អ្នកប្រហែលជាធ្លាប់ជួបមនុស្សដែលមានសមត្ថភាព និងសក្តានុពលភាពខ្ពស់ជាច្រើននាក់ហើយដែលជួបនូវការលំបាកក្នុងការជោគជ័យក្នុងអាជីពរបស់ខ្លួនមិនថា ខិតខំប្រឹងប្រែងយ៉ាងណា ឬមានអ្នកជួយចាំណែនាំយ៉ាងណាក្តី។ ប្រសិនបើអ្នកចង់ជៀសវាងធ្លាក់ក្នុងស្ថានការដូចគ្នានេះដែរ អ្នកគួរតែជៀសវាងនូវកំហុសឆ្គងធំៗខាងក្រោមនេះ ៖
១. ការមិនមានភាពនឹងនរក្នុងការងារ
មនុស្សចូលចិត្តអ្នកដទៃដែលគោរពតាមការសន្យារបស់ខ្លួន ប៉ុន្តែមិនខ្វល់ច្រើនទេថា មនុស្សម្នាក់អាចធ្វើអ្វីល្អជាង ឬច្រើនជាងអ្វីដែលបានសន្យាទេ។ ប្រសិនបើអ្នកជាមនុស្សដែលឧស្សាហ៍សម្រេចបានលទ្ធផលការងារល្អ ឬសម្រេចបានការងារច្រើនជាងតួនាទីចាំបាច់របស់ខ្លួននោះ អ្នកត្រូវតែធានាថាអ្នកអាចបន្តគោរពតាមការសន្យារបស់អ្នកជានិច្ច។ មនុស្សដែលម្តងធ្វើការបានល្អ និងម្តងធ្វើការមិនបានល្អមិនអាចលេចធ្លោទេ។
២. ការគ្មានភាពចាស់ទុំ
បុគ្គលិកដែលនៅក្មេងខ្ចីជាមនុស្សដែលងាយនឹងខឹង និងមិនចេះទទួលខុសត្រូវសម្រាប់សកម្មភាពរបស់ខ្លួន។ បុគ្គលទាំងនេះមិនអាចគ្រប់គ្រងអារម្មណ៍របស់ពួកគេដើម្បីសម្រេចបានលទ្ធផលល្អៗទេ។ ពួកគេចំណាយថាមពលច្រើនទៅលើការប្រឆាំងនឹងកិច្ចការដែលពួកគេមិនចង់ធ្វើ។ លើសពីនេះទៅទៀត ពួកគេមិនមានស្តង់ដារក្នុងការងារ និងចូលចិត្តចោទប្រកាន់អ្នកដទៃសម្រាប់លទ្ធផលការងាររបស់ខ្លួន។
៣. ភាពអវិជ្ជមាន
អ្នកប្រហែលជាស្គាល់មនុស្សដែលតែងតែរអ៊ូរទាំពីរឿងអ្វីៗទាំងអស់ហើយ។ តើអ្នកចូលចិត្តនៅជិតមនុស្សទាំងនោះទេ? មនុស្សដែលជោគជ័យមិនចំណាយកម្លាំងរបស់ពួកគេលើភាពអវិជ្ជមានទេ។ ផ្ទុយមកវិញ ពួកគេព្យាយាមដោះស្រាយបញ្ហា និងផ្តោតស្មារតីលើគោលដៅដែលខ្លួនចង់សម្រេច។
៤. ការនិយាយដើមអ្នកដទៃ
តើអ្នកមានឋានៈអ្វីដែលអនុញ្ញាតឲ្យអ្នកនិយាយពីមនុស្សម្នាក់ទៀតពីក្រោយខ្នងគេ? ប្រសិនបើអ្នកធ្វើដូច្នេះ អ្នកប្រហែលជាគិតថាខ្លួនពូកែ ឬខ្ពស់ជាងអ្នកទាំងនោះហើយ។ តើវាយុត្តិធម៌ក្នុងការវាយតម្លៃមនុស្សម្នាក់នៅពេលដែលអ្នកមិនដឹងពីជីវប្រវត្តិ ស្ថានការ និងបញ្ហាដែលពួកគេកំពុងជួបប្រទះទេ? ការនិយាយដើមអ្នកដទៃងាយនឹងធ្វើឲ្យអ្នកដទៃមើលងាយអ្នកវិញណាស់។
អាកប្បកិរិយារបស់អ្នកអាចជាគុណសម្បត្តិ ឬគុណវិបត្តិរបស់អ្នកក្នុងកន្លែងការងារមួយ។ បើអ្នកចង់មានឱកាសជោគជ័យខ្ពស់ អ្នកគួរតែជ្រើសរើសអាកប្បកិរិយាដែលអាចជាគុណសម្បត្តិរបស់អ្នកវិញ ដោយឲ្យតម្លៃលើការខិតខំប្រឹងប្រែងធ្វើការ ការស្មោះត្រង់ និងការជួយគ្នាទៅវិញទៅមកវិញ។ អ្នកថែមទាំងអាចក្លាយជាគំរូដែលជួយបង្កឲ្យបរិស្ថានការងារកាន់តែល្អប្រសើរជាងមុនថែមទៀត។ ដកស្រង់ចេញពីវេបសាយ ៖ theladders
ចែករំលែកព័តមាននេះ