្បាប់ ទៅបញ្ជាការដ្ឋានកងរាជអាវុធហត្ថខេត្តបន្ទាយមានជ័យ ដើម្បីចាត់ការតាមនីតិវិធីច្បាប់។ លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានឲ្យដឹងថា៖ នៅវេលាម៉ោង១១ព្រឹក ថ្ងៃទី២៨ ខែវិច្ឆិកា ឆ្នាំ២០២០ កម្លាំងមូលដ្ឋានកងរាជអាវុធហត្ថ ក្រុងប៉ោយប៉ែតបានទទួលព័ត៌មានពីប្រជាពលរដ្ឋល្អរាយការណ៍មកថា សញ្ញាម្នាក់បានកំពុងចែកចាយគ្រឿងញៀននៅចំណុចផ្សារយួន ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត។
ក្រោយពីទទួលបានព័ត៌មានលោកបានដឹកនាំកម្លាំងចុះប្រតិបត្តិការដល់កន្លែងកើតហេតុ ហើយធ្វើការឃាត់ខ្លួនបានជនសង្ស័យម្នាក់ឈ្មោះ ទេព អ៊ូ (ហៅហេង) ភេទប្រុស អាយុ៣២ឆ្នាំ និងដកហូតបានគ្រឿងញៀនប្រភេទម្សៅក្រាមពណ៌ស ចំនួន០៦កូនថង់តូច និងគ្រាប់ថ្នាំយ៉ាម៉ាពណ៌ក្រហមចំនួន០៣ថង់តូច ស្មើនឹង២១គ្រាប់ (ពណ៌ខ្មៅ០១គ្រាប់)។ លោកមេបញ្ជាការបានបញ្ជាក់ថា៖ ក្រោយពីឃាត់ខ្លួន និងសាកសួរចម្លើយឈ្មោះ ទេព អ៊ូ (ហៅ ហេង) បានសារភាពថា ថ្នាំញៀនទាំងនេះ គឺគេបានទិញពីឈ្មោះ ប៉ែន ដា ភេទប្រុស អាយុ៥៨ឆ្នាំ ពេលនោះកម្លាំងបន្តឃាត់ខ្លួនជនសង្ស័យខាងលើបានម្នាក់ទៀត នៅចំណុចនាគទិព្វ ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត នៅវេលាម៉ោង១២ព្រឹក ថ្ងៃទី២៨ ខែវិច្ឆិកា ឆ្នាំ២០២០។
នៅចំពោះមុខសមត្ថកិច្ចឈ្មោះ ប៉ែន ដា បានសារភាពថា ខ្លួនពិតជាបានលក់ថ្នាំញៀនបន្តឲ្យឈ្មោះ ទេព អ៊ូ (ហៅហេង) ពិតប្រាកដមែន។ ដោយផ្អែកលើចម្លើយសារភាពជនសង្ស័យឈ្មោះ ប៉ែន ដា និងឈ្មោះ ទេព អ៊ូ និងមានវត្ថុតាងផងនោះ ជនសង្ស័យទាំង០២នាក់ត្រូវបានកម្លាំងជំនាញគ្រឿងញៀនអាវុធហត្ថក្រុងប៉ោយប៉ែត បានកសាងសំណុំរឿងបញ្ជូនមកបញ្ជាការដ្ឋានអាវុធហត្ថខេត្តចាត់ការបន្ត។ បច្ចុប្បន្នជនស្ស័យទាំង០២នាក់នោះ រួមនឹងវត្ថុតាង ត្រូវបានកម្លាំងជំនាញគ្រឿងញៀនអាវុធហត្ថខេត្ត បានបញ្ជូនទៅសាលាដំងខេត្តចាត់ការតាមនីតិវិធីហើយនៅថ្ងៃទី២៩ ខែវិច្ឆិកា ឆ្នាំ២០២០ហើយដែរ៕ ដោយ ៖ ណុប រក្សា
ចែករំលែកព័តមាននេះ