រាជធានីភ្នំពេញ ៖ ព្រឹកថ្ងៃទី១៥ ខែតុលា ឆ្នាំ២០២០ អាជ្ញាធររាជធានីភ្នំពេញដឹកនាំដោយឯកឧត្តម ឃួង ស្រេង អភិបាលរាជធានី បាននាំយកអំណោយទៅផ្តល់ជូនដល់ប្រជាពលរដ្ឋជាង
២ពាន់គ្រួសារ នៅក្នុងសង្កាត់ចំនួន៤ ក្នុងខណ្ឌដង្កោ ដែលទទួលរងគ្រោះដោយជំនន់ទឹកស្ទឹងព្រែកត្នោត នាប៉ុន្មានថ្ងៃជាប់ៗគ្នានេះ ។
អំណោយទាំងនេះជារបស់សម្ដេចតេជោនាយករដ្ឋមន្ត្រី ហ៊ុន សែន និងសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ។ សម្រាប់ពេលនេះ ឯកឧត្តម អភិបាលរាជធានីភ្នំពេញ បាននាំយកអំណោយទៅចែកជូនប្រជាពលរដ្ឋចំនួន៤១៨គ្រួសារ នៅសង្កាត់សាក់សំពៅ និងប្រជាពលរដ្ឋ៣សង្កាត់ទៀត អាជ្ញាធររាជធានីភ្នំពេញនឹងបន្តចែកជូននៅរសៀលថ្ងៃដដែល ។
ឯកឧត្តម ឃួង ស្រេង មានប្រសាសន៍ថា សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែយកចិត្តទុកដាក់ចំពោះប្រជាពលរដ្ឋដែលរងគ្រោះនិងងាយរងគ្រោះ ។ ជាក់ស្តែង នៅក្នុងអំឡុងពេលនេះ ខណៈដែលប្រជាពលរដ្ឋកំពុងរងគ្រោះដោយជំនន់ទឹកភ្លៀងនៅតាមបណ្ដាខេត្តមួយចំនួន សម្ដេចបានយកចិត្តទុកដាក់ដោយបានប្រគល់អំណោយជាបន្តបន្ទាប់ ជាមួយនឹងការជំរុញឲ្យជួយសង្គ្រោះប្រជាពលរដ្ឋចេញពីតំបន់ដែលងាយរងគ្រោះ ។
ឯកឧត្តមបញ្ជាក់ថា អំណោយដែលសម្តេចតេជោផ្តល់ជូនប្រជាពលរដ្ឋទាំង៤សង្កាត់នេះ រួម
មាន សង្កាត់សាក់សំពៅចំនួន៤១៨គ្រួសារ សង្កាត់រលួសចំនួន៣២៩គ្រួសារ សង្កាត់គងនយ
ចំនួន៥០០គ្រួសារ និងសង្កាត់ទៀនចំនួន១៤២គ្រួសារ ដែលក្នុងមួយគ្រួសារៗទទួលបានអង្ករចំនួន២៥គីឡូក្រាម មី១កេស ទឹកបរិសុទ្ធ១កេសទឹកត្រី ទឹកស៊ីអីុវ និងប្រាក់៥ម៉ឺនរៀល ។
គួរបញ្ជាក់ថា ជំនន់ទឹកភ្លៀងពីស្ទឹងព្រែកត្នោត បានធ្វើឱ្យប្រជាពលរដ្ឋនៅខណ្ឌដង្កោទទួលរងគ្រោះចំនួនពីរបីថ្ងៃមកហើយ ហើយក្នុងខណៈនោះ ឯកឧត្តម ឃួង ស្រេង អភិបាលរាជធានីភ្នំពេញ តែងតែនៅជាប់ជាមួយប្រជាពលរដ្ឋ ដើម្បីដោះស្រាយរាល់កង្វល់និងបញ្ហារបស់ពួកគាត់ ។ ពិសេស ការជម្លៀសប្រជាពលរដ្ឋដែលរងគ្រោះ និងប្រជាពលរដ្ឋដែលងាយរងគ្រោះទៅកាន់ទីទួលសុវត្ថិភាព និងផ្តល់អំណោយជាបន្តបន្ទាប់ផងដែរ ៕
ចែករំលែកព័តមាននេះ