ខេត្តស្វាយរៀង ៖ ព្រឹកថ្ងៃទី១៨ ខែវិច្ឆិកា ឆ្នាំ២០២០ ឯកឧត្តម ម៉ែន វិបុល អភិបាលខេត្តបានអញ្ជើញទៅចែកស្រូវពូជសម្តេចតេជោ ជូនដល់ប្រជាកសិករដែលរងគ្រោះដោយទឹកជំនន់ចំនួន១២១គ្រួសារ…
ខេត្តស្វាយរៀង ៖ ព្រឹកថ្ងៃទី១៨ ខែវិច្ឆិកា ឆ្នាំ២០២០ ឯកឧត្តម ម៉ែន វិបុល អភិបាលខេត្តបានអញ្ជើញទៅចែកស្រូវពូជសម្តេចតេជោ ជូនដល់ប្រជាកសិករដែលរងគ្រោះដោយទឹកជំនន់ចំនួន១២១គ្រួសារ នៅភូមិសែនត ឃុំចន្ទ្រា ស្រុកចន្ទ្រា ដោយក្នុងមួយគ្រួសារៗទទួលបានពូជស្រូវស្រាលប្រភេទស្រូវសែនក្រអូបមិនប្រកាន់រដូវចំនួន១០០គីឡូក្រាម ដើម្បីធ្វើស្រែប្រដេញទឹក និងប្រាក់២ម៉ឺនរៀល ។
ក្នុងឱកាសនោះ មានការអញ្ជើញចូលរួមពីសំណាក់អស់លោកអភិបាលរងខេត្ត ឯកឧត្តមទី
ប្រឹក្សាក្រសួងកសិកម្ម លោកប្រធានមន្ទីរកសិកម្មខេត្ត លោកអភិបាលស្រុកចន្ទ្រា និងមន្ត្រីអាជ្ញា
ធរពាក់ព័ន្ធជាច្រើនរូបទៀត ។
មានប្រសាសន៍នៅក្នុងពិធីនេះ ឯកឧត្តមអភិបាលខេត្ត បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចតេជោ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលតែង
តែយកចិត្តទុកដាក់គ្រប់ពេលវេលាចំពោះសុខទុក្ខរបស់ប្រជាពលរដ្ឋគ្រប់ទីកន្លែង ។ ក្នុងនាម
រដ្ឋបាលខេត្ត ឯកឧត្តមសូមសម្តែងនូវការសោកស្តាយចំពោះការបាត់បង់ ខូចខាតផលដំណាំ សត្វពាហនៈរបស់បងប្អូនប្រជាកសិករ ដែលទទួលរងគ្រោះដោយជំនន់ទឹកភ្លៀងនាពេលកន្លងមក ជាពិសេសនៅភូមិសែនត ភូមិតែងម៉ៅ ភូមិគោកតែក ឃុំចន្ទ្រា និងភូមិទួលស្តី ឃុំទួលស្តី ស្រុកចន្ទ្រា ។
ឯកឧត្តមបានថ្លែងអំណរគុណយ៉ាងជ្រាលជ្រៅសម្តេចតេជោ ហ៊ុន សែន និងសម្តេចកិត្តិព្រឹត្តបណ្ឌិត ដែលសម្តេចទាំងទ្វេតែងគិតគូរអំពីជីវភាពរបស់ប្រជាពលរដ្ឋ ហើយបានផ្តល់ស្រូវពូជជាអំណោយដ៏ថ្លៃថ្លារបស់សម្តេច តាមរយ:ក្រសួងកសិកម្ម រុក្ខាប្រមាញ់ និងនេសាទ មកចែកជូនបងប្អូនប្រជាពលរដ្ឋស្រុកចន្ទ្រានៅថ្ងៃនេះ ។
ឯកឧត្តមអភិបាលខេត្ត ក៏បានសំណូមពរនិងជំរុញដល់ប្រជាកសិករដែលទទួលបានស្រូវពូជនៅថ្ងៃនេះ ត្រូវយកទៅប្រេីប្រាស់បង្កបង្កើនផលឲ្យចំទិសដៅ ដើម្បីជាទុនក្នុងរបរកសិកម្មតទៅមុខទៀត និងបានផ្តាំផ្ញើដល់មន្ត្រីជំនាញ សហការជាមួយអាជ្ញាធរមូលដ្ឋាន ចុះផ្តល់បច្ចេកទេសកសិ
កម្មដល់ប្រជាពលរដ្ឋ ធ្វើយ៉ាងណាឲ្យប្រជាកសិករផលិតបានពូជស្រូវ សម្រាប់បង្កបង្កើនផលបន្តទៀត និងផលិតអង្ករដែលមានគុណភាពសម្រាប់ផ្គត់ផ្គង់ជីវភាពគ្រួសារ ហើយអាចលក់នៅលើទីផ្សារបានតម្លៃខ្ពស់ ។
ទន្ទឹមនេះ ត្រូវការពារជានិច្ចនូវបញ្ហាជំងឺកូវីដ-១៩ ដោយស្តាប់និងអនុវត្តតាមការណែនាំរបស់ក្រសួងសុខាភិបាល ត្រូវរួមគ្នាគោរពច្បាប់ចរាចរណ៍ផ្លូវគោកឲ្យបាន ត្រូវពាក់មួកសុវត្ថិភាពជាប់ជានិច្ចរាល់ពេលធ្វើដំណើរ ។ យើងត្រូវចូលរួមទប់ស្កាត់និងបង្ក្រាបក្រុមឧក្រិដ្ឋជនជួញដូរ ចែក
ចាយគ្រឿងញៀន កុំឲ្យចូលមកចែកចាយនៅក្នុងមូលដ្ឋានរបស់យើង ។
ឯកឧត្តមបន្តថា កន្លងមកប្រទេសយើង ក្រុមជួញដូរគ្រឿងញៀនធ្វើជាកន្លែងឆ្លងកាត់ ក៏ប៉ុន្តែបច្ចុប្បន្នគឺជាកន្លែងឆ្លងកាត់ ចែកចាយ សេព ហើយមានផលិតទៀត ។ ដូច្នេះ យើងត្រូវរួមគ្នាបង្ក្រាបផ្តាច់ឫសគល់ ដោយមានការចូលរួមពីឪពុកម្តាយ ត្រូវអប់រំណែនាំកូនចៅចៀសឲ្យឆ្ងាយពីគ្រឿងញៀន ។
បើសង្ស័យថាកូនសេពគ្រឿងញៀន កុំលាក់ ត្រូវរាយការណ៍ជូននគរបាលប៉ុស្តិ៍ ដើម្បីពិនិត្យទឹកម៉ូត្រ បើមានសារធាតុញៀន យើងនាំគាត់ទៅមណ្ឌលសុខភាពដើម្បីបន្សាប ៕
ចែករំលែកព័តមាននេះ