កម្ពុជា​រង​ឥទ្ធិពល​ព្យុះ​អេ​តូ ចាប់ពី​ថ្ងៃ​ទី​១១ ដល់​១៧ វិច្ឆិកា ធ្វើ​ឲ្យ​មាន​ភ្លៀង​តិច​ទៅ​មធ្យម – Koh Santepheap Daily

ADផ្ទាំងផ្សព្វផ្សាយពាណិជ្ជកម្ម

កម្ពុជា​រង​ឥទ្ធិពល​ព្យុះ​អេ​តូ ចាប់ពី​ថ្ងៃ​ទី​១១ ដល់​១៧ វិច្ឆិកា ធ្វើ​ឲ្យ​មាន​ភ្លៀង​តិច​ទៅ​មធ្យម

2 ខែ មុន
  • Phnom Penh

រាជធានី​ភ្នំពេញ ៖ ក្រសួង​ធនធានទឹក និង​ឧតុនិយម​បាន​ឲ្យ​ដឹង នៅ​ថ្ងៃ​ទី​១០ ខែវិច្ឆិកា ឆ្នាំ ២០២០ នេះ​ថា កម្ពុជា​នឹង​រង​ឥទ្ធិពល​ព្យុះ​មួយ​មានឈ្មោះ​ថា​អេ​តូ​(ETAU)…

រាជធានី​ភ្នំពេញ ៖ ក្រសួង​ធនធានទឹក និង​ឧតុនិយម​បាន​ឲ្យ​ដឹង នៅ​ថ្ងៃ​ទី​១០ ខែវិច្ឆិកា ឆ្នាំ ២០២០ នេះ​ថា កម្ពុជា​នឹង​រង​ឥទ្ធិពល​ព្យុះ​មួយ​មានឈ្មោះ​ថា​អេ​តូ​(ETAU) ចាប់ពី​ថ្ងៃ​ទី​១១​ដល់​១៧ វិច្ឆិកា​ខាង​មុខ​នេះ ។

យោង​តាម​សេចក្តីជូនដំណឹង​របស់​ក្រសួង​ធនធាន​ទឹកបាន​ឲ្យ​ដឹង​ថា តាម​ការ​សង្កេត​តាមដាន​ស្ថានភាព​អាកាសធាតុ​ឃើញ​ថា ព្យុះ​ទី​២១ ឈ្មោះ អេ​តូ ( ETAU ) បាន​នឹង​កំពុង​ធ្វើ​បន្ដដំណើរ​ឆ្ពោះ​មក​ទិស​ខាងលិច ។

ក្រសួង​បញ្ជាក់​ថា តាម​ការ​ព្យាករ ព្យុះ​នេះ​នឹង​ចូល​ដល់​លើ​ភាគ​ខាងត្បូង ប្រទេស​វៀតណាម និង​ភាគ​ខាងកើត​ប្រទេស​កម្ពុជា មុន​នឹង​ថមថយ​ឥទ្ធិពល​ជា​វិ​សម្ពាធ និង​សម្ពាធ​ទាប​នៅ​ថ្ងៃ​ទី​១០ ខែវិច្ឆិកា ។

ដោយឡែក​នៅ​លើ​សមុទ្រ​ខាងកើត​ប្រទេស​ហ្វី​លី​ពី​ន កើត​នូវ​ព្យុះ ទី​២២ ឈ្មោះ វ៉ា​ម​កូ ( VAMCO ) ។ ក្រសួង​បន្ថែម​ថា តាម​ការ​ព្យាករ​ព្យុះ​នេះ​នឹង​វិ​វត្ត​ខ្លួន​ជា​លំដាប់​ទៅ​ជា​ព្យុះ ទី​ហ្វុ​ង នៅ​ពេល​ឆ្លង​ចូល​មក​ក្នុង​សមុទ្រ​ចិន​ខាងត្បូង ហើយ​ដំណើរ​របស់​ព្យុះ​នេះ​នឹង​ចូល​មក​ដល់​លើ​ភាគ​កណ្តាល​ប្រទេស​វៀតណាម នៅ​ថ្ងៃ​ទី​១៥ ខែវិច្ឆិកា ដោយ​ថមថយ​ឥទ្ធិពល​មក​ជា​វិ​សម្ពាធ​ទាប​មុន​នឹង​ថមថយ​មក​ជា​សម្ពាធ​ទាប នៅ​លើ​ភាគ​ឦសាន​ប្រទេស​កម្ពុជា ។

ស្ថានភាព​បែប​នេះ​ធ្វើ​ឲ្យ ៖ ១-​បណ្តា​ខេត្ត​នៅ​តំបន់​វាលទំនាប​កណ្តាល ៖ – សីតុណ្ហភាព​អប្បបរមា​មាន​ពី ២១-២៣ °C – សីតុណ្ហភាព​អតិបរមា មាន​ពី ២៨-៣០ °C នៅ​ថ្ងៃ​ទី ១១-១២ ខែវិច្ឆិកា នឹង​អាច​មាន​ភ្លៀង​ក្នុង​កម្រិត​ពី​មធ្យម​ទៅ​ច្រើន ។ នៅ​ថ្ងៃ​ទី​១៥-១៧ ខែវិច្ឆិកា នឹង​អាច​មាន​ភ្លៀង​ក្នុង​កម្រិត​តិច​ទៅ​មធ្យម ។ ២-​បណ្តា​ខេត្ត ជាប់​ជួរ​ភ្នំ​ដងរែក និង​ខ្ពង់រាប​ឦសាន ៖ – សីតុណ្ហភាព​អប្បបរមា មាន​ពី ២០-២១ °C – សីតុណ្ហភាព​អតិបរមា មាន​ពី ២៧-២៩ °C ។ នៅ​ថ្ងៃ​ទី ១១-១២ ខែវិច្ឆិកា នឹង​អាច​មាន​ភ្លៀង​ក្នុង​កម្រិត​មធ្យម​ទៅ​ច្រើន ។ នៅ​ថ្ងៃ​ទី ១៥-១៧ ខែវិច្ឆិកា នឹង​អាច​មាន​ភ្លៀង​-​ខ្យល់​ក្នុង​កម្រិត​មធ្យម ។ ៣-​តំបន់​មាត់សមុទ្រ ៖ – សីតុណ្ហភាព​អប្បបរមា មាន​ពី ២២-២៤ °C – សីតុណ្ហភាព​អតិបរមា មាន​ពី ២៨-៣០ °C នៅ​ថ្ងៃ​ទី ១១-១២ ខែវិច្ឆិកា នឹង​អាច​មាន​ភ្លៀង​ក្នុង​កម្រិត​តិច​ទៅ​បង្គួរ ។ នៅ​ថ្ងៃ​ទី ១៥-១៧ ខែវិច្ឆិកា នឹង​អាច​មាន​ភ្លៀង​ក្នុង​កម្រិត​មធ្យម ព្រមទាំង​រលក​សមុទ្រ​អាច​មាន កម្ពស់​ខ្ពស់​ជា​បង្គួរ ។

ជាមួយ​គ្នា​នោះ​ដែរ ក្រសួង​បាន​លើក​ឡើង​ថា ស្ថានភាព​ធាតុអាកាស​ដូច​បាន​ជម្រាប​ជូន​ខាងលើ សូម​សាធារណៈជន​ជ្រាប​ជា​ព័ត៌មាន និង​មានការ​ប្រុង​ប្រយ័ត្ន​ចំពោះ​បាតុភូត​ធម្មជាតិ​ដែល​នឹង​អាច​កើត​មាន​ជាយថាហេតុ​ណាមួយ ៕