ណៃពិដោ ៖ តាមការអះអាងពីលោក U Htin Aung អនុរដ្ឋមន្ត្រីសុខុមាលភាពសង្គម នៅដើមឆ្នាំ២០១៦ខាងមុខ រដ្ឋាភិបាលថៃនិងមីយ៉ាន់ម៉ា នឹងធ្វើកិច្ចសហប្រតិបត្តិការស្តីពីការអនុញ្ញាតឲ្យបណ្តាពលករអន្តោប្រវេសន៍មីយ៉ាន់ម៉ា បានប្រកបការងារក្នុងប្រទេសថៃដោយស្របច្បាប់ ប៉ុន្តែក៏នឹងមានការចាត់វិធានការផ្សេងៗប្រឆាំងនឹងការធ្វើអន្តោប្រវេសន៍ខុសច្បាប់ផងដែរ។
ថ្មីៗនេះរដ្ឋាភិបាលនៃប្រទេសទាំងពីរបានប្រកាសថា បណ្តាពលករខុសច្បាប់ទាំងឡាយក្នុងប្រទេសថៃនឹងត្រូវបានអនុញ្ញាតឲ្យដាក់ពាក្យស្នើសុំធ្វើការស្របច្បាប់ក្នុងរយៈពេលមួយឆ្នាំនេះ។ លើសពីនេះទៅទៀត រដ្ឋាភិបាលមីយ៉ាន់ម៉ាក៏កំពុងចេញកាតដល់អ្នកអន្តោប្រវេសន៍របស់ខ្លួនក្នុងប្រទេសថៃផងដែរ ។
រដ្ឋាភិបាលថៃបានប្រកាសផងដែរថានៅថ្ងៃអនាគតថៃនឹងអនុញ្ញាតឲ្យត្រឹមតែជនអន្តោប្រវេសន៍ស្របច្បាប់ប៉ុណ្ណោះ ដែលចូលមកតាមរយៈទីភ្នាក់ងាររបស់រដ្ឋាភិបាល ហើយថៃក៏នឹងចាត់វិធានការនានាប្រឆាំងនឹងពលករអន្តោប្រវេសន៍ខុសច្បាប់ដែរ ។
លោកអនុរដ្ឋមន្ត្រីបានបន្តទៀតថា មីយ៉ាន់ម៉ាបានស្នើដល់បណ្តាអ្នកជំនួញថៃអនុញ្ញាតឲ្យពលករអន្តោប្រវេសន៍ត្រឡប់ទៅស្រុកកំណើតដើម្បីមកបំពេញបែបបទធ្វើលិខិតឆ្លងដែនរបស់ពួកគេ។
គួរបញ្ជាក់ថា គិតចាប់ពីឆ្នាំ២០០៦-២០១៣ រដ្ឋាភិបាលមីយ៉ា់ន់ម៉ាបានចេញកាតបណ្តោះអាសន្នចំនួន១.៨០០.០០០សន្លឹកដល់ពលករអន្តោប្រវេសន៍របស់ខ្លួនក្នុងប្រទេសថៃ។ចំណែកស្ថានទូតមីយ៉ាន់ម៉ាប្រចាំប្រទេសថៃបានចេញលិខិតឆ្លងដែនចំនួន២៩.០០០តាំងពីឆ្នាំ២០១៣មក ។ មួយវិញទៀត គិតចាប់ពីឆ្នាំ២០១១រដ្ឋាភិបាលថៃបានបញ្ចូនពលករអន្តោប្រវេសន៍ខុសច្បាប់ត្រឡប់មកមីយ៉ាន់ម៉ាវិញចំនួន៥២.១៧០នាក់ ៕
ចែករំលែកព័តមាននេះ