ខេត្តប៉ៃលិន ៖ មានករណីប្រទះឃើញសពបុរសម្នាក់នៅក្នុងទឹកស្រីក្បែរផ្ទះ ត្រូវបានគេសង្ស័យថា ជនរងគ្រោះដើរទៅបន្លែត្រកួនម្នាក់ឯង លុះជម្ងឺរើឡើង ក៏ដួលធ្លាក់ចូលទៅក្នុងទឹកស្រះ បណ្តាលឱ្យលង់បាត់បង់ជីវិតតែម្តង ។
ហេតុការណ៍ខាងលើនេះបានកើតឡើងកាលពីវេលាម៉ោង៤និង២០នាទីរសៀលថ្ងៃទី២៨ ខែកញ្ញា ឆ្នាំ២០២០ ស្ថិតនៅភូមិបុស្អំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ជនរងគ្រោះឈ្មោះ គុយ ពៅ ភេទប្រុស អាយុ៤៣ឆ្នាំ មានទីលំនៅរស់នៅភូមិខាងលើ ។
តាមប្រភពព័ត៌មានបានបន្តទៀតថា មុនពេលកើតហេតុ គេឃើញជនរងគ្រោះដើរទៅខាងក្រោយផ្ទះតែម្នាក់ឯង ដើម្បីបេះត្រកួននៅក្នុងស្រះទឹកក្បែរផ្ទះរបស់ឈ្មោះ គុយ ធី ត្រូវជាបងបង្កើតរបស់ខ្លួន ដើម្បីយកមកធ្វើម្ហូប លុះសង្ស័យតែជំងឺសរសៃប្រសាទរើឡើងវិញ វិលមុខរអិលជើងដួលចូលទៅក្នុងទឹកស្រះ បណ្តាលឱ្យលង់បាត់បង់ជីវិតតែម្តង ។
តាមប្រភពព័ត៌មានបានបន្តទៀតថា នៅពេលបាត់ជនរងគ្រោះអស់រយៈពេលយូរ ក៍នាំគ្នាដើររកមើល ស្រាប់តែប្រទះឃើញបាត់បង់ជីវិតនៅក្នុងទឹកស្រះ បង្កឱ្យមានការភ្ញាក់ផ្អើលតែម្តង ។
បច្ចុប្បន្ន សពបុរសរងគ្រោះខាងលើ ត្រូវបានសមត្ថកិច្ច ចុះទៅត្រួតពិនិត្យ និងធ្វើកោសល្យវិច័យ ហើយប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