បន្ទាយមានជ័យ ៖ ដោយមើលឃើញនូវការលំបាករបស់ប្រជាពលរដ្ឋរងគ្រោះដោយជំនន់ទឹកភ្លៀងផង និងការរីករាលដាលនៃវីរុសកូវីដ ១៩ ផងនោះ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបាន…
បន្ទាយមានជ័យ ៖ ដោយមើលឃើញនូវការលំបាករបស់ប្រជាពលរដ្ឋរងគ្រោះដោយជំនន់ទឹកភ្លៀងផង និងការរីករាលដាលនៃវីរុសកូវីដ ១៩ ផងនោះ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបាន អំពាវនាវចំពោះម្ចាស់ធនាគារ ម្ចាស់មីក្រូហិរញ្ញវត្ថុទាំងអស់ត្រូវយោគយល់ ចំពោះអ្នកដែលមានការលិចលង់ ដែលត្រូវជំពាក់លុយ ធនាគារ ឬមីក្រូហិរញ្ញវត្ថុ ត្រូវមានការ អធ្យាស្រ័យ ដូចជាការពន្យា ឬបន្ថយការប្រាក់ជាដើម ។
ថ្លែងចេញពីខេត្តបន្ទាយមានជ័យនាឱកាសចុះអញ្ជើញសួរសុខទុក្ខ និងចែកអំណោយជូនប្រជាពលរដ្ឋរងគ្រោះដោយទឹកជំនន់ នៅខេត្តបន្ទាយមានជ័យ សម្តេចតេជោ បានមានប្រសាសន៍យ៉ាងដូច្នេះថា «សូមអំពាវនាវចំពោះម្ចាស់ធនាគារ ម្ចាស់មីក្រូហិរញ្ញវត្ថុទាំងអស់ត្រូវយោគយល់ ចំពោះអ្នកដែលមានការលិចលង់ ដែលត្រូវជំពាក់លុយ ធនាគារ ឬមីក្រូហិរញ្ញវត្ថុ ត្រូវមានការ អធ្យាស្រ័យ ដូចជាការពន្យា ឬបន្ថយការប្រាក់ជាដើម ជាពិសេសកុំអោយមានការរឹបអូសទ្រព្យសម្បត្តិ ក្នុងអំឡុងពេលកូវីដ និងអំឡុងពេលទឹកជំនន់នេះ» ។
សម្តេចតេជោ ហ៊ុន សែន បានជំរុញអោយអាជ្ញាធរក៏ ដូចជាប្រជាពលរដ្ឋត្រូវចូលរួមអនុវត្តចំពោះវិធានការសំខាន់ ០៣ក្នុងអំឡុងពេលនេះ ទី១)- ចូលរួមទប់ស្កាត់ការចម្លងជម្ងឺកូវីដ១៩ ទី២)- ជម្នះការលំការជាមួយគ្នាក្នុងការគ្រប់គ្រងទឹកជំនន់ និងទី៣)- យើងត្រូវខិតស្តារអភិវឌ្ឍន៍ឡើងវិញក្រោយពេលទឹកជំនន់។
សម្តេចតេជោនាយករដ្ឋមន្ត្រី ក៏សូមចូលរួមនូវមរណទុក្ខចំពោះគ្រួសារដែលបានបាត់បង់ជីវិតក្នុងពេលមានគ្រោះទឹកជំនន់នេះផងដែរ។ សម្តេចតេជោបន្តថា ខេត្តបន្ទាយមានជ័យ ជាខេត្តដែលរងគ្រោះធ្ងន់ជាងគេ និងយូរជាងគេ ដែលចាំបាច់ត្រូវផ្តល់អទិភាពសង្គ្រោះផង និងស្តារឡើងវិញក្រោយទឹកជំនន់ផង ។
សូមបញ្ជាក់ថាជំនន់ទឹកភ្លៀងបានវាយលុយខេត្ត-រាជធានីនៅកម្ពុជាសរុបចំនួន ១៩ ខេត្ត-រាជធានី ជាពិសេសនៅក្រុងភ្នំពេញក្នុងទឹកដីខណ្ឌដង្កោ ជំនន់ទឹកភ្លៀងបានវាយលុកលិចលង់ផ្ទះពលរដ្ឋជាច្រើនខ្នង ។ ជាមួយគ្នានោះផងដែរ ពលរដ្ឋដែលទិញផ្ទះដោយការបង់រំលោះ បានស្នើម្ចាស់បុរី ឬធនាគារសម្រួលពន្យាពេលនៃការបង់រំលោះផ្ទះ ព្រោះជំនន់ទឹកភ្លៀងធ្វើឲ្យពលរដ្ឋខកខានការរកទទួលទាន ហើយសម្ភារៈក្នុងផ្ទះក៏ខូចខាតផងដែរ ៕
ចែករំលែកព័តមាននេះ