ខេត្តបន្ទាយមានជ័យ ៖ បុរសវ័យចំណាស់ម្នាក់ត្រូវគេប្រទះឃើញបាត់បង់ជីវិតក្បែរទូករបស់ខ្លួន បង្កឱ្យមានការភ្ញាក់ផ្អើលកាលពីម៉ោង១២និង៥០នាទីថ្ងៃត្រង់ នាថ្ងៃទី២៨ ខែតុលា ឆ្នាំ២០២០ នៅចំណុចអាងកណ្តោល ស្ថិតក្នុងភូមិទឹកថ្លា សង្កាត់ទឹកថ្លា…
ខេត្តបន្ទាយមានជ័យ ៖ បុរសវ័យចំណាស់ម្នាក់ត្រូវគេប្រទះឃើញបាត់បង់ជីវិតក្បែរទូករបស់ខ្លួន បង្កឱ្យមានការភ្ញាក់ផ្អើលកាលពីម៉ោង១២និង៥០នាទីថ្ងៃត្រង់ នាថ្ងៃទី២៨ ខែតុលា ឆ្នាំ២០២០ នៅចំណុចអាងកណ្តោល ស្ថិតក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ។
បើតាមប្រភពពីនគរបាលមូលដ្ឋានបានឲ្យដឹងថា ជនរងគ្រោះខាងលើមានឈ្មោះ រឿង ពន្លក ភេទប្រុស អាយុ៦៤ឆ្នាំ មានទីលំនៅក្នុងភូមិទំនប់ជ្រៃ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ។ ហើយនៅមុនពេលកើតហេតុ ជនរងគ្រោះបានអុំទូកម្នាក់ឯងទៅច្រូតស្មៅឲ្យគោស៊ីនៅចំណុចអាងកណ្តោល ស្ថិតក្នុងភូមិទឹកថ្លា សង្កាត់ទឹកថ្លា ។
ប្រភពដដែលបានបញ្ជាក់ថា តាមសំដីរបស់ប្រជាពលរដ្ឋនៅនឹងអាងកណ្តោល ក៏ដូចជាពលរដ្ឋឈ្មោះ អឿន កំសត់ ភេទប្រុស អាយុ៣៨ឆ្នាំ ជាកសិករ បានរៀបរាប់ថា មុនពេលជនរងគ្រោះបាត់បង់ជីវិត ពួកគាត់បានឃើញជនរងគ្រោះកំពុងតែច្រូតស្មៅម្នាក់ឯងនៅក្នុងអាង លុះរយៈពេល១ម៉ោងក្រោយក៏ស្រាប់តែបាត់គាត់ ដោយមានការសង្ស័យថា បុរសឈ្មោះអឿន កំសត់ ដែលរាយសន្ទូចនៅក្បែរនោះ ក៏ស្រែកហៅមិត្តភក្តិម្នាក់ទៀតដើរទៅមើលជនរងគ្រោះ ក៏ស្រាប់តែឃើញជនរងគ្រោះឈរទ្រោបជាប់នឹងស្មៅក្បែរទូកបានបាត់បង់ជីវិតទៅហើយ បន្ទាប់មកក៏នាំគ្នាលើកសពជនរងគ្រោះដាក់លើទូក រួចយកសពមកលើគោកវិញ។
ក្រោយមកនគរបាលបានធ្វើការសន្និដ្ឋានថា ជនរងគ្រោះជាមនុស្សមានវ័យចំណាស់ ដូច្នេះអាចមកពីគាត់ធ្វើការហួសកម្លាំងរហូតខ្យល់គ ទើបបណ្តាលឲ្យលង់ទឹកតែម្តង។ ក្រោយពេលកើតហេតុសពជនរងគ្រោះត្រូវបានប្រគល់ជូនក្រុមគ្រួសារ ដើម្បីយកទៅចាត់ចែងធ្វើបុណ្យតាមប្រពៃណី ។
សូមបញ្ជាក់ថា នៅខេត្តបន្ទាយមានជ័យ ក្នុងរយៈពេលនៃទឹកជំនន់មកទល់នឹងថ្ងៃទី២៧ ខែតុលានេះ បើយោងតាមរបាយការណ៍របស់សាលាខេត្តបានបង្ហាញថា ជនរងគ្រោះបាត់បង់ជីវិតដោយសារលង់ទឹក មានចំនួន២៦នាក់ ។ នេះបើគិតមកទល់នឹងថ្ងៃទី២៨ ខែតុលានេះ គឺកើនម្នាក់ទៀត ឡើងដល់ចំនួន២៧នាក់ ។ ដែលក្នុងនោះក្រុងសិរីសោភ័ណកើន១នាក់ ឡើង៤នាក់, ក្រុងប៉ោយប៉ែត ចំនួន៤នាក់, ស្រុកអូរជ្រៅចំនួន២នាក់, ស្រុកស្វាយចេកចំនួន៣នាក់, ស្រុកព្រះនេត្រព្រះចំនួន៣នាក់, ស្រុកថ្មពួកចំនួន៣នាក់,ស្រុកភ្នំស្រុក១នាក់, ស្រុកមង្គលបូរី៣នាក់ និងស្រុកម៉ាឡៃចំនួន៤នាក់ សរុបត្រឹមថ្ងៃទី២៨ ខែតុលា ឆ្នាំ២០២០ គឺសរុបចំនួន២៧នាក់ហើយ៕
ចែករំលែកព័តមាននេះ