ខេត្តរតនគិរី ៖ អាជ្ញាធរក្រុងបានលុងសហការជាមួយមន្ទីរសាធារណការ និងដឹកជញ្ជូនខេត្តរួមនឹងមន្ទីរធនធានទឹក និងឧតុនិយមខេត្ត នៅព្រឹកថ្ងៃទី២៦ ខែតុលា ឆ្នាំ២០២០ បានចុះធ្វើការស្តារសម្អាត បឹងកម្សាន្តឱ្យផ្ទៃបឹងមួយនេះមានសោភ័ណភាពស្រស់បំព្រងឡើងវិញ។…
ខេត្តរតនគិរី ៖ អាជ្ញាធរក្រុងបានលុងសហការជាមួយមន្ទីរសាធារណការ និងដឹកជញ្ជូនខេត្តរួមនឹងមន្ទីរធនធានទឹក និងឧតុនិយមខេត្ត នៅព្រឹកថ្ងៃទី២៦ ខែតុលា ឆ្នាំ២០២០ បានចុះធ្វើការស្តារសម្អាត បឹងកម្សាន្តឱ្យផ្ទៃបឹងមួយនេះមានសោភ័ណភាពស្រស់បំព្រងឡើងវិញ។ លោក សាយ សាមាន ប្រធានមន្ទីរសាធារណការ និងដឹកជញ្ជូនខេត្តរតនគិរី បានឱ្យដឹងក្នុងឱកាសចុះដឹកនាំការស្តារសម្អាតបឹងកម្សាន្តនាពេលនោះថា៖
ដោយមានការគិតគូរយកចិត្តទុកដាក់ពីសំណាក់ ឯកឧត្តម ថង សាវុន អភិបាលខេត្តរតនគិរីបានបញ្ជាឱ្យមន្ទីរជំនាញពាក់ព័ន្ធសហការជាមួយអាជ្ញាធរក្រុងបានលុង ធ្វើការស្តារសម្អាតផ្ទៃបឹងចំនួន២ក្នុងក្រុង គឺបឹងកន្សែង និងបឹងកម្សាន្ត។ ការកាយយកចេញនោះមានស្មៅចក ដែលដុះរីករាលដាល និងល្បាប់ភក់ស្ទើរពេញផ្ទៃបឹងទៅហើយ នោះដើម្បីឱ្យផ្ទៃបឹងមានសភាពស្រស់ស្អាតឡើងវិញក៏ដូចជាការលើកកម្ពស់សោភ័ណភាពបឹងឱ្យមានលក្ខណៈធម្មជាតិទាក់ទាញភ្ញៀវទេសចរណ៍ជាតិ-អន្តរជាតិ មកទស្សនាកម្សាន្តផងដែរ។
លោកប្រធានមន្ទីរសាធារណការ និងដឹកជញ្ជូនខេត្តក៏បានអំពាវនាវដល់ប្រជាពលរដ្ឋក្នុងក្រុងបានលុង ជាពិសេសប្រជាពលរដ្ឋដែលមានលំនៅដ្ឋានជុំវិញបឹងក៏ត្រូវតែចូលរួមសម្អាតអនាម័យបរិស្ថាននៅជុំវិញបឹងនោះផង ដើម្បីឱ្យផ្ទៃបឹងធានាបាននូវនិរន្តរភាពបរិស្ថានមួយប្រកបដោយគុណភាព និងភាពស្រស់ស្អាតសម្រាប់ខេត្តរតនគិរីនេះផងដែរ៕ ដោយ ៖ ផង់ វិន
ចែករំលែកព័តមាននេះ