រាជធានីភ្នំពេញ ៖ ដើម្បីជៀសវាងហានិភ័យនៃការចម្លងកូវីដ ១៩ ជាអតិបរមាដល់ថ្នាក់ដឹកនាំកំពូលក្នុងពិធីជំនួបផ្លូវការនានា មានទាំងអង្គព្រះមហាក្សត្រ ជំនួបសវនាការជាមួយមេដឹកនាំព្រឹទ្ធសភា រដ្ឋសភា និងនាយករដ្ឋមន្ត្រីផងនោះ ក្រសួងសុខាភិបាលបានចេញសេចក្តីណែនាំមួយដែលត្រូវរៀបចំចំនួន…
រាជធានីភ្នំពេញ ៖ ដើម្បីជៀសវាងហានិភ័យនៃការចម្លងកូវីដ ១៩ ជាអតិបរមាដល់ថ្នាក់ដឹកនាំកំពូលក្នុងពិធីជំនួបផ្លូវការនានា មានទាំងអង្គព្រះមហាក្សត្រ ជំនួបសវនាការជាមួយមេដឹកនាំព្រឹទ្ធសភា រដ្ឋសភា និងនាយករដ្ឋមន្ត្រីផងនោះ ក្រសួងសុខាភិបាលបានចេញសេចក្តីណែនាំមួយដែលត្រូវរៀបចំចំនួន ៣ ដំណាក់កាល ដែលដំណាក់កាលមួយនោះ គឺប្រតិភូ ឬគណៈប្រតិភូបរទេស នឹងត្រូវបានយកសំណាកសម្រាប់ធ្វើតេស្តរកវីរុសកូវីដ-១៩ «ឲ្យបានឆាប់រហ័សនៅពេលមកដល់» ហើយ ប្រតិភូ ឬគណៈប្រតិភូបរទេស «ត្រូវចៀសវាងការជួបជុំក្នុងពិធីណាមួយដែលប្រមូលផ្តុំមនុស្សច្រើន មុនពេលជំនួប ។
នៅក្នុងសេចក្តីណែនាំមានចំនួន ៤ ទំព័រ និងចុះហត្ថលេខាដោយរដ្ឋមន្ត្រីក្រសួងសុខាភិបាល លោក ម៉ម ប៊ុនហេង ប្រតិភូ ឬគណៈប្រតិភូ និងអ្នកពាក់ព័ន្ធទាំងអស់នឹងត្រូវបានអនុញ្ញាតឲ្យចូលគាល់ ឬជួប លុះត្រាលទ្ធផលតេស្តរកវីរុសកូវីដ-១៩ «អវិជ្ជមាន» ដូច្នេះការណាត់ជួបនឹងត្រូវលុបចោលភ្លាមៗ ក្នុងករណីមានការជូនដំណឹងពីមន្ទីរពិសោធន៍ពីលទ្ធផលតេស្តេវិជ្ជមានកូវីដ ១៩ ឬមានការសង្ស័យណាមួយនោះ ។
នៅក្នុងសេចក្តីជូនដំណឹង លោករដ្ឋមន្ត្រីក្រសួងសុខាភិបាលបានបញ្ជាក់យ៉ាងដូច្នេះថា «បើជំនួបនៅពេលព្រឹក ត្រូវធ្វើតេស្តរកវីរុសកូវីដ-១៩ នៅវិទ្យាស្ថានប៉ាស្ទ័រកម្ពុជា នៅពេលយប់ មុនពេលចូលគាល់ ឬមុនពេលចូលជួប [មេដឹកនាំកម្ពុជា]»។
លោកបានបន្តថា «បើជំនួបនៅពេលរសៀល ត្រូវធ្វើតេស្តរកវីរុសកូវីដ-១៩ នៅវិទ្យាស្ថានប៉ាស្ទ័រកម្ពុជា នៅពេលព្រឹក មុនចូលគាល់ ឬមុនចូលជួប [មេដឹកនាំកម្ពុជា]» ។
ក្រៅពីវិធានការណ៍អនាម័យ រក្សាគម្លាតសុវត្ថិភាពនោះ លោករដ្ឋមន្ត្រីក៏បានបញ្ជាក់ថា កិច្ចសវនាការគួរមានរយៈពេលខ្លីមិនត្រូវលើសពី ៤៥ នាទី និងត្រូវពាក់ម៉ាស់ជាប់ជានិច្ច ។ ក្នុងនោះផងដែរ គណៈប្រតិភូជាតិ និងអន្តរជាតិ អាចថតរូបអនុវស្សាវរីយ៍ ដោយពាក់ម៉ាស ឬដោយមិនពាក់ម៉ាស់ តាមព្រះរាជានុញ្ញាតរបស់ព្រះមហាក្សត្រ ព្រះមហាក្សត្រី ឬតាមការអនុញ្ញាតរបស់ថ្នាក់ដឹកនាំកម្ពុជា ប៉ុន្តែត្រូវរក្សារយៈពេលយ៉ាងខ្លីបំផុត និងត្រូវរក្សាគម្លាតសុវត្ថិភាព ក្នុងពេលថត។
សូមបញ្ជាក់ថា ចេញសេចក្តីណែធ្វើឡើងក្រោយពីកម្ពុជាបានជួបព្រឹត្តិការណ៍៣វិច្ឆិកា ឆ្នាំ ២០២០ ដែលពេលនោះកម្ពុជា ត្រូវបានរកឃើញមនុស្ស ៤ នាក់ ដែលមានថ្នាក់ដឹកនាំជាតំណាងរាស្ត្រ អង្គរក្ស និងឯកអគ្គរដ្ឋទូតហុងគ្រី វិជ្ជមានកូវីដ ១៩ ហើយក្នុងនោះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និង រដ្ឋមន្ត្រីតាមក្រសួងស្ថាប័នមួយចំនួន រួមទាំងមនុស្សពាក់ព័ន្ធដោយផ្ទាល់ និងប្រយោលជាង ៣ពាន់នាក់ទៀត ជាប់ពាក់ព័ន្ធនឹងព្រឹត្តិការណ៍នេះនឹងបាន ធ្វើចត្តាឡីស័ករយៈពេល១៤ថ្ងៃ ផងដែរ ៕
ចែករំលែកព័តមាននេះ