ខេត្តស្វាយរៀង ៖ ទីបំផុតនៅវេលារសៀលថ្ងៃទី៦ ខែតុលា ឆ្នាំ២០២០នេះ ចៅក្រមស៊ើបសួរ ឌិន ស៊ីវុទ្ធី បានសម្រេចចេញដីកាបង្គាប់ឲ្យឃុំខ្លួនមន្ត្រីនគរបាលខេត្តស្វាយរៀងម្នាក់ឈ្មោះ ម៉ៅ…
ខេត្តស្វាយរៀង ៖ ទីបំផុតនៅវេលារសៀលថ្ងៃទី៦ ខែតុលា ឆ្នាំ២០២០នេះ ចៅក្រមស៊ើបសួរ ឌិន ស៊ីវុទ្ធី បានសម្រេចចេញដីកាបង្គាប់ឲ្យឃុំខ្លួនមន្ត្រីនគរបាលខេត្តស្វាយរៀងម្នាក់ឈ្មោះ ម៉ៅ វីរៈ ហៅចំរើន ដាក់ពន្ធនាគារខេត្តស្វាយរៀងជាបណ្ដោះអាសន្ន ក្រោមបទចោទប្រកាន់ ប្រទូស្តកេរ្តិ៍ខ្មាស មានស្ថានទម្ងន់ទោស ទាក់ទងទៅនឹងជនរងគ្រោះ ។
យោងតាមដីកា សាលាដំបូងខេត្តស្វាយរៀង អោយដឹងថា រយៈពេលនៃការឃុំខ្លួនបណ្ដោះអាសន្ន ចំនួន៤ខែ គិតចាប់ពីថ្ងៃទី០៦ ខែតុលា ឆ្នាំ២០២០ រហូតដល់ ថ្ងៃទី០៦ ខែកុម្ភៈ ឆ្នាំ២០២១ លើកលែងតែមានដីកាបង្គាប់ឲ្យរក្សាជនត្រូវចោទក្នុងឃុំ រងចាំការជំនុំជម្រះ ។
សូមរម្លឹកឡើងវិញថា «បញ្ជូនមន្ត្រីនគរបាលប៉ុស្តិ៍ម្នាក់ទៅតុលាការ ករណីប្រទូស្តកេរ្តិ៍ខ្មាសក្មេងស្រីអាយុ១៦ឆ្នាំ ជាង២ខែមុន» នៅថ្ងៃទី២៤ កញ្ញានេះ កម្លាំងនគរបាលខេត្តស្វាយរៀង បានស្រាវជ្រាវរកឃើញ និងធ្វើការឃាត់ខ្លួនមន្ត្រីនគរបាលប៉ុស្តិ៍ម្នាក់ ពាក់ព័ន្ធនឹងប្រទូស្តកេរ្តិ៍ខ្មាស លើក្មេងស្រី អាយុ១៦ឆ្នាំម្នាក់ កាលពីថ្ងៃទី១៩ កក្កដា ២០២០ ពោលគឺជាង២ខែមុន ។
មន្ត្រីនគរបាលប៉ុស្តិ៍ ដែលត្រូវឃាត់ខ្លួន មានឈ្មោះ ម៉ៅ វីរៈ បម្រើការងារនៅប៉ុស្តិ៍នគរបាលរដ្ឋបាលឃុំអង្គតាសូរ ស្រុកស្វាយជ្រុំ ខេត្តស្វាយរៀង ។
បើយោងតាមអ្នកនាំពាក្យស្នងការដ្ឋាននគរបាលខេត្តស្វាយរៀង បានអោយដឹងថា ករណីមន្ត្រីនគរបាលប៉ុស្តិ៍ ម៉ៅ វីរៈ បានប្រទូស្តកេរ្តិ៍ខ្មាស លើក្មេងស្រីអាយុ១៦ឆ្នាំ នៅចំណុចផ្ទះជនរងគ្រោះ ស្ថិតនៅភូមិក្តុមពី ឃុំគោកព្រីង ស្រុកស្វាយជ្រុំ ខែត្តស្វាយរៀង ពិតប្រាកដមែនកាលពីថ្ងៃទី១៩ កក្កដា ២០២០ ក្រោយពេលធ្វើសកម្មភាពរួច ជនសង្ស័យបានរត់គេចខ្លួនបាត់ ។
ជនសង្ស័យរូបនេះ ត្រូវបញ្ជូនមកកាន់ស្នងការដ្ឋាននគរបាលខេត្តស្វាយរៀង ដើម្បីកសាងសំណុំរឿង បញ្ជូនបន្តទៅសាលាដំបូងខេត្ត ចាត់ការតាមនីតិវិធីច្បាប់ ។
សូមជម្រាបថា ការឃាត់ខ្លួនមន្ត្រីនគរបាលប៉ុស្តិ៍ខាងលើនេះ បន្ទាប់ពីគណនីហ្វេសប៊ុកមួយរបស់ក្រុមគ្រួសារជនរងគ្រោះបានបង្ហោះសារ និងរូបជនសង្ស័យ កាលពីថ្ងៃម្សិលមិញយ៉ាងដូច្នេះថា «នេះហើយ ជាប៉ូលិស ដែលចាប់រំលោភបំពានមកលើប្អូនស្រីរបស់ខ្ញុំ កាលពីយប់ថ្ងៃទី១៩ កក្កដា ២០២០ នៅភូមិក្តុមពី ឃុំគោកព្រីង ស្រុកស្វាយជ្រុំ ខែត្តស្វាយរៀង ពេលនោះ រំលោភមិនបានសម្រេច ដោយសារប្អូនស្រីខ្ញុំ រើរួច ហើយស្រែកឲ្យគេជួយ ប្អួនស្រី ទើបតែអាយុ១៦ឆ្នាំ សូមសមត្ថកិច្ចខេត្តស្វាយរៀង មេត្តាតាមចាប់ជនល្មើសរូបនេះផង ។ ជនល្មើសមិនបានរត់ទៅណាទេ គឺនៅក្នុងភូមិ ។ ហេតុអី បានជាមិនរកយុត្តិធម៌អោយគ្រួសារខ្ញុំ ? ហេតុអី មិនមានច្បាប់ចាប់ខ្លួនជនល្មើស ? បើសិនជារឿងនេះ កើតក្នុងគ្រួសារអ្នក ហើយឃើញជនល្មើស ដើរលេងក្នុងភូមិយ៉ាងសប្បាយ តើអ្នកមានអារម្មណ៍យ៉ាងណា ? ចំពោះខ្ញុំ ខ្ញុំមានការឈឺចាប់ណាស់ ហើយខឹងណាស់ដែលខ្ញុំមិនអាចធ្វើអីគេបាន តែការឈឺចាប់នេះ ខ្ញុំទុកវានៅក្នុងចិត្ត ។ ខ្ញុំជាបងស្រី មិនអាចជួយប្អូនស្រីខ្លួនឯងបាន មានតែផុសតាម ហ្វេសប៊ុក អោយបងប្អូនជួយចែករំលែកផង ។ សូមអរគុណ ទុកជាមុន» ៕
ចែករំលែកព័តមាននេះ