រាជធានីភ្នំពេញ ៖ ពេលដែលលោកអ្នកចូលទៅដល់បរិវេណសាលាសង្កាត់ចោមចៅទី៣ ខណ្ឌពោធិ៍សែនជ័យ លោកអ្នកនឹងបានឃើញរូបសំណាកយាយទូលក្អមឈរក្រោមដើមឈើទាលនិងដើមគគីរ នៅមុខអគារប៉ុស្តិ៍នគរបាលរដ្ឋបាលចោមចៅទី៣ បែរមុខទៅទិសខាងត្បូងទៅរកអគារដ៏ធំស្កឹមស្កៃនៃសាលាសង្កាត់នេះ ។ ចំណែកនៅពីក្រោយរូបសំណាកយាយទូលក្អមនេះ ក៏មានរូបសំណាកមេគោ១ក្បាល…
រាជធានីភ្នំពេញ ៖ ពេលដែលលោកអ្នកចូលទៅដល់បរិវេណសាលាសង្កាត់ចោមចៅទី៣ ខណ្ឌពោធិ៍សែនជ័យ លោកអ្នកនឹងបានឃើញរូបសំណាកយាយទូលក្អមឈរក្រោមដើមឈើទាលនិងដើមគគីរ នៅមុខអគារប៉ុស្តិ៍នគរបាលរដ្ឋបាលចោមចៅទី៣ បែរមុខទៅទិសខាងត្បូងទៅរកអគារដ៏ធំស្កឹមស្កៃនៃសាលាសង្កាត់នេះ ។ ចំណែកនៅពីក្រោយរូបសំណាកយាយទូលក្អមនេះ ក៏មានរូបសំណាកមេគោ១ក្បាល ព្រមទាំងកូនគោ១ក្បាលទៀត ហើយនៅពីមុខយាយទូលក្អមមានរានទេវតា១ ។ រូបសំណាកនៅទីនោះ ត្រូវបានអាជ្ញាធរសង្កាត់និងនគរបាលប៉ុស្តិ៍គោរពបូជាខ្លាំងណាស់ ដោយជារៀងរាល់ថ្ងៃសីល តែងតែទិញផ្លែឈើដាក់អុជធូបបែបន់សុំសេចក្ដីសុខ និងសុំកុំឲ្យកើតមានបទ ល្មើសនៅក្នុងមូលដ្ឋានរបស់ខ្លួន ។
ជាងនេះទៀត កន្លងមកក៏ធ្លាប់មានអ្នកដែលមានរឿងទំនាស់ក្ដីក្ដាំចោទប្រកាន់គ្នាផ្សេងៗមួយចំនួនដែលចង់ឈ្នះចង់ចាញ់គ្នា សុខចិត្តបញ្ចប់រឿងដោយការអុជធូបស្បថស្បែនៅនឹងមុខរូបសំណាកយាយទូលក្អម និងរូបសំណាកមេគោ កូនគោនោះទៀតផង ។
ចំពោះអ្នកដែលធ្លាប់ចេញចូលទៅទទួលសេវាផ្សេងៗនៅទីនោះ ភាគច្រើនតែងតែមានចម្ងល់អំពីការដាក់តាំងរូបសំណាកខាងលើដែលមានលក្ខណៈខុសប្លែកពីសាលាឃុំ សង្កាត់នានា ហើយពេលដែលបានឃើញរូបសំណាកខាងលើនេះហើយ ពិតជាធ្វើឲ្យយើងនឹកដល់អ្នកកសាងឡើងដែលមិនអាចបំភ្លេចបាននោះគឺ លោក សុទ្ធ សាធ អតីតចៅសង្កាត់ចោមចៅ ។ លោកគឺជាមន្ត្រីមួយរូប ដែលមានប្រជាប្រិយភាពនិងមានស្នាដៃច្រើនរាប់មិនអស់ ព្រមទាំងមានការគោរពស្រឡាញ់រាប់អានពីប្រជាពលរដ្ឋក៏ដូចជាមន្ត្រីក្រោមឱវាទ ប៉ុន្តែគួរឲ្យសោកស្ដោយលោកបានទទួលមរណភាពប្រមាណ៣ឆ្នាំកន្លងទៅហើយដោយរោគាពាធ ។
