រាជធានីភ្នំពេញ៖បន្ទាប់ពីម្រុខរាជរដ្ឋាភិបាលចូលរួមបើកសម្ពោធការរដ្ឋានសាងសង់ស្ពានបេតុងខ្សែកាបភ្ជាប់ពីទីក្រុងកោះពេជ្រ ទៅកោះនរានៅថ្ងៃទី២៦តុលានេះហើយរួចមក ត្រូវបានអ្នកស្រាវជ្រាវសេដ្ឋកិច្ចមើលឃើញថាវាជាការពញ្ញាក់ទីផ្សារនិងជាការជំរុញចរន្តសេដ្ឋកិច្ចកម្ពុជាឱ្យមានការកម្រើកត្រឡប់មកវិញ។តែការសាងសង់ស្ពានតភ្ជាប់ទៅកោះនរានេះប្រហែលជាមិនអាចរុញឱ្យតម្លៃដីឡើងថ្លៃខ្ពស់បានទេស្ថិតក្នុងកាលៈទេសៈបច្ចុប្បន្ននេះ។
លោក បណ្ឌិតគី សេរីវឌ្ឍន៍ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបានឱ្យដឹងថា តាមពិតគម្រោងនេះបានគិតគូរអស់រយៈពេលយូរមកហើយ វាល្មមដល់ពេលគិតគូដែរ។ មនុស្សជាច្រើនក៏បានដឹងថាការអភិវឌ្ឍទីក្រុងនៅកោះនរាមានដំណើរជាងមួយមកហើយ អីចឹងការទិញដី ហាក់មិនទាន់ឡើងថ្លៃទេ ដោយសារមនុស្សមិនទាន់មានសង្ឃឹមថាមានការតភ្ជាប់ជាស្ពានខ្សែកាប តែឥលូវនេះសម្តេចតេ នាយករដ្ឋមន្ត្រីលោកបានទៅបើកសម្ពោធការដ្ឋាន មានន័យថាជាការពញ្ញាក់មួយនៃទីផ្សារ។
លោកបណ្ឌិតមានប្រសាសន៍ថា«យើងមើលសេដ្ឋកិច្ចយើងខណៈសេដ្ឋកិច្ចមានភាពរអាក់រអួលដោយសារតែវិបត្តិកូវីដ- ១៩និងវិបត្តិទឹកជំនន់រួមនិងវិបត្តិជាសកលនេះ។ការបើការដ្ឋានសាងសង់ស្ពាននេះជាពញ្ញាក់មួយដើម្បីជំរុញឱ្យចរន្តសេដ្ឋកិច្ចមានការកម្រើកត្រលប់មកវិញ ហើយការកម្រើកនូវសសៃសសូងសេដ្ឋកិច្ចនេះគឺជាចំណុចសំខាន់។ការពញ្ញាក់ព័ត៌មានទាំងនេះ ឬការផ្តល់កំលាំងចិត្តក្នុងវិស័យសេដ្ឋកិច្ចនេះវាជំរុញឱ្យមានកំណើនសេដ្ឋកិច្ច កំណើននៃការចាយវាយ កំណើនទិញលក់កាន់តែច្រើន អីចឹងវាជាការផលិតឱ្យប្រាក់ចំណូលកើនឡើងលើសពីមុន»។
តាមបណ្ឌិតសេដ្ឋកិច្ចរូបនេះ ទោះបីមានការសាងសង់ស្ពានបេតុងខ្សែកាបតភ្ជាប់ទៅកោះនរានៅពេលនេះក៏ដោយ បើនិយាយអំពីតម្លៃដីធ្លីមិនអាចឡើងថ្លៃខ្ពស់បាននោះទេហើយតម្លៃដីវិញក៏មិនស្ថិតនៅលើម្ចាស់ដីឬឈ្មួញរកទិញដីដែរ វាអាស្រ័យលើទីផ្សារ។
លោក បណ្ឌិត គី សេរីវឌ្ឍន៍មានប្រសាសន៍ថា«បើយើងនិយាយអំពីតម្លៃដី កើនឡើងខ្ពស់ឬទាបនោះខ្ញុំជឿថាមិនមានការកើនឡើងខ្ពស់បានទេ មានន័យថាស្ថានភាពសេដ្ឋកិច្ចរបស់ពលរដ្ឋយើងនៅមានកម្រិតខណៈនៅមានជំងឺកូវីដបែបនេះមិនអាចឡើងលឿនបានទេ ហើយដីនៅទីនោះមិនមែនស្ថិតនៅលើម្ចាស់ដី ឬអាស្រ័យទៅលើឈ្មួញនោះទេគឺទីផ្សារជាអ្នកកំណត់។បើមានអ្នករកទិញច្រើនដីលក់បានថ្លៃ តែបើគ្មានអ្នករកទិញច្រើនទេតម្លៃដីក៏មិនជាថ្លៃប៉ុន្មានដែរ អីចឹងវាអាស្រ័យទៅលើទីផ្សារ។ដូចនេះយើងមិនអាចធ្វើការទស្សទាយបានទេថានៅពេលដែលធ្វើស្ពានប៉ុណ្ណឹង មានអ្នកស្ទុះស្ទាទៅរកទិញដី ។ខ្ញុំជឿថាមិនមានអ្នករកទិញដីច្រើនទេ»។
ពាក់ព័ន្ធនឹងគម្រោងអភិវឌ្ឍន៍កោះនរានេះបើតាមលោកឧកញ៉ា ពង់ ឃាវសែ តំណាងក្រុមហ៊ុន OCICមានប្រសាសន៍ថា គម្រោងអភិវឌ្ឍន៍កោះនរាទទួលបានការអនុញ្ញាតពីរាជរដ្ឋាភិបាលកម្ពុជាអភិវឌ្ឍន៍ជាទីក្រុងរណបថ្មីមួយទៀតដែលមានទំហំប្រមាណ១២៥ហិកតា ស្ថិតក្នុងខណ្ឌច្បារអំពៅរាជធានីភ្នំពេញ។
លោកឧកញ៉ា បន្តថា គម្រោងអភិវឌ្ឍន៍កោះនរានេះ នឹងផ្តល់អត្ថប្រយោជន៍សេដ្ឋកិច្ចសង្គមយ៉ាងច្រើនដល់ប្រទេសជាតិយើង។ពិសេសក្នុងកាលៈទេសៈលំបាកនៃសេដ្ឋកិច្ចនាពេលបច្ចុប្បន្នដែលកម្ពុជាកំពុងត្រូវការបន្ថែមការវិនិយោគជាច្រើនដើម្បីទ្រទ្រង់សកម្មភាពសេដ្ឋកិច្ចឱ្យបានរឹងមាំ។
លោកឧកញ៉ា គូសបញ្ជាក់ថា«គម្រោងអភិវឌ្ឍន៍កោះ នរា អាចអនុញ្ញាតឱ្យប្រជាពលរដ្ឋរស់នៅបានប្រមាណ៥០.០០០នាក់ ដោយគ្រោងចំណាយថវិកាសរុប២.៥០០លានដុល្លារអាមេរិក។ ដោយឡែកសម្រាប់ថវិកាជិត៥៥០លានដុល្លារអាមេរិកនៃហេដ្ឋារចនាសម្ព័ន្ធរយៈពេល៣ឆ្នាំដំបូងត្រូវបានប៉ាន់ប្រមាណថាអាចចូលរួមចំណែកដល់ផលិតផលសរុបក្នុងស្រុក(GDP)ប្រមាណ២២៥លានដុល្លារអាមេរិកក្នុងមួយឆ្នាំៗឬស្មើ០,៩%នៃGDPនាពេលបច្ចុប្បន្ន។គម្រោងនេះក៏កំពុងប្រើប្រាស់កំលាំងពលកម្មប្រមាណ៧០០នាក់នឹងឡើងដល់៧០០០នៅពេលគម្រោងមានសកម្មភាពសាងសង់ពេញទំហឹង។
បន្ទាប់ពីចប់ការដ្ឋានសាងសង់តំបន់អភិវឌ្ឍន៍កោះនរានេះនឹងបង្កើតបានការងារប្រមាណ១០.០០០កន្លែងដើម្បីប្រតិបត្តិការប្រចាំថ្ងៃ»៕
ចែករំលែកព័តមាននេះ