រាជធានីភ្នំពេញ ៖ ខណៈអ្នកលេងហ្វេកប៊ុកមួយចំនួនបានបង្ហោះរូបតុបតែងមុខខ្មោចនៅលើបណ្តាញសង្គមហ្វេកប៊ុកអបអរពិធីបុណ្យ Halloween ដែលជាបុណ្យអឺរ៉ុបសម្រាប់ប្រជាជនបរទេសនោះ លោកស្រី នូ វាសនា ម្ចាស់ហាងកាត់ដេរមួយកន្លែង បានដឹកនាំសិល្បករ-សិល្បការិនីចូលរួមស្លៀកសម្លៀកបំពាក់បុរាណ…
រាជធានីភ្នំពេញ ៖ ខណៈអ្នកលេងហ្វេកប៊ុកមួយចំនួនបានបង្ហោះរូបតុបតែងមុខខ្មោចនៅលើបណ្តាញសង្គមហ្វេកប៊ុកអបអរពិធីបុណ្យ Halloween ដែលជាបុណ្យអឺរ៉ុបសម្រាប់ប្រជាជនបរទេសនោះ លោកស្រី នូ វាសនា ម្ចាស់ហាងកាត់ដេរមួយកន្លែង បានដឹកនាំសិល្បករ-សិល្បការិនីចូលរួមស្លៀកសម្លៀកបំពាក់បុរាណ និងធ្វើកន្ទោងយកមកបណ្ដែតនៅមុខព្រះបរមរាជវាំង។
លោកស្រីនូ វាសនា បានអះអាងថា កូនខ្មែរគួរតែមានការសហការគ្នាបំផុសឱ្យមានពិធីមួយនេះ ចៀសវាងការបំផុសពីវប្បធម៌បរទេស ( Halloween ) ធ្វើឱ្យលប់បាត់ប្រពៃណីអកអំបុក សំពះព្រះខែ ដែលរួមមានទាំងពិធីបណ្ដែតប្រទីប ឬកន្ទោងដែលដូនតាខ្មែរបុរាណប្រកាន់ខ្ជាប់តាំងពីយូរលង់ណាស់មកហើយនោះ។
លោកស្រីបានបន្តថា មនុស្សតិចណាស់ដែលចាប់អារម្មណ៍នូវពិធីបណ្ដែតប្រទីបនេះនៅក្នុងថ្ងៃទី២នៃព្រះរាជពិធីបុណ្យអុំទូក ដោយការស្លៀកសម្លៀកបំពាក់បុរាណ ហើយជុំគ្នាមកធ្វើពិធីបណ្ដែតកន្ទោងសុំសេចក្ដីសុខបែបនេះគឺស្ទើរតែមិនមាន ដូច្នេះហើយទើបលោកស្រីដឹកនាំសិល្បករសិល្បការិនីប្រមាណជាង៣០រូប ស្លៀកឈុតបុរាណជុំគ្នា ដើម្បីបំផុសឱ្យមានការចាប់អារម្មណ៍ពីពិធីនេះឡើងវិញ។
លោកស្រីបន្តទៀតថា ការបណ្ដែតប្រទីប ឬកន្ទោងនៅក្នុងពិធីបុណ្យអុំទូកថ្ងៃទី២នេះ មិនមែនជាវប្បធម៌របស់ប្រទេសជិតខាងទេ គឺខ្មែរមានតាំងពីបរមបុរាណ ហើយដោយយល់ឃើញថា អ្នកលេងបណ្តាញសង្គមហ្វេកប៊ុកបាននាំគ្នាបំផុសវប្បធម៌ Halloween តាំងពីពិធីបុណ្យនេះមិនទាន់ដល់ថ្ងៃ ទើបលោកស្រីនៅមិនសុខ ហើយឈានដល់ការប្រមូលផ្ដុំគ្នាបំផុសពិធីបណ្ដែតកន្ទោងនេះឡើង ដែលគោលបំណងសំខាន់បំផុតគឺកុំឱ្យប្រពៃណីមួយនេះរលត់បាត់ពីផ្នត់គំនិតកូនខ្មែរ។
លោកស្រីមានការខកចិត្តដែលអ្នកលេងបណ្តាញហ្វេកប៊ុកបែរជាជ្រួលជ្រើមនឹងវប្បធម៌បរទេសចំថ្ងៃពិសេសនៃពិធីសែនព្រះខែរបស់ខ្លួនទៅវិញ ហើយលោកស្រីក៏អរគុណផងដែរដល់ក្រុមសិល្បករ សិល្បការិនីដែលបានចូលរួមស្លៀកសម្លៀកបំពាក់ឈុតបុរាណចូលរួមបណ្ដែតកន្ទោងនាថ្ងៃបុណ្យអុំទូកថ្ងៃទី២នោះ និងអរគុណយ៉ាងខ្លាំងដល់សម្អាងការមួយកន្លែងដែលជួយជាសម្លៀកបំពាក់ដល់សិល្បករ សិល្បការិនី និងមេក្រុម ដែលជួយរៀបចំឱ្យពិធីមួយនេះ ដំណើរការទៅបានដោយរលូន ៕ (កែសម្រួលដោយ ៖ ធីតា)
ចែករំលែកព័តមាននេះ