បើតាមលោក វ៉ា សារ៉ង អតីតចៅសង្កាត់រងសង្កាត់ចោមចៅ ដែលបច្ចុប្បន្នជាចៅសង្កាត់
ចោមចៅទី២ ខណ្ឌពោធិ៍សែនជ័យ បានថ្លែងប្រាប់កោះសន្តិភាពថា រូបសំណាកខាងលើត្រូវបានលោក សុទ្ធ សាធ អតីតចៅសង្កាត់ចោមចៅកសាងឡើងអំពីស៊ីម៉ង់ត៍នៅចុងឆ្នាំ២០០៧ ។លោករៀបរាប់ថា គាត់បានជួលជាងចម្លាក់ម្នាក់ឈ្មោះ រេន ជាអ្នករស់នៅក្នុងភូមិជាមួយគាត់ដែរ គឺភូមិព្រៃទា សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ បន្ទាប់មកបានយកទៅដាក់តាំងនៅក្នុងបរិវេណសាលាសង្កាត់ចោមចៅនេះ ។ ប៉ុន្តែពុំមែនត្រឹមតែដាក់តាំងលម្អធម្មតាៗប៉ុណ្ណោះទេ គឺនៅកន្លែងតាំងរូបសំណាកនេះលោក សុទ្ធ សាធ បានដាំដើមឈើទាស ដើមគគីរ និងដើមស្វាយច្រើនដើម បំណងរំឭកពីអតីតកាលពីកុមារភាពរបស់លោក ។
លោក វ៉ា សារ៉ង បានថ្លែងទៀតថា កាលលោក សុទ្ធ សាធ នៅរស់រានមានជីវិត ធ្លាប់ប្រាប់លោកថា គាត់កសាងរូបយាយទូលក្អមនេះឡើង គឺជាតំណាងឲ្យម្ដាយរបស់គាត់ផ្ទាល់ ដែលខិតខំរកសុីចិញ្ចឹមគាត់និងបងប្អូនរបស់គាត់ទាំងអស់តាំងពីនៅតូចៗ ដោយមិនគិតពីការនឿយហត់និងលំបាកឡើយ ។ នៅជំនាន់នោះ មិនទាន់មានការរីកចម្រើនដូចបច្ចុប្បន្នទេ ហើយគាត់នៅចាំបានថា ម្ដាយគាត់បានទូលទឹកត្រពាំងយកមកឲ្យគាត់ផឹកនិងងូត ជាហេតុធ្វើឲ្យក្នុង១ជីវិតគាត់មិនអាចបំភ្លេចនូវសកម្មភាពម្ដាយបានឡើយ ។ចំណែករូបសំណាកមេគោនិងកូនគោ ដែលដាក់នៅពីក្រោយរូបយាយទូលក្អមនោះវិញ គឺលោក សុទ្ធ សាធ ចង់រំឭកដល់ពេលដែលម្ដាយគាត់ទូលទឹកផងនិងដឹកគោផង រស់នៅតាមជីវភាពបែបកសិករ ហើយកាលពីនៅកុមារភាពគាត់ក៏ធ្លាប់ជួយឃ្វាល គោឪពុកម្ដាយដែរ ដោយសារតែបែបនេះទើបគាត់កសាងរូបសំណាកនេះឡើងជាការគោរពនិងនឹកដល់គុណម្ដាយ ។
ប្រភពដដែលបានបន្តទៀតថា លោក សុទ្ធ សាធ បានចូលបម្រើការងារនៅសាលា សង្កាត់ចោមចៅតាំងពីអំឡុងឆ្នាំ១៩៧៩ ហើយបានឡើងធ្វើជាចៅសង្កាត់ចោមចៅនេះ នៅក្នុងឆ្នាំ១៩៨៨មក រហូតមកដល់ឆ្នាំ២០១៧ គាត់បានទទួលមរណភាពក្នុងជន្មាយុ៧១ឆ្នាំដោយរោគាពាធ ។នៅក្នុងរយៈពេលជិត៣០ឆ្នាំ ដែលគាត់ធ្វើជាចៅសង្កាត់ គឺមានស្នាដៃជាច្រើននៅក្នុងការដឹកនាំនិងអភិវឌ្ឍន៍មូលដ្ឋាន ។ ក្នុងដំណាក់កាលនោះ សង្កាត់ចោមចៅតែមួយមិនទាន់បំបែកចេញជា៣ដូចសព្វថ្ងៃនៅឡើយទេ ។ លោកជាចៅសង្កាត់ដែលធ្វើការងារច្បាស់លាស់គោរពពេលវេលាការងារ ចាត់ទុកសាលាសង្កាត់ជាផ្ទះសម្បែង គោរពមេកោយ និងមិនចេះឆ្មើងឆ្មៃឡើយ ។ នៅក្នុងឆ្នាំ២០០៩ លោកបានសាងសង់អគារសាលាសង្កាត់ដ៏ធំស្កឹមស្កៃកម្ពស់៣ជាន់ ដែលចំណាយថវិកាផ្ទាល់ ខ្លួនមួយចំនួនធំនិងថវិការបស់សាលារាជធានីភ្នំពេញមួយចំនួនផងដែរ ព្រមទាំងសមិទ្ធផលនិងវិស័យហដ្ឋារចនាសម្ព័ន្ធជាច្រើនទៀត ។
មិនតែប៉ុណ្ណោះ លោកតែងតែគិតគូរយ៉ាងខ្លាំងចំពោះសុខទុក្ខបងប្អូនប្រជាពលរដ្ឋនៅក្នុងមូលដ្ឋាន ជាពិសេសអ្នកដែលមានជីវភាពទីទ័លក្រ ប៉ុន្តែគួរឲ្យសោកស្ដាយបំផុត ដោយលោកធ្លាក់ខ្លួនមានជំងឺជាទម្ងន់រហូតទទួលមរណភាពនៅក្នុងខែមិថុនា ឆ្នាំ២០១៧ ក្នុងជន្មាយុ៧១ឆ្នាំ ។ លោក ថេង កុសល នាយប៉ុស្តិ៍នគរបាលរដ្ឋបាលចោមចៅទី៣ បានប្រាប់ថា សម្រាប់រូបលោកនិងមន្ត្រីនគរបាលប៉ុស្តិ៍ទាំងអស់តែងតែមានជំនឿ និងធ្វើការគោរពបូជារូបសំណាកខាងលើមិនដែលប្រមាទទេ ហើយបានដាក់ផ្លែឈើ ដាក់ផ្កា និងអុជធូបនៅរៀងរាល់ថ្ងៃសីល ដើម្បីសុំសេចក្ដីសុខដល់ខ្លួនឯងផង និងដល់មន្ត្រីក្រោមឱវាទទាំងអស់ផង ។ លោកបញ្ជាក់ថា ចំពោះរូបសំណាកមេគោនិងកូនគោមានពាក់ចង្ក្រង់ផងដែរ ហើយលោកបានហាមមិនឲ្យមានអ្នកទៅអង្រួនចង្ក្រង់នេះ
លេងសើចទេ ព្រោះវាអាចនាំឲ្យមានគ្រោះថ្នាក់ដល់ខ្លួនឯងផង និងមានរឿងអាក្រក់ៗនិងបទល្មើសកើតឡើងហូរចូលប៉ុស្តិ៍ផងដែរ ។
ជាក់ស្ដែង កាលពីពេលកន្លងទៅ មន្ត្រីនគរបាលផ្នែកព្រហ្មទណ្ឌខណ្ឌពោធិ៍សែនជ័យមួយរូប ដែលចុះមកសហការធ្វើការងារជាមួយកម្លាំងរបស់ប៉ុស្តិ៍ បានអង្រួនចង្ក្រង់រូបសំណាកគោលេងសើច ។ ខណៈនោះលោកហាមមិនស្ដាប់ទេ លុះពេលជិះម៉ូតូចេញពីប៉ុស្តិ៍ស្រាប់តែដួលម៉ូតូបណ្ដាលឲ្យរងរបួស ហើយក្រោយមកទើបយកចេញទៅដាក់និងអុជធូបសុំលាមាត់ លា-កវិញ ។ មិនតែប៉ុណ្ណោះ ក៏ធ្លាប់មានអ្នកក្ដីក្ដាំគ្នាដោះ ស្រាយមិនចេញ នាំគ្នាមកស្បថនៅទីនេះជាការបញ្ចប់រឿងថែមទៀតផង ៕
ចែករំលែកព័តមាននេះ