ខេត្ដកំពង់ឆ្នាំង ៖ ផ្ទៃដីព្រៃលិចទឹករាប់សិបហិកតា នៅឃុំមេលំ ស្រុកបរិបូណ៍ កំពុងរងការកាប់បំផ្លាញដើម្បីយកដីធ្វើស្រែឡើងទឹក ដែលការកាប់បំផ្លាញនេះពុំត្រូវបានសមត្ថកិច្ច ឬមន្ដ្រីជំនាញណាទប់ស្កាត់ឡើយ ។
យោងតាមប្រភពពីស្រុកបរិបូណ៍ បានឱ្យដឹងថា ដីព្រៃលិចទឹកដែលស្ថិតក្នុងភូមិមេលំ ស្រុកបរិបូណ៍រាប់សិបហិកតាទាំងនោះ ថ្វីដ្បិតថា ជាព្រៃលិចទឹក ប៉ុន្ដែជាកម្មសិទ្ធិរបស់ប្រជាពលរដ្ឋ ហើយត្រូវបានលក់ទៅឱ្យឈ្មួញអស់ទៅហើយ ទើបត្រូវបានឈ្មួញទាំងនោះជួល ឱ្យប្រជាពលរដ្ឋកាប់ព្រៃលិចទឹកទាំងនោះ ចេញដើម្បីធ្វើដីឱ្យស្អាតគ្មានព្រៃធ្វើជាកម្មសិទ្ធ និងធ្វើស្រូវឡើងទឹក ។ ប៉ុន្ដែទោះបីយ៉ាងនេះក្ដីតាមច្បាប់ស្ដីពីជលផល គឺខុសទាំងស្រុង ព្រោះបានបំពានកាប់រានដីព្រៃលិចទឹកដែលច្បាប់នេះបានហាមឃាត់។ ប្រភពដដែលបានបន្ដទៀតថា អ្នកកាន់កាប់ជួលគេកាប់ព្រៃទាំងនោះ ឈ្មោះ យាយ វ៉ាន់ ដែលជាអ្នកទទួលលុយពីឈ្មួញ ឬក្រុមហ៊ុនមកជួលគេកាប់រានដីព្រៃលិចទឹកទាំងនោះ ។
លោកកេត សុធា ជំទប់ឃុំមេលំ បានប្រាប់តាមទូរស័ព្ទថា ពិតជាមានការកាប់ព្រៃលិចទឹកយ៉ាងដូច្នោះមែន ប៉ុន្ដែជាដីដែលប្រជាពលរដ្ឋបានលក់ទៅឱ្យគេ ហើយមកដល់ពេល នេះខ្លះបានលុយខ្លះមិនទាន់បានលុយគ្រប់ និងខ្លះទៀតមិនបានតែម្ដង ។ ប៉ុន្ដែគាត់អះអាងថា ដីនេះកាលពីដើមជាដីស្រែពង្រោះ របស់ប្រជាពលរដ្ឋ តែក្រោយមកពួកគាត់បោះបង់ចោលអស់ទៅ ទើបមានព្រៃដុះជិតបែបនេះ ។ តាមប្រភពខាងក្រៅបានឱ្យដឹងថា ទឹកប្រាក់ដែលបានចំណាយក្នុងការប្រមូលទិញដីព្រៃលិចទឹកទាំងនោះមានចំនួនប្រមាណ៩ម៉ឺនដុល្លារ និង២៥លានរៀល ។ យោងតាមច្បាប់ស្ដីពីជលផលមាត្រា៩៨ ចែងថា ត្រូវផ្ទន្ទាទោសក្រោមបទល្មើសជល ផលថ្នាក់ទី១ ដែលត្រូវដាក់ពន្ធនាគារពី៣ ទៅ៥ឆ្នាំ ចំពោះជនណាដែលបានកាប់ឆ្ការ គាស់រាន ឈូសឆាយព្រៃលិចទឹក និងព្រៃកោងកាង និងហ៊ុមព័ទ្ធកាន់កាប់ដីព្រៃលិចទឹក និងព្រៃកោង ឬការបង្កឱ្យភ្លើងឆេះ ឬដុតព្រៃលិចទឹក និងព្រៃកោងកាង ។
ចែករំលែកព័តមាននេះ